Loko Jesu Lakufundzisa NgaNkulunkulu

“Loyo lokunguye yedvwa lomati sibili Babe yiNdvodzana. Kepha iNdvodzana ifuna kutjela labanye ngaBabe, kute nabo bamati.”—LUKHA 10:22, CONTEMPORARY ENGLISH VERSION.

ISENGAKABI ngumuntfu emhlabeni, iNdvodzana yaNkulunkulu lelitubulo yaphila iminyaka leminyenti isedvute neYise. (Kholose 1:15) Ngako-ke, iNdvodzana yayiyati kahle imicabango yeYise, indlela lativa ngayo, kanye netindlela takhe. Ngemuva kwekutsi leNdvodzana seyite lapha emhlabeni isemtimbeni wenyama, yaba nelilukuluku lekufundzisa liciniso ngeYise. Kunyenti lesingakufundza ngaNkulunkulu ngekulalela loko lokushiwo nguleNdvodzana.

Libito LaNkulunkulu Libito laNkulunkulu lelitsi Jehova, belibaluleke kakhulu kuJesu. LeNdvodzana yaNkulunkulu letsandzekako beyifuna kutsi nalabanye balati futsi balisebentise libito leYise. Nelibito laJesu imbala lisho kutsi “Jehova uyinsindziso.” Ngebusuku bangembi kwekufa kwakhe, Jesu wathandaza watsi kuJehova: “Ngibatisile libito lakho.” (Johane 17:26) Akumangalisi-ke kutsi Jesu wasebentisa libito laNkulunkulu futsi wenta nalabanye balati. Bantfu bebangalati njani vele liciniso ngaJehova ngaphandle kwekutsi bati libito lakhe kanye naloko lokushiwo ngilo? a

Lutsandvo LwaNkulunkulu Lolukhulu Ngalelinye lilanga Jesu wathandaza kuNkulunkulu watsi: “Babe, . . . wangitsandza, umhlaba ungakasekelwa.” (Johane 17:24) Ngesizatfu sekutsi Jesu abelwati lutsandvo lwaNkulunkulu asesezulwini, watsi nakefika lapha emhlabeni walukhombisa ngetindlela letinyenti.

Jesu wakhombisa kutsi lutsandvo lwaJehova lukhulu. Naku Jesu lakusho: “Nkulunkulu walitsandza live kakhulu kangangekutsi wadzimate wanikela ngeNdvodzana yakhe lekukuphela kwayo, kuze kutsi nome ngubani lokholwa ngiyo angabhubhi, kodvwa abe nekuphila lokuphakadze.” (Johane 3:16) Ligama lesiGriki lelitsi “live” alisho “umhlaba” lowadalwa nguNkulunkulu, kodvwa lisho bantfu labaphila kulomhlaba. Lutsandvo lwaNkulunkulu ngebantfu lukhulu kangangekutsi wanikela ngeNdvodzana yakhe leligugu kuye kute kutsi bantfu labetsembekile bakhululeke esonweni nasekufeni futsi batfole litfuba lekuphila phakadze. Angeke sikwati kubona budze, bubanti kanye nekushona kwalolutsandvo lolungaka.—Roma 8:38, 39.

Jesu wenta bantfu baciniseka nganali liciniso: Jehova utitsandza kakhulu tikhonti takhe njengemuntfu nemuntfu. Jesu wafundzisa kutsi Jehova ufanana nemelusi lotsandza timvu takhe futsi lotitsatsa njengaleto letiligugu kuye. (Matewu 18:12-14) Jesu watsi kute ngisho namunye ncedze longawela phansi Jehova angamboni. Ngemuva kwekusho loko wase utsi: “Kodvwa kini kubalwe ngisho netinwele tonkhe tenhloko yenu.” (Matewu 10:29-31) Nangabe-ke Jehova akwati kubona ncedze munye kutsi ulahlekile, kuyintfo lefanele-ke kutsi anake futsi alondvolote tikhonti takhe ngatinye. Nangabe lunwele nelunwele etinhloko tetfu lubaliwe futsi Jehova alwati, kufanele kutsi kute ngisho nalokuncane ngekuphila kwetfu—tidzingo tetfu, kuhlupheka kwetfu, nalokusikhatsatako—Jehova langeke akwati.

Babe Losezulwini Njengobe sifundzile esehlukweni lesengcile, Jesu yiNdvodzana yaNkulunkulu letelwe yodvwa. Akumangalisi kutsi leNdvodzana letsandzekako, kanyenti beyibita Jehova  ngekutsi “Babe.” Ecinisweni, emavini akhe ekucala lawakhuluma ethempelini ngalesikhatsi aneminyaka lengu-12 budzala, Jesu wabita Jehova ngekutsi “Babe.” (Lukha 2:49) Leligama lelitsi “Babe” livela tikhatsi leticishe tibe ngu-190 emaVangelini lamane eliBhayibheli. Jesu wabita Jehova ngetindlela letehlukahlukene njengekutsi “nguYise,” “Babe wetfu,” nangekutsi ‘Babe.’ (Matewu 5:16; 6:9; 7:21) Ngekusebentisa letindlela ngekukhululeka nakabita Jehova, Jesu wakhombisa kutsi singaba nebungani naJehova nanobe sibantfu labanesono.

Unemusa futsi uyatsetselela Jesu bekati kutsi bantfu labanesono badzinga umusa lomkhulu waJehova. Emfanekisweni wakhe wendvodzana yelulahleko, Jesu wafananisa Jehova nababe lonesihawu, lotsetselelako, nalowemukela indvodzana lephendvukako ngetandla letivulekile. (Lukha 15:11-32) Emavi aJesu asenta sikholwe kutsi Jehova ubuka umuntfu nemuntfu lophendvukako kute amentele umusa. Jehova uhlala akulungele kutsetselela soni lesiphendvukako. Nankha emavi lashiwo nguJesu mayelana naloko: “Ngalokufananako, ngitsi kini: Kuyawuba khona kutfokota lokukhulu ezulwini ngesoni sinye lesiphendvukako kunebantfu labalungile labangema-99 labangakudzingi kuphendvuka.” (Lukha 15:7) Ngubani longeke afune kutisondzeta kuNkulunkulu lonemusa njengalona?

Uva imithandazo Ngembikwekuba ete emhlabeni, Jesu watibonela ngewakhe kutsi Jehova “uva imithandazo” futsi imithandazo yetikhonti takhe letetsembekile iyamjabulisa. (Tihlabelelo 65:2) Ngalesikhatsi ashumayela lapha emhlabeni, Jesu wafundzisa labo labebamlalele indlela yekuthandaza naloko lokufanele bakuthandazele. Wabayala: “Ningaphindzaphindzi tintfo letifananako.” Jesu wakhutsata tilaleli takhe kutsi tithandazele kutsi intsandvo yaNkulunkulu ‘yentiwe emhlabeni, njengobe yentiwa ezulwini.’ Singaphindze sithandazele kutsi asiphe kudla kwamalanga onkhe, asitsetselele tono tetfu futsi angasingenisi ekulingweni. (Matewu 6:5-13) Jesu wafundzisa kutsi Jehova ulalela imithandazo yetinceku takhe njengababe lonelutsandvo futsi aphendvule neticelo tato leticotfo letikhombisa kukholwa.—Matewu 7:7-11.

Jesu abefundzisa emaciniso ngaJehova nekutsi uluhlobo lolunjani lwaNkulunkulu. Kodvwa kunalokunye Jesu labefuna kukufundzisa ngaJehova—indlela latayisebentisa kute alungise umhlaba futsi kufezeke injongo yakhe ngawo nangebantfu labahlala kuwo. Ecinisweni, lencenye yemlayeto waJesu bewusihloko sekushumayela kwakhe.

[Umbhalo longentasi]