Oware nọ Jesu O Wuhrẹ Kpahe Ọghẹnẹ

“Ohwo ọvo ọ riẹ . . . ohwo nọ Ọsẹ na ọ rọ họ ajokpa Ọmọ na, gbe ọnọ ọ ruọ Ọmọ na nọ [o re dhesẹ iẹe] via kẹ.”—LUK 10:22.

ỌMỌ ọsosuọ Ọghẹnẹ na o wo usu okpekpe kugbe Ọsẹ riẹ evaọ obọ odhiwu ikpe nọ i wo unu hu taure ọ tẹ te ziọ otọakpọ. (Ahwo Kọlọsi 1:15) Enẹ Ọmọ na ọ rọ riẹ eriwo, iroro, gbe ọdawẹ Ọsẹ riẹ. Uwhremu na, nọ Ọmọ na, ọnọ a riẹ wọhọ Jesu ọ te ziọ otọakpọ no, ọwhọ ọ jariẹ oma re o wuhrẹ ahwo uzẹme na kpahe Ọsẹ riẹ. Ma rẹ sai wuhrẹ eware buobu kpahe Ọghẹnẹ nọ ma tẹ gaviezọ kẹ eme Ọmọ na.

Odẹ Ọghẹnẹ Odẹ Ọghẹnẹ, Jihova, o jọ Jesu oja vi eware efa kpobi. Ọmọ oyoyou nana ọ gwọlọ nọ amọfa a riẹ je se odẹ Ọsẹ riẹ. Otofa odẹ Jesu họ “Jihova Họ Esiwo.” Evaọ aso urere taure o te ti whu, Jesu ọ jọ olẹ ta kẹ Jihova nọ: “Me dhesẹ odẹ ra kẹ ae.” (Jọn 17:26) U re gbe omai unu hu inọ Jesu o se odẹ Ọghẹnẹ je dhesẹ iẹe kẹ amọfa. Ẹhẹ, ẹvẹ ahwo nọ a jẹ gaviezọ kẹ Jesu a hẹ sai ro wo otoriẹ uzẹme na kpahe Jihova ababọ ẹriẹ odẹ Riẹ gbe otofa odẹ na? *

Uyoyou ulogbo Ọghẹnẹ Jesu ọ jọ olẹ ta kẹ Ọghẹnẹ nọ: “Who you omẹ.” (Jọn 17:23) Fikinọ Jesu ọ reawere uyoyou Ọghẹnẹ evaọ obọ odhiwu, ọ jẹ gwọlọ edhere nọ o re ro dhesẹ kabọ kabọ uyoyou yena via evaọ otọakpọ.

Jesu o dhesẹ nọ uyoyou Jihova o basa ha. Jesu ọ ta nọ: “Ọghẹnẹ o you akpọ na hrọ, ọ jẹ rehọ Ọmọvo riẹ kẹ, re kohwo kohwo nọ ọ rọwo riẹ o gbe vrẹ hẹ rekọ o re wo uzuazọ ebẹdẹ bẹdẹ.” (Jọn 3:16) Orọnikọ “otọakpọ” oye ẹme Griki nọ a jọ etenẹ fa “akpọ” na u dhesẹ hẹ. U dhesẹ ahwo-akpọ, ẹhẹ, ahwo-akpọ kpobi. Uyoyou nọ Ọghẹnẹ o wo kẹ ahwo-akpọ o ga te epanọ o ro si obọ no Ọmọ ọghaghae riẹ re ahwo nọ a fi ẹrọwọ họ iẹe a sai wo ufuoma no uzioraha gbe uwhu, jẹ sai wo ẹruore uzuazọ ebẹdẹ bẹdẹ. Ma sae ruẹ oware ovo rọ wawọ epanọ uyoyou nana u kpehru te he.—Ahwo Rom 8:38, 39.

Jesu o fi ẹgba họ uzẹme jọ nọ o rẹ kẹ omosasọ: Jihova o you idibo riẹ omomọvo. Jesu o wuhrẹ nọ Jihova ọ wọhọ othuru-igodẹ nọ ọ riẹ igodẹ riẹ ọvuọvo je rri rai ghaghae. (Matiu 18:12-14) Jesu ọ ta nọ ọmọvra ọvuọvo o re kie otọ ababọ ẹriẹ nọ Jihova ọ rẹ riẹ hẹ. Ọ tẹ ta kẹ ilele na omarai nọ: “Makọ egẹ-eto uzou rai kpobi a kele i rai.” (Matiu 10:29-31) Otẹrọnọ Jihova o re muẹrohọ ọmọvra ọvo nọ o kie fihọ otọ, kọ u gbe muẹro inọ o bi muẹrohọ jẹ be sẹro idibo riẹ omomọvo viere? Otẹrọnọ Jihova ọ riẹ je bi muẹrohọ ibi eto-uzou mai, kọ u wo oware jọ evaọ uzuazọ mai nọ ọ rẹ sai muẹrohọ họ—makọ ẹgwọlọ, ẹrova, gbe awaọruọ mai?

Ọsẹ obọ odhiwu Wọhọ epanọ ma ruẹ evaọ uzoẹme nọ o vrẹ na, Jesu họ Ọmọvo  Ọghẹnẹ. Agbẹta nọ Ọmọ oyoyou nana ọ jẹ hai ro se Jihova “Ọsẹ” riẹ na! Ẹhẹ, evaọ eme ọsosuọ Jesu nọ a kere fihọ otọ, enọ ọ ta evaọ obọ etẹmpol okenọ ọ jọ ikpe 12, o se Jihova “Ọsẹ mẹ.” (Luk 2:49) Ẹme na “Ọsẹ” o roma via enwenọ unuẹse 190 evaọ ikere Usiuwoma na. Evaọ etoke sa-sa, Jesu o se Jihova “Ọsẹ rai,” “Ọsẹ mai,” gbe “Ọsẹ mẹ.” (Matiu 5:16; 6:9; 7:21) Ẹkwoma oghẹrẹ nana nọ Jesu ọ jẹ hai ro se Jihova na, o dhesẹ via inọ o lọhọ re ahwo-akpọ sebaẹgba a wo usu okpekpe kugbe Jihova.

O wo ohrọ gbe erọvrẹ Jesu ọ riẹ nọ ahwo-akpọ sebaẹgba a gwọlọ ohrọ-oriọ Jihova gaga. Evaọ ọtadhesẹ riẹ ọrọ ọmọ ogbọfariẹ na, Jesu ọ rehọ Jihova dhesẹ ọsẹ ohrọ-oriọ nọ o wo erọvrẹ nọ ọ rẹ rọ abava dede ọmọ nọ o kurẹriẹ no uruemu uyoma. (Luk 15:11-32) Jesu ọ rọ ọtadhesẹ nana kẹ omai imuẹro inọ Jihova o re fi ẹro h’otọ gwọlọ owojẹ ekurẹriẹ nọ ọ rẹ rọ fiki riẹ rọ vrẹ ọrahauzi. O rẹ were Jihova re ọ rọ vrẹ ọrahauzi nọ o kurẹriẹ. Jesu ọ ta nọ: “Mẹ ta kẹ owhai nọ, Ere a rẹ ghọghọ obọ odhiwu fiki ọrahaizi ọvo nọ o kurẹriẹ, vi nọ a ghọghọ fiki udhe one gbe ikpogbizi ikiẹrẹe.” (Luk 15:7) Ono oma o rẹ wọ si kẹle Ọghẹnẹ ohrọ otiọye he?

Ọnọ o re yo elẹ Nọ ọ jọ obọ odhiwu taure ọ tẹ te ziọ otọakpọ, Jesu ọ ruẹ vuhumu inọ Jihova họ “Ọnọ o re yo elẹ,” gbe inọ elẹ idibo Riẹ nọ i wo ẹrọwọ e rẹ were iẹe. (Olezi 65:2) Fikiere, evaọ etoke odibọgba riẹ, Jesu o wuhrẹ ahwo nọ a jẹ gaviezọ kẹe epanọ a rẹ lẹ gbe oware nọ a rẹ lẹ kpahe. Ọ kẹ rai ohrẹ nọ: ‘Wha ta eme evona ẹtẹta ha.’ Ọ ta udu họ ae awọ nọ a lẹ inọ ‘epanọ a rọ obọ odhiwu ru oreva Ọghẹnẹ na, a jọ akpọ na ru ere re.’ Ma rẹ sae jẹ lẹ kẹ emu okpẹdẹ, erọvrẹ izieraha mai, gbe edikihẹga evaọ otọ edawọ. (Matiu 6:5-13) Jesu o wuhrẹ ahwo inọ epanọ ọsẹ ọ rẹ kpahe fihọ ayare ọmọ riẹ na, ere ọvona Jihova ọ rẹ kuyo elẹ nọ idibo Riẹ a rọ eva efuafo avọ ẹrọwọ lẹ.—Matiu 7:7-11.

Avro ọ riẹ hẹ, Jesu o wuhrẹ uzẹme na kpahe Jihova gbe oghẹrẹ Ọghẹnẹ nọ ọ rrọ. Rekọ u wo oware ofa jọ nọ Jesu ọ jẹ rehọ ajọwha wuhrẹ ahwo kpahe Jihova—edhere nọ Jihova o ti ro nwene uyero akpọ na soso re ọ ruẹsi ru ẹjiroro riẹ kpahe otọakpọ na gbe ahwo-akpọ gba. Ẹhẹ, onana o jọ uzoẹme usiuwoma ota Jesu.

[Oruvẹ-obotọ]