Diosmanta Jesuspa yachachisqankuna

“Manataqmi Taytaytaqa pipas reqsinchu aswanqa ñoqa Churillanmi, Churipa reqsichisqallantaqmi reqsin Taytataqa.” (LUCAS 10:22.)

MANARAQ kay Pachaman hamuchkaspanmi, Jesucristoqa hanaq pachapi una-unay tiempo Taytanwan kawsarqa (Colosenses 1:15). Chay tiempopim Taytanta allintapuni reqsiykurqa: piensasqanta hinaspa imayna kasqantapas. Chayraykuchá kay Pachaman hamuspan kallpanchakurqa Taytanta reqsichinanpaq. Ñoqanchikpas Diostaqa allintam reqsichwan Jesuspa yachachisqankunamanta yachaspa.

Diospa sutin. Jesusqa anchatam munarqa Diospa sutin Jehová kasqanta runakuna yachaspa rimanankuta. Jesuspa sutinpas, “Jehová Diosmi salvaq” ninanmi. Chaymi wañukunan tutapi Taytanta mañakuspan nirqa: “Yachachirqanim pim kasqaykita [otaq sutikita]”, nispa (Juan 17:26). Arí, Jesusqa Diospa sutintam rimarqa hinaspa uyariqninkunamanpas yachachirqam. ¿Imaynatamá uyariqninkunaqa Diosmanta yachanmanku karqa sutinta hinaspa ima ninantapas mana yachachkaspankuqa? *

Ancha kuyakuynin. Huk kutipim Jesusqa Diosman orakuspan nirqa: “Taytáy, [. . .] manaraqpas kay pacha unanchasqa kachkaptinmi qamqa kuyawarqanki”, nispa (Juan 17:24). Jesusqa yacharqam Diospa kuyakuynin imayna kasqanta, chaymi kay Pachaman hamuspan tukuyta rurarqa chay kuyakuyninta runakuna chaninchanankupaq.

Yachachirqam, Jehová Dios lliw runakunata kuyasqanta. Nirqam: “Diosqa ancha-anchatam kuyarqa runakunata, chaymi sapallan Churinta qomurqa pipas paypi iñiqqa manaña puchukaspa wiñaypaqña kawsananpaq”, nispa (Juan 3:16). Arí, runakunata anchata kuyasqanraykum, kuyasqan Churinta qomurqa wañunanpaq. Chaynata ruraspallanmi wañuymantawan huchamanta serviqninkunata librayta atinman karqa, chaynapi wiñay kawsayniyoq kanankupaq. Mayna kuyawasqanchiktaqa manamá entiendeyta atichwanchu (Romanos 8:38, 39).

Jesusqa yachachirqataqmi, Jehová Diosqa serviqninkunata sapakamata kuyasqanta. Jesusqa Taytantam tupachirqa, sapakama ovejanta kuyaq michiqwan (Mateo 18:12-14). Nirqam huk pichinchurruchapas Dios mana yachaptinqa mana wañusqanta. Nirqataqmi ‘chukchanchikpas llapallan yupasqa kasqanta’ (Mateo 10:29-31). Hinaptinqa, sichu huk pichinchurruchata Dios mana qonqaspanqa, ¿imaynatamá qonqarunman mayqan serviqnintapas? Llapallan chukchanchiktapas yupaspanqa, ¿imaynatamá mana yachanqachu imam necesitasqanchikta hinaspa llakinchikkunatapas?

Hanaq Pachapi Taytanchik. Yachamusqanchikman hinam, Jesusqa Diospa sapallan Churin. Chaymi yaqa llapallanpi Diosmanta rimaspan “Taytay” nispa nirqa. Bibliapi Jesuspa rimasqan chayllaraq rikurisqanpipas (12 watachanpi Templopi kaspan), Taytanmanta rimaspanmi nirqa “Taytaypa”  nispa (Lucas 2:49). Jehová Diosmanta Jesus kayna rimasqanqa Bibliapiqa yaqa 190 kutitam rikurin. Yaqa sapa kutitaqmi rimarqa “Taytaykichikta”, “Taytayku” hinaspa “Taytaypa” nispa (Mateo 5:16; 6:9; 7:21). Chaynatam qawachirqa huchayoq runakunapas Jehová Dioswan allin amistad kay atisqankuta.

Llakipayakuq hinaspa pampachakuq. Jesusqa yacharqam huchayoq kasqanchikrayku Diospa llakipayakuyninta necesitasqanchikta. Chaymi Bibliaqa Diosta rikchanachin wanakuq churinta llakipayaspan kusisqallaña chaskiykuq taytawan (Lucas 15:11-32). Arí, Jehová Diosqa imallapipas wanakusqanchikta qawaspanmi pampachaykuwanchik. ¿Imanasqa? Wanakuq runata sonqomantapuni pampachaykuyta munasqanrayku. Jesusmi nirqa: “Chaynam kanqa hanaq pachapipas, isqon chunka isqonniyoq mana wanakuq justokunamantapas mastaqa kusikunqaku huchankunamanta wanakuqmantam”, nispa (Lucas 15:7). ¿Manachu kuyawaq chayna llakipayakuq Diosta?

Mañakuyninchiktam uyarin. Jehová Diosqa serviqninkuna mañakunankutam munan, payqa ‘pipapas mañakusqantam uyarin’, chaytam Jesusqa hanaq pachapi kachkaspan yacharqa (Salmo 65:2). Chaymi kay Pachapi kaspan qatiqninkunata yachachirqa mañakunankupaq. Nirqam: ‘Amam nisqallaykita kutirispa-kutirispa rimankichu’, nispa. Nirqataqmi kaykunatapas mañakunankupaq: hanaq pachapi hinaspa kay pachapipas munaynin rurakunanpaq, sapa punchaw necesitasqankuta qonanpaq, huchankuta pampachananpaq hinaspa pruebakunamanta librananpaqpas (Mateo 6:5-13). Jesusqa sutillatam qawachirqa Jehová Dios kuyakuq kasqanta hinaspa serviqninkunapa mañakusqankuta uyarisqantapas (Mateo 7:7-11).

Hinaptinqa, Jesusqa allintapunim yachachirqa Jehová Dios pim kasqanta hinaspa imayna kasqantapas. Ichaqa manam chayllatachu yachachirqa; yachachirqataqmi kay Pachapi lliw sasachakuykunata imawan Dios allichananmantapas. Kaymantam Jesusqa astawan rimarqa predicaspan.

[Willakuy]