Isua’n Pathian Chungchâng A Zirtîr Chu

“Pa nihna hre chiangtu awmchhun chu Fapa a ni a. Mahse, Fapa chuan mi dang pawhin Pa nihna an lo hriat theihna tûrin, an hnêna A chanchin hriattîr chu a duh a ni.”—LUKA 10:22, CONTEMPORARY ENGLISH VERSION.

MIHRING anga a lo kal hmain, Pathian Fapa piang hmasa ber chuan a Pa nên kum chhiarsên loh khawpa tam inlaichînna hnai tak an nei a. (Kolossa 1:15) Chuvângin, a Pa rilru te, a thil vei zâwng te, leh a duh zâwng te a hria a ni. A hnua Isua hming pua mihring anga leia a lo kal chuan, a Pa chungchâng thu dik mite zirtîr chu a châk hle a. Chuvângin, Fapa thusawite ngaihthlâkna aṭangin Pathian chungchâng kan zir ṭeuh thei a ni.

Pathian hming Pathian hming, Jehova chu Isua ngaih pawimawh ber a ni a. He Fapa duh tak hian a Pa hming chu mi dangte’n hria a, hmang tûrin a duh a ni. Isua hming awmzia chu “Jehova chu Chhandamna A Ni” tihna a ni a. A thih hma zâna Pathian Jehova hnêna a ṭawngṭainaah, Isua chuan: ‘I hming ka hriattîr tawh,’ tiin a sawi thei a ni. (Johana 17:26) Isua’n Pathian hming a hmang a, mi dangte a hriattîr ve pawh hi thil mak a ni lo. Chutia a tih loh chuan, engtin nge a thu ngaithlatute’n a hming leh a awmzia pawh an hriat loh Pathian Jehova chungchâng thutak chu an hriat theih tehrêng ang? *

Pathian hmangaihna ropui Ṭum khat chu Pathian hnêna a ṭawngṭainaah, Isua chuan: “Ka Pa, . . . leilung pian hma pawhin nangin mi hmangaih tawh si a,” tiin a sawi a. (Johana 17:24) Vânah Pathian hmangaihna a lo hriat tawh avângin, Isua chuan leia a awm laiin chu hmangaihna hmêl hmang duhawm takte chu lantîr a tum tlat a ni.

Isua chuan Pathian Jehova hmangaihnain a huapzau tih pawh a lantîr a. Heti hian a sawi a ni: “Pathianin khawvêl a hmangaih êm êm a, chutichuan a fapa mal neih chhun a pe a, amah chu tupawh a ring apiang an boral loh va, chatuana nunna an neih zâwk nân,” tiin. (Johana 3:16) “Khawvêl” tia lehlin he Grik thu mal hi “lei” tihna a ni lo. He Bible chânga hman a nih ang hian, mihring—mihring zawng zawngte—sawina a ni. Pathianin mihringte a hmangaih êm avângin, sual leh thihna bâwih ata mi rinawmte chhuah a, chatuan nun beiseina neihtîr nân a Fapa duh tak chu a pe hial a ni. Chutiang hmangaihna ropui tak thûkzia leh zauzia chu kan chhût thiam phâk a ni lo.—Rom 8:38, 39.

Isua chuan thutak thlamuanpuiawm ber mai chu a nemnghet a ni: Pathian Jehova’n amah betute chu a mi mal angin a hmangaih êm êm ṭheuh a ni tih chu. Isua chuan Pathian Jehova chu berâm tinte danglam ṭheuh anga en a, hlut ṭheuhtu berâm pu ang a nih thu a zirtîr a. (Matthaia 18:12-14) Chawngzawng pakhat tê pawh Pathian Jehova hriat lohvin leiah a tla ngai lo tih a sawi bawk a. “In samzaite lam pawh hi chhiar vek a ni asin,” tiin a sawi belh bawk. (Matthaia 10:29-31) Pathian Jehova chuan chawngzawng bu a khawi emaw bera chawngzawng pakhat tê kim lo pawh a hriat theih chuan, amah betu mihringte chu eng ang khawpin nge a hriat a, a ngaihsak lehzual ang? Pathian Jehova chuan kan samzai tin pawh a hriat vek theih chuan, kan chungchâng—kan mamawh te, kan harsatna tawh te, kan manganna te—a hriat theih loh a awm dâwn em ni?

Vâna kan Pa Thuziak hmasaa kan hmuh tawh angin, Isua chu Pathian Fapa mal neih chhun a ni a. He Fapa duh tak hian Pathian Jehova chu “Pa” tia ko fovin, a chanchin pawh a sawi fo a ni. Dik takin, Isua ṭawngkam chhuak  chhinchhiah hmasak ber, kum 12 mi lek a nih laia biak ina a thusawiah Pathian Jehova chu “ka Pa” tiin a ko a ni. (Luka 2:49) “Pa” tih ṭawngkam chu Thuthlung tharah hian vawi 190 dâwn lai a lang a. Isua chuan Pathian Jehova chu, “in Pa,” “kan Pa,” “ka Pa” titein chi hrang hrangin a sawi a ni. (Matthaia 5:16; 6:9; 7:21) Isua chuan chu Pathian nihna chu zalên taka hmangin, sual leh ṭha famkim lo mihringte hian Pathian Jehova nên inlaichînna duhawm leh rin tlâk tak an neih theihzia a târ lang a ni.

Zahngai thei leh ngaihdam peih Mihring ṭha famkim lote hian Pathian Jehova zahngaihna nasa tak an mamawh tih Isua chuan a hria a. Fapa tlân bo tehkhin thu a sawiah, Isua chuan Pathian Jehova chu a fapa inlam lêt chu lo lâwm a, lo pawmtu lainatna ngah tak pa ber nên a tehkhin a ni. (Luka 15:11-32) Chutiang chuan, Pathian Jehova’n mi sual chunga zahngaihna A lantîr theihna tûr, rilru inlam lêtna a neih leh neih loh a zawng reng tih Isua thusawi chuan min hriattîr a ni. Pathian Jehova chuan thil sual ti inlam lêtte ngaihdam chu a châk hle a. Isua chuan: “Ka hrilh a che u, chutiang bawkin mi fel sawmkua leh pakua sim chuan tûr nei lote ai chuan mi sual pakhat sim chungah hian vâna mi an lâwm zâwk ang,” tiin a sawi a ni. (Luka 15:7) Chutiang khawpa zahngai thei Pathian chu tuin nge hnaih duh lo tehrêng ang?

Ṭawngṭaina ngaithlatu Isua chuan leia a lo kal hma, vâna a awm lai khân Pathian Jehova chu “ṭawngṭaina ngaithlatu” a ni tih leh Amah betu rinawmte ṭawngṭaina a lâwm tih a hre tawh a. (Sâm 65:2) Chuvângin, leia a rawngbâwl chhûng khân, a thusawi ngaithlatute chu ṭawngṭai dân tûr leh an dîl tûrte a zirtîr a. An hnênah: “Sawi nawn mai mai suh u,” tiin a hrilh a ni. A thusawi ngaithlatute chu Pathian duhzâwng “vâna an tih angin leia mi’n ti rawh se,” tia ṭawngṭai tûrin a fuih a ni. Nî tin ei khawp min pe tûr te, kan sual ngaidam tûr te, leh thlêmna do zo tûr tein kan ṭawngṭai thei bawk. (Matthaia 6:5-13) Rinna nêna A chhiahhlawh rinawmte ṭawngṭaina chu Pathian Jehova chuan pa ber nih tling takin a chhâng ṭhîn tih Isua chuan a zirtîr a ni.—Matthaia 7:7-11.

Isua chuan Pathian Jehova chungchânga thu dik leh eng ang Pathian nge a nih tih mite zirtîr dân kawng a dap reng tih a chiang hle. Isua’n Pathian Jehova chungchâng mite hrilh a châk êm êm dang pawh a la awm cheu va; chu chu, he lei leh a chhûnga mihringte tâna A thiltum tihpuitlin nâna khawvêl puma inthlâkthlengna thlentîr nâna a hman tûr chungchâng hi a ni. A nihna takah chuan, chu chu Isua’n a thu hrilh thupui bera a hman chu a ni. (w10-E  04/01)

[Footnote]