Mbaʼépa omboʼe Jesús Ñandejáragui?

‘Avave ndoikuaaporãi pe Túvape, Itaʼýramante, ha pe Taʼýra oikuaaukasévapente oikuaaukáta.’(LUCAS 10:22, ÑÑB)

ONASE mboyve yvypóraicha, Ñandejára Raʼy ypykue oĩmavaʼekue yvágape hetaiterei tiémpo Itúva ndive (Colosenses 1:15). Upéicha rupi oikuaa porãiterei chupe. Pór ehémplo oikuaa mbaʼépa opensa, oñandu ha ojapo. Koʼã mbaʼe omomýi chupe omombeʼu hag̃ua umi héntepe mbaʼeichaguápa Ñandejára. Ha ñande, mbaʼépa ikatu ñaaprende umi mbaʼe omboʼevaʼekuégui Jesús? Jahechamína.

Ñandejára réra Jesúspe g̃uarã iñimportantetereivaʼekue umi hénte oikuaa ha oiporu Ñandejára réra, Jehová. Pe téra Jesús ningo heʼise voi “Jehová hína Salvasión”. Upévare pe pyhare omano mboyve oñemboʼe Itúvape ha ijuru renyhẽ heʼi chupe: ‘Aikuaauka chupekuéra nde réra’ (Juan 17:26). Jesús oiporuvaʼekue Ñandejára réra ha oikuaauka avei umi ojapysakávape hese. Ha ñapensa porãramo umi hénte ndaikatumoʼãi voi oaprende Jehovágui ndoikuaáiramo héra ni mbaʼépa heʼise upéva. *

Oporohayhueterei Peteĩ jey Jesús oñemboʼe Ñandejárape ha heʼi: “Che Ruete, [...] Nde cherayhu voi vaʼekue ojejapo mboyve ko múndo” (Juan 17:24, ÑÑB). Oĩrõ guare yvágape, Jesús oñandu porã vaʼekue mbaʼeichaitépa Ñandejára ohayhu chupe, ha upévare oúrõ guare ko yvy ape ári ojapo ikatúva guive umi hénte omombaʼe hag̃ua Ñandejára mborayhu. Mbaʼe mbaʼépa ojapóraʼe?

Ñepyrũrã omboʼe Jehová ohayhuha yvyporakuérape. Upévare heʼi: ‘Ñandejára ohayhuetereígui opa yvypórape, omeʼẽvaʼekue Itaʼýra peteĩete, ani hag̃ua omano umi hese ojeroviáva, oikove hag̃ua guei opa ára’ (Juan 3:16). Ñandejára ohayhuetereígui yvyporakuérape omeʼẽ Itaʼýra ohayhuvévape omosãso hag̃ua hembiguaikuéra iñeʼẽrendúvape pekádo ha ñemano poguýgui, ha oiko hag̃ua hikuái opa ára g̃uarã. Aje piko ñanderayhuete Ñandejára, tuichaiterei mbaʼe ningo la ojapóva ñanderehehápe! (Romanos 8:38, 39.)

Péro Jesús omboʼe avei Jehová ohayhuha peteĩteĩ hembiguaikuérape. Upévare heʼi Ñandejára ojoguaha peteĩ ovecharerekuápe omombaʼetereíva ijovechakuéra ha oikuaa porãva peteĩteĩme (Mateo 18:12-14). Avei heʼi ni peteĩ guyraʼi ndoguejyiha yvýpe Jehová oikuaaʼỹre. Ha ‘ñane akãrague jepe haʼe oipapapaite’ (Mateo 10:29-31, NM). Upéicharõ, Jehová ojepyʼapýrõ peteĩ guyraʼi noĩrivare hupápe, mbaʼéicha piko ndojepyʼapymoʼãi peteĩteĩ hembiguaikuérare? Ha oipapárõ peteĩteĩ ñane akãrague, mbaʼéicha piko ndoikuaamoʼãi mbaʼépa ñande pyʼapy, ñaikotevẽ térã ñandejopy?

Túva yvagapegua Jahecha haguéicha, Jesús haʼe hína Ñandejára Raʼy peteĩete, upévare pyʼỹinte haʼe ohenói chupe ‘che Ru’. Pór ehémplo la Biblia omombeʼu Jesús oguerekórõ  guare doce áño oho hague témplope, ha upérõ ohenói Ñandejárape ‘che Ru’ (Lucas 2:49, NM). Mateo, Marcos, Lucas ha Juan kuatiañeʼẽme ciento noventa hendápe ojehai Jesús ohenói hague ‘che Ru’ Jehovápe. Ha pyʼỹinte oiporu koʼã ñeʼẽ: ‘pende Ru’, ‘ore Ru’ ha ‘che Ru’ (Mateo 5:16; 6:9; 7:21). Upéicha oheja ñandéve peteĩ ehémplo neporãva, ohechauka ñande yvypóra jajavy meméva jepe ikatuha avei ñañemoag̃ui Jehováre ha jareko chupe ñane amígoramo.

Oporombyasy ha oporoperdona Jesús ningo oikuaa porã ñande jajavy memeha, ha upéicha rupi ñaikotevẽha Ñandejára ñandeporiahuvereko. Upévare omoĩ peteĩ ehémplo ohechaukáva mbaʼéichapa Ñandejára oporombyasyeterei. Haʼe omombeʼu peteĩ túva ipyʼaporãva ovyʼaiterei hague itaʼýra oñembyasy rupi ha oho jey hógape (Lucas 15:11-32). Jehová ningo upeichaite avei, haʼe oipotaiterei ñañembyasy ñane rembiapo vaikuére ikatu hag̃uáicha ñaneperdona. Haʼe ningo ipyʼaite guive operdonase umi oñembyasývape. Jesús heʼivaʼekue: ‘Upéicha avei, oĩramo peteĩ hekovaíva ha ombyasy hembiapo vaikue, upéva ojeguerohoryve yvágape umi noventa y nueve hekojojávagui natekotevẽiva oñembyasy’ (Lucas 15:7, NM). Aje piko ipyʼaporãite Ñandejára, peichaguáre ningo ñande ñañemoag̃uise voi!

Ohendu ñane ñemboʼe La Biblia heʼi Jehová ‘ohenduha maymáva ñemboʼe’. Jesús oĩ aja yvágape ohecha mbaʼéichapa Jehová oipota hembiguaikuéra iñeʼẽrendúva oñemboʼe chupe (Salmo 65:2). Upévare oúrõ guare ko yvy ape ári omboʼe hemimboʼekuérape oñemboʼe hag̃ua. Heʼi chupekuéra: ‘Peñemboʼe jave ani peje jey jey peteĩ mbaʼénte’. Avei heʼi mbaʼépa ojerurevaʼerã hikuái: ‘Tojejapo ne rembipota yvy ape ári yvagapeguáicha, emeʼẽ oréve ore rembiʼurãmi ko árape g̃uarã. Eheja reína oréve ore rembiapo vaikue, ha ani reheja roʼa mbaʼe vaípe’ (Mateo 6:5-13, NM). Jesús omboʼe Jehová haʼeha peteĩ Túva ipyʼaporãva ha ohenduha hembiguaikuéra iñeʼẽrendúvape oñemboʼéramo chupe ipyʼaite guive (Mateo 7:7-11).

Jaʼekuaa upéicharõ Jesús omboʼe porã hague mbaʼeichaguápa Jehová. Péro oĩ avei peteĩ mbaʼe oipotáva opavave oikuaa: mbaʼépa oiporúta Ñandejára ojapo hag̃ua hembipota ko yvy ape ári yvyporakuéra rehehápe. Mbaʼérepa iñimportantete vaʼekue Jesúspe g̃uarã upéva?

[Nóta]