Ana Reirei Iesu Ibukin te Atua

“Te aomata ae tii temanna ae ataa raoi te Tama bon te Nati. Ma e tangiria te Nati n taekina taekan te Tama nakoia aomata bwa a aonga naba n ataia.”​—RUKA 10:22, CONTEMPORARY ENGLISH VERSION.

IMWAIN ae e riki bwa te aomata ana moan Nati te Atua, e kabanea te tai ae rangi n abwabwaki n iraorao n te aro ae kaan ma Tamana. (I-Korote 1:15) Ngkanne te Nati, e a atai ana iango Tamana, ana namakin ao kawaina nako. Imwina riki ngke e roko te Nati aio nako aon te aba ao n riki bwa Iesu, e rangi n ingainga n reiakinia aomata te koaua ibukin Tamana. Ti kona n reiakina ae bati ibukin te Atua ni kakauongora nakon ae taekinna te Nati aei.

Aran te Atua E rangi ni kakawaki iroun Iesu aran te Atua ae Iehova. E tangiria te Nati ae rangi n tangiraki aei bwa a na ataa ao ni kamanena aran Tamana aomata nako. Nanon aran Iesu bon “Iehova bon te tia Kamaiu.” N te tairiki imwaini maten Iesu, e a kona n tataro ni kangai nakon Iehova: “I a tia ni kaotiota aram.” (Ioane 17:26) E aki kamimi ngkai Iesu e kamanena aran te Atua ao ni kaotiotia nakoia aomata nako. Bwa ni koauana, a na kanga taan ongora iroun Iesu n ota n te koaua ibukin Iehova ngkana a aki ataa arana ao tera nanon arana? *

Ana tangira te Atua ae korakora E taku Iesu n te taina n ana tataro nakon te Atua: “Tamau, . . . ko a kaman tangirai imwaini moan rikia ataei n te aonnaba.” (Ioane 17:24) Ibukina bwa e a tia Iesu n nora ana tangira te Atua i karawa, e a kakorakoraa ni kaotaraea te tangira anne n itera aika bati aika raraoi ni menana i aon te aba.

E kaotia Iesu bwa e raababa nako ana tangira Iehova. E taku: “E rangi n tangiriia kaain te aonnaba te Atua, n te aro are e a anga Natina ae te rikitemanna, bwa e aonga n aki kamaunaaki ane onimakinna, ma e na reke irouna te maiu are aki toki.” (Ioane 3:16) Te taeka ni Kuriiti ae kona n rairaki bwa “te aonnaba” n te kibu aei, e aki nanonaki iai “te aba.” Ni kabonganaakina ikai, e nanonaki iai aomata ae ni koauana bon aomata ni kabane. E rangi ni korakora ana tangira te Atua ibukin te botannaomata n te aro are e a anga Natina ae moan te tangiraki irouna, bwa a aonga ni kainaomataaki aomata aika kakaonimaki man tautoronakia n te bure ao te mate ao ni karekea kantaningaan te maiu ae aki toki. Ti aki kona ni baireia bwa raababara ao nanora te aeka n tangira anne.​—I-Rom 8:38, 39.

E taekinna ni kamatoaa Iesu te koaua ae moan te karaunano ae kangai: E korakora iroun Iehova tangiraia taan taromauria n tatabemania nako. E reirei Iesu bwa titeboo Iehova ma te tia kawakintiibu are e rangi ni kinaia ao a kakawaki irouna ana tiibu n tatabemania nako. (Mataio 18:12-​14) E taku Iesu bwa akea te tibaaro temanna ae kona ni bwaka i aontano n aki ataaki iroun Iehova. E a manga reitia riki: “A bane ni warekaki naba irannatumi.” (Mataio 10:29-31) Ngkana e kona Iehova n nora buan te tibaaro man oini ngaona, a na mwaitira riki riaina ni kawakinia ao n tararuaia aomata ake a taromauria n tatabemania nako? Ngkana e kona Iehova ni wareki irannatura ao n atai mwaitiia, e na iai ngkanne iterani maiura n aroni baika ti kainnanoi, ara kakorakora ao raraomara ae e na aki kona n ataia?

Tamara are i Karawa N aron ae ti noria n te kaongora are imwaina, Iesu bon Natin te Atua ae ana rikitemanna. Ti aki mimi ngkai e aki toki te Nati ae rangi tangiraki aei ni karinea Iehova ao n tataekinna bwa ‘Tamana.’ Ni koauana, n ana moan taeka Iesu ake a koreaki ake e taekin n te tembora ngke ai tibwa 12 ana ririki, e taekina Iehova  bwa ‘Tamana.’ (Ruka 2:49) E kaoti te taeka ae te “Tama” tao 190 te tai n Euangkerio. E taekina Iehova n aaro aika kakaokoro Iesu n aron ae “Tamami,” “Tamara,” ao “Tamau.” (Mataio 5:16; 6:9; 7:21) Ni kamanenaan te ara aei n aaro aika kakaokoro, e kaotia raoi iai Iesu bwa a kona ni karekea te iraorao ae tatangira ao n onimakinaki ma Iehova taani bure ao aomata aika aki kororaoi.

E nanoanga ao e tauraoi ni kabwarabure E ataia Iesu bwa aomata aika aki kororaoi a kainnanoa ana nanoanga ae korakora Iehova. N ana kabotau Iesu ibukin te nati are e bakatae, e kabotaua iai Iehova ma te tama ae nanoanga ma ni kabwarabure are e arori baina ni butimwaea natina are e a raira nanona. (Ruka 15:11-32) Ngaia are ti a kakoauaa iai ana taeka Iesu bwa Iehova e ukeri bitakin nanoia taani bure are e na riki bwa aani kaotiotan Ana nanoanga. E ingainga nanon Iehova ni kabwarai aia bure taani bure aika a rairannano. E kamataataa Iesu ni kangai: “I tuangingkami bwa n aron naba anne, e na bati riki te kimwareirei i karawa ibukin temanna te tia bure ae raira nanona, nakon te kimwareirei ibukia ake ruangauni ma ruaman ake a raoiroi ake a aki kainnanoa te rairannano.” (Ruka 15:7) Antai ae e na aki burimauniaki nakon te aeka n Atua ae nanoanga aei?

Te tia ongo tataro Ni menan Iesu i karawa imwain ruona nako aon te aba, e nora Iehova bwa bon ‘te tia ongo tataro’ ao e kimwareirei n aia tataro taan taromauria aika kakaonimaki. (Taian Areru 65:2, BG) Ngaia are n ana mwakuri ni minita Iesu, e reireinia ake a ongora irouna aroia n tataro ao baika a na tataroi ni kangai: “Tai mwanewei taeka aika titeboo ni kaokiokii.” E kaumakiia ake a ongora irouna bwa a na tataroa nanon te Atua bwa e na “kakororaoaki [nanona] i karawa ao n te aonnaba naba.” Ti kona naba n tataro ibukini kanara ni katoabong, kabwaraan ara bure, ao bwa ti aonga n rarawa nakon te kaririaki. (Mataio 6:5-13) E reirei Iesu bwa Iehova e butimwaei aia tataro Ana toro n aron te karo ae e tatangira ao e kaekai aia bubutii aika nako mai nanoia aika irianaki n te onimaki.​—Mataio 7:7-11.

Ni koauana, e kakorakoraa Iesu n reirei te koaua ibukin Iehova bwa te aeka n Atua raa ngaia. Ma iai riki te bwai teuana ibukin Iehova ae e ingainga Iesu ni kan tibwaia nakoia aomata. E kani katereterea nakoia te bwai are e na kabongana Iehova ni karekei bitaki nakon te aonnaba ni kabutaa ao ni kakororoa bukin Ana kantaninga ibukin te aonnaba ao kaaina. Ni koauana, iteran ana rongorongo Iesu aei, e riki bwa te boto n iango are e tataekinna.

[Kabwarabwara ae nano]