Dahme Sises Ketin Padahngki Duwen Koht

“Sohte emen ese duwen Sahm, pwe Sapwellimen Kohtohte, oh irail kan me Sapwellimen Kohto ketin kupwurki en kasalehiong.”​—LUK 10:22.

MWOHN e ketin wia aramasala, sapwellimen Koht Meseniho kin karanihala Semeo erein ahnsou reirei ehu me e kin patopato reh. (Kolose 1:15) Sapwellime Ohlo mwahngihala mehlel duwen madamadau, pepehm oh pil wiewia kan en Semeo. Mwurin sapwellimeo ketidihdo sampah nin duwen aramas men iei Sises, e kin ketin ngoangki padahngki dahme mehlel me pid duwen Semeo. Kitail kak sukuhlki soahng tohto duwen Koht ni atail pahn kin rong dahme Sises kin mahsanih.

Mwaren Koht: Mwar sarawio, Siohwa, iei me keieu kesempwal ong Sises. Sapwellime Ohl kompoak menet kupwurki meteikan en ese oh pil doadoahngki mwaren Semeo. Mwaren Sises kin wehwehki “Siohwa iei Sounkomour.” Pwohng me pahn manda ih pwoula, Sises mahsanih nan sapwellime loulou ong Siohwa: “Ngehi me kahrehiong irail en ese mwaromwi.” (Sohn 17:26, NW) E sohte kapwuriamwei Sises eh kin ketin doadoahngki mwaren Koht oh pil kin kasalehiong meteikan. Eri, ia duwen irail me kin rongorong Sises ar kak wehwehki dahme mehlel me pid duwen Siohwa ma re sohte ese mwaren Koht oh wehwe. *

Sapwellimen Koht limpoak laud: Ehu ahnsowo, Sises mahsanih nan sapwellime loulou ong Koht: “Maing Semei! Komw . . . ketin loalloale ie mwohn sampah wet eh saikinte kepikipikda.” (Sohn 17:24) Pwehki Koht kin ketin kasalehiong Sises limpoak nanleng, met kin kahrehda Sises eh kin ketin kasalehda limpoak ni soangen ahl kaselel tohto ni eh ketiket sampah.

Sises patohwan kasalehda me Siohwa kin ketin limpoak ong me tohto. Sises mahsanih: “Pwe iei uwen Koht eh ketin loalloale sampah, me e ketikihdohki Sapwellime Iehros, pwe mehmen me kin pwosonla ih en dehr salongala, a en ahneki mour soutuk.” (Sohn 3:16) Lepin lokaiahn Krihk me kawehwe “sampah” sohte wehwehki “weren sampah.” Wasaht kin wehwehki aramas koaros. Sapwellimen Koht limpoak ong aramas me inenen laud me kahrehda e ketikihdo sapwellime Ohl kesempwal pwe koaros me pwoson ih en saledeksang dihp oh mehla oh en ahneki koapworopwor en mour soutuk. Kitail sohte kak sohngedi uwen tehlap de pil wehwehki uwen loal en sapwellime limpoak.​—Rom 8:38, 39.

Sises ketin kadehdehda ire mehlel me Siohwa sapwellimanki limpoak loal ong emenemen me kin kaudokiong ih. Sises ketin padahngki me Siohwa rasehng silepen sihpw men oh emenemen sihpw pwukat wekpeseng oh pil kesempwal. (Madiu 18:12-14) Sises mahsanih me sohte kisin menpihr kis kak pwupwudiong nan pwehl Siohwa ahpw sohte mwahngih. Sises pil mahsanih: “Pitenmoangamwail koaros iangehr wadawadedi.” (Madiu 10:29-31) Ma Siohwa ketin kak ese me kisin menpihr kis pwupwusang nan eh pahso, e sou pahn pil ketin tehk laud emenemen sapwellime tohnkaudok? Ma Siohwa ketin wadekedier ehuehu pitenmoangatail kan, eri ia duwe, e sohte pahn mwahngih oaritik en atail mour me duwehte atail anahn akan, atail kahpwal akan oh atail iren kapwunod akan?

Samatail nanleng: Nin duwen atail kilangehr nan iren mwoweo, Sises iei sapwellimen Koht Iehros. Ihme kahrehda, sapwellime Ohl kompoak menet kin kalapw ekerki oh mahsanihki Siohwa ‘Sahm.’ Tepin sapwellimen Sises mahsen  me ntingdi me e mahsanih nan Tehnpas Sarawio ni eh sounpar 12, e ketin ekerki Siohwa “Semei.” (Luk 2:49) Lepin mahsen wet ‘Sahm’ pwarada kereniong pak 190 nan pwuhken Rongamwahu ako. Sises kin ketin kahdaneki Siohwa “Samamwail,” “Samat,” oh “Semei.” (Madiu 5:16; 6:9; 7:21) Ni en Sises kin ketin doadoahngki ahd pwukat, e kin ketin kasalehda me aramas dipan oh soh unsek kan kak ahneki nanpwungmwahu keren oh likilik rehn Siohwa.

Siohwa kupwurki mahk: Sises mwahngih me aramas soh unsek kan anahne sapwellimen Siohwa mahk. Nan sapwellimen Sises karasaras en pwutak me salongalao, e karasahiong Siohwa duwehte Sahm limpoak men me kin kasalehda mahk ong nah pwutak me koluhla. (Luk 15:11-32) Sapwellimen Sises mahsen pwukat kin kadehde ong kitail me Siohwa kin ketin kasakasawih ma mie wekila nan mohngiong en aramas dipan emen pwe en kak ketin kasalehda mahk ong ih. Siohwa kin kupwurki mahkohng me dipan emen me koluhla. Sises mahsanih: “Eri, kumwail en ese pwe ih duwen me pahn wiawi nanleng, nanleng pahn perenkihda koluhla oh wiliakapwalahn me dipan emen laudsang aramas keniken duwehk duwemen me sohte anahne koluhla.” (Luk 15:7) Ihs me sohte pahn men karanih soangen Koht menet me diren mahk?

Sounkaronge kapakap kan: Mwohn Sises eh ketidihdo nin sampah, pein ih mwahngih me Siohwa “kin ketin sapeng pekipek kan” oh e kin kupwurki kapakap en irail sapwellime tohnkaudok lelepek kan. (Melkahka 65:2) Ihme kahrehda Sises ketin padahkihong irail me kin karonge ih duwen arail pahn kin kapakap oh dahme re pahn kapakapki ni ahnsou me e kin ketin wia sapwellime doadoahk en kalohk. E mahsanih: “Dehr kin pwurepwurehng nda soangen lokaiaohte.” E kin ketin kangoange irail kan me kin rongorong ih en kapakapki kupwuren Koht “en kin wiawi nin sampah duwen eh kin wiawi nanleng.” Kitail pil kak kapakapki atail anahn en ehuehu rahn, mahkpen dipatail kan oh kitail en kak powehdi songosong kan. (Madiu 6:5-13, NW) Sises ketin padahngki me ni elen limpoak, Siohwa kin ketin sapeng kapakap mehlel en Sapwellime ladu kan me poahsoankihda pwoson.​—Madiu 7:7-11.

Sises kin ketin padahngki me mehlel duwen Siohwa oh soangen Koht dahmen ih. Ahpw pil mie mehkot me pid duwen Siohwa me Sises kupwurki kasalehda. Met iei sapwellimen Siohwa koasoandi me pahn wekidala sampah pwon pwehn kapwaiada kupwuren Koht ong sampah oh aramas akan. Ni mehlel, ire wet iei oaralap en sapwellimen Sises doadoahk en kalohk.

[Nting tikitik me mi pah]