Seo Jesu a se Rutilego ka Modimo

“Yo a tsebago Tate gabotse ke Morwa. Eupša Morwa o nyaka go botša bangwe ka Tate, e le gore le bona ba mo tsebe.”—LUKA 10:22, CONTEMPORARY ENGLISH VERSION.

PELE e e-ba motho, Morwa wa pele wa Modimo o feditše nywaga e mentši kudu a le kgaufsi le Tatagwe. (Bakolose 1:15) Ka gona, Morwa o ile a kgona go kwešiša megopolo ya Tatagwe, maikwelo le ditsela tša Gagwe. Ge Morwa a e tla lefaseng ka morago e le motho, Jesu, o be a fagahletše go ruta batho therešo ka Tatagwe. Re ka ithuta go gontši ka Modimo ka go theetša seo Morwa a se bolelago.

Leina la Modimo Leina la Modimo, Jehofa, le be le le bohlokwa kudu go Jesu. Morwa yo yo a rategago o be a nyaka gore ba bangwe ba tsebe leina la Tatagwe le go le diriša. Leina la Jesu le ra gore “Jehofa ke Phološo.” Bošegong bja pele ga lehu la gagwe, Jesu o ile a botša Jehofa ka thapelo gore: “Ke . . . tsebišitše leina la gago.” (Johane 17:26) Ga go makatše gore Jesu o ile a diriša leina la Modimo le go le tsebiša ba bangwe. Go ba gona, batheetši ba Jesu ba ka kwešiša bjang therešo ka Jehofa ntle le gore ba tsebe leina la Gagwe le seo le se emelago? *

Lerato le legolo la Modimo Jesu o kile a botša Modimo ka thapelo gore: “Tate, . . . o nthatile pele lefase le thewa.” (Johane 17:24) Ka ge a ile a bona lerato la Modimo ge a be a le legodimong, ge Jesu a be a le mo lefaseng o be a nyaka go utolla lerato leo ka dikarolo tša lona ka moka tše botse.

Jesu o ile a bontšha gore lerato la Jehofa le a katologa. Jesu o boletše gore: “Modimo o ratile lefase kudu mo a ilego a gafa Morwa wa gagwe yo a tswetšwego a nnoši gore yo mongwe le yo mongwe yo a dumelago go yena a se ke a fedišwa, eupša a be le bophelo bjo bo sa felego.” (Johane 3:16) Lentšu la Segerika leo le fetoletšwego e le “lefase” ga le šupe “polanete.” Ka ge le dirišitšwe mo, le šupa batho—ge e le gabotse, go batho ka moka. Lerato leo Modimo a ratago batho ka lona ke le legolo kudu mo a ilego a gafa Morwa wa gagwe yo a ratwago kudu e le gore batho ba botegago ba ka lokollwa dinaleng tša sebe le lehu, le go ba le tebelelo ya bophelo bjo bo sa felego. Re ka se ke ra kgona go lekanyetša goba go kwešiša bogolo bja lerato leo le legolo.—Baroma 8:38, 39.

Jesu o tiišeditše therešo e kgodišago, ya gore: Jehofa o rata barapedi ba gagwe e le motho ka o tee ka o tee. Jesu o rutile gore Jehofa o swana le modiši yo nku e nngwe le e nngwe ya gagwe e sa swanego le tše dingwe e bile e lego bohlokwa. (Mateo 18:12-14) Jesu o boletše gore ga go thaga yeo e ka welago fase Jehofa a sa tsebe. Jesu o tlaleleditše ka gore: “Yona meriri ye ya dihlogo tša lena e badilwe ka moka.” (Mateo 10:29-31) Ge e ba Jehofa a kgona go lemoga gore thaga e tee ga e gona ka sehlageng sa yona, o swanetše go ba a kgona go lemoga le go hlokomela morapedi yo mongwe le yo mongwe wa gagwe. Ge moriri o mongwe le o mongwe wa dihlogo tša rena o badilwe e bile o lemogwa ke Jehofa, na go na le dilo tše dingwe maphelong a rena—dinyakwa tša rena, mathata a rena le matshwenyego a rena—tšeo a ka se di tsebego?

Tate wa legodimong Ka ge re bone sehlogong se se fetilego, Jesu ke Morwa yo a tswetšwego a nnoši wa Modimo. Ga go makatše ge Morwa yo yo a ratwago wa Modimo gantši a be a bitša Jehofa le go bolela ka Yena gore ke “Tate.” Ge e le gabotse, mantšung a mathomo a Jesu ao  a begilwego, ao a a boletšego ka tempeleng ge a be a e-na le nywaga e 12 feela, o ile a bitša Jehofa gore ke “Tate.” (Luka 2:49) Lentšu “Tate” le tšwelela ga 190 ka Diebangeding. Jesu o ile a bolela ka Jehofa ka ditsela tše fapa-fapanego e le “Tatago lena,” “Tatago rena,” le “Tate.” (Mateo 5:16; 6:9; 7:21) Ka go diriša lentšu le ka bolokologi, Jesu o be a bontšha gore batho bao ba nago le sebe le ba sa phethagalago ba ka kgona go ba le tswalano e borutho le e tiilego le Jehofa.

O a gaugela e bile o ikemišeditše go lebalela Jesu o be a tseba gore batho ba sa phethagalago ba nyaka kgaugelo e ntši ya Jehofa. Papišong ya gagwe ya morwa wa lehlaswa, Jesu o ile a swantšha Jehofa le tate yo lerato le yo a lebalelago, yo a bulago diatla tša gagwe bakeng sa go amogela morwa wa gagwe yo a itsholago. (Luka 15:11-32) Ka gona, mantšu a Jesu a re kgonthišetša gore Jehofa o šetša phetogo le ge e le efe ya pelo bathong ba sebe e lego seo se beago motheo wa gore A ba gaugele. Jehofa o fagahletše go lebalela modiradibe yo a itsholago. Jesu o hlalositše gore: “Ke le botša gore go tla ba le lethabo le legolo legodimong ka baka la modiradibe o tee yo a itsholago go feta ba lokilego ba masome-senyane-senyane bao go sa nyakegego gore ba itshole.” (Luka 15:7) Ke mang yo a ka se kego a gogelwa go Modimo yo bjalo wa kgaugelo?

Mokwi wa dithapelo Ge Jesu a be a le magodimong pele a e-tla lefaseng, o ile a bona ka boyena gore Jehofa ke “Mokwi wa dithapêlô” le gore O kgahlwa ke dithapelo tša barapedi ba gagwe ba botegago. (Psalme 65:2) Ka baka leo, nakong ya bodiredi bja gagwe, Jesu o ilego a ruta balatedi ba gagwe go rapela le seo ba swanetšego go se rapelela. O eleditše ka gore: “O se ke wa boa-boetša dilo tše di swanago.” O kgothaleditše batheetši ba gagwe go rapelela gore thato ya Modimo e “direge le mo lefaseng bjalo ka ge e direga legodimong.” Le gona, re ka rapelela dijo tša letšatši, go lebalelwa dibe tša rena le go fenya teko. (Mateo 6:5-13) Jesu o rutile gore Jehofa o araba dithapelo tša bahlanka ba Gagwe bjalo ka tate, a araba dikgopelo tša bona tšeo di tšwago pelong tšeo ba di dirilego ka tumelo.—Mateo 7:7-11.

Therešo ke gore Jesu o be a fišegela go ruta therešo mabapi le Jehofa le gore ke Modimo wa mohuta mang. Eupša go na le selo se sengwe gape ka Jehofa seo Jesu a bego a fagahlela go se botša ba bangwe—selo seo Jehofa a tlago go se diriša go tliša diphetogo lefaseng ka moka e le go phethagatša morero wa Gagwe ka lefase le batho ba dulago go lona. Ge e le gabotse, karolo ye ya molaetša wa Jesu e be e le sehlogo sa boboledi bja gagwe.

[Mongwalo wa tlase]