O Mea na Aʻoaʻo e Iesu e Uiga i le Atua

“E leai se tasi ua iloa lelei le Tamā e na o le Atalii. Ae e manaʻo le Atalii e taʻu atu i isi mea e uiga i le Tamā, ina ia iloa ai foʻi e i latou o ia.”—LUKA 10:22, CONTEMPORARY ENGLISH VERSION.

I LONA soifuaga a o leʻi avea ma tagata, e umi lava se taimi na mafuta vavalalata ai le Atalii ulumatua o le Atua ma lona Tamā. (Kolose 1:15) O lea na oo ai ina iloa lelei e le Atalii manatu, faalogona, ma ala o lona Tamā. Mulimuli ane, ina ua sau lenei Atalii, o Iesu, i le lalolagi o se tagata, na matuā naunau o ia e aʻoaʻo atu le upu moni e uiga i lona Tamā. E mafai ona tatou iloa le tele o mea e uiga i le Atua, i le faalogo atu i mea o fai mai ai lona Alo.

Suafa o le Atua Na matuā tāua iā Iesu le suafa o le Atua, o Ieova. Sa manaʻo lenei Alo pele ia iloa e isi ma faaaogā le suafa o lona Tamā. O le uiga o le igoa o Iesu, “O Ieova o le Faaolataga.” I le pō a o leʻi maliu o ia, na faapea atu Iesu iā Ieova i le tatalo: “Ua ou faailoa atu lou suafa.” (Ioane 17:26) E lē o se mea e ofo ai le faaaogā e Iesu o le suafa o le Atua, ma faailoa atu i isi. Auā foʻi, e faapefea ona malamalama le ʻaufaalogologo a Iesu i le upu moni e uiga iā Ieova, e aunoa ma le iloa o Lona suafa ma lona uiga? *

Le alofa silisili o le Atua Na faapea atu Iesu i le Atua i le tatalo: “Loʻu Tamā e, . . . ua e alofa mai iā te aʻu a o leʻi faavaeina le lalolagi.” (Ioane 17:24) Talu ai na tofo o ia i le alofa o le Atua i le lagi, na taumafai ai Iesu e faailoa atu lenā alofa i ona vala matalasi, a o iai i le lalolagi.

Na faaalia e Iesu e matuā tele le alofa o Ieova. Na taʻua e Iesu: “O le alofa tele o le Atua i le lalolagi, na ia foaʻi mai ai lona Atalii e toʻatasi, ina ia lē fano tagata uma e faatuatua iā te ia, a ia maua le ola e faavavau.” (Ioane 3:16) O le upu Eleni ua faaliliuina i le “lalolagi,” e lē uiga atu i le “laueleele.” I lenei mau, o loo faasino atu i tagata, o le fanau uma lava a tagata. Ona o le tele o le alofa o le Atua i tagata, na ia foaʻi mai ai lona Alo e sili ona pele, ina ia faasaʻoloto ai tagata faamaoni mai i āuga o le agasala ma le oti, ma maua ai le faamoemoe o le ola e faavavau. E lē mafai ona tatou fuaina le lautele ma le loloto o lenā alofa silisili.—Roma 8:38, 39.

Na faamautinoa mai e Iesu se upu moni faamāfanafanaloto: E matuā alofa Ieova i ona tagata tapuaʻi taʻitoʻatasi. Na aʻoaʻo e Iesu, e pei Ieova o se leoleo mamoe e pele ma tāua iā te ia ana mamoe taʻitoʻatasi. (Mataio 18:12-14) Na fetalai Iesu e lē paʻū se tamaʻi manulele i le eleele e aunoa ma le silafiaina e Ieova. Na toe faapea mai Iesu: “E oo foʻi i o outou lauulu, ua faitaulia uma.” (Mataio 10:29-31) Pe afai e mafai ona mātauina e Ieova se tamaʻi manulele ua lē iai i lona ofaga, pe e lē sili ea la ona mātau e Ieova ma manatu mamafa mai i ona tagata tapuaʻi uma? Pe afai e mafai e Ieova ona faitaulia ma mātauina lauulu taʻitasi i o tatou ulu, pe e iai ea la ni vala o o tatou olaga e na te lē o silafiaina, e pei o mea e tatou te manaʻomia, o mea o tatou pagatia ai, ma o tatou popolega?

Tamā i le lagi E pei ona tatou iloa mai i le mataupu ua mavae, o Iesu o le Alo e toʻatasi o le Atua. E masani ona taʻua e lenei Alo pele Ieova, ma talanoa e uiga iā te ia, o lona  “Tamā.” I uluaʻi upu a Iesu na faamauina, lea na ia fetalai ai a o i le malumalu ina ua na o le 12 ona tausaga, na ia taʻua ai Ieova o “loʻu Tamā.” (Luka 2:49) E toetoe lava 190 taimi o loo taʻua ai le upu “Tamā” i tusi o Evagelia. E eseese auala na fetalai ai Iesu e uiga iā Ieova, e faapea o “lo outou Tamā,” “lo matou Tamā,” ma “loʻu Tamā.” (Mataio 5:16; 6:9; 7:21) E ala i le faaaogā soo o lenei taʻu, ua faaalia ai e Iesu, e mafai ona maua e tagata agasala ma lē lelei atoatoa, se faiā māfana ma maufaatuatuaina ma Ieova.

Alofa mutimutivale ma nofosauni e faamagalo Na silafia e Iesu e manaʻomia e tagata lē lelei atoatoa le tele o le alofa mutimutivale o Ieova. I lana talafaatusa i le atalii faamaʻimau ʻoa, na faatusatusa ai e Iesu Ieova i se tamā e alofa mutimutivale ma lotofaamagalo, o lē e toe talia ma le fiafia se atalii ua salamō. (Luka 15:11-32) Ua faamautinoa mai ai iā i tatou i upu a Iesu, o loo saʻili Ieova mo ni suiga i le loto o se tagata agasala, ina ia mafai ai ona Ia faaalia i ai le alofa mutimutivale. E finagalo Ieova e faamagalo se tagata agasala ua salamō. Na fetalai Iesu e faapea: “O lea, ou te fai atu iā te outou, e sili atu ona olioli le lagi ona o le tagata agasala e toʻatasi ua salamō, nai lo o tagata amiotonu e toʻaiva sefulu iva e lē tatau i ai le salamō.” (Luka 15:7) O ai sē e lē fia faalatalata atu i se Atua alofa mutimutivale faapena?

Le faafofoga tatalo I le lagi a o leʻi afio mai i le lalolagi, na iloatino ai e Iesu o Ieova o le “Faafofoga tatalo,” ma e matuā fiafia o Ia i tatalo a ona tagata tapuaʻi faamaoni. (Salamo 65:2) O lea, i le taimi o lana faiva, na aʻoaʻo ai e Iesu lana ʻaufaalogologo i le auala e fai ai tatalo ma mea e tatalo atu ai. Na ia fautua mai: “Aua le tautū i upu masani.” Na ia uunaʻia lana ʻaufaalogologo ia tatalo ina ia faia le finagalo o le Atua “i le lalolagi, e pei ona faia i le lagi.” E mafai foʻi ona tatou tatalo mo meaʻai o le aso, ia faamagalo a tatou agasala, ma ia lē lolo atu i faaosoosoga. (Mataio 6:5-13) Na aʻoaʻo e Iesu, e faafofoga mai Ieova e pei o se tamā i tatalo a Ana auauna, ma tali mai i a latou talosaga faamaoni e faia i le faatuatua.—Mataio 7:7-11.

Ioe, na manaʻo Iesu e aʻoaʻo atu le upu moni e uiga iā Ieova ma le Atua e iai o ia. Ae e iai se isi mea e uiga iā Ieova na naunau Iesu e faailoa mai, o le auala o le a faia ai e Ieova suiga i le lalolagi atoa, ina ia faataunuu ai Lona finagalo mo lenei lalolagi ma tagata. O le mea moni, o lenei vala o le feʻau a Iesu, o le matua lea o lana talaʻiga.

[Faamatalaga pito i lalo]