Saida mak Jesus hanorin kona-ba Maromak?

“Ema ida la hatene sé mak Aman, Oan deʼit mak hatene, no ida neʼebé Oan hakarak fó-hatene ba nia.”—LUCAS 10:22.

ANTES Maromak nia Oan-Boot mai toʼo mundu, nia hamutuk ho ninia Aman durante tempu barak. (Koloso 1:15) Nuneʼe, Oan hatene kona-ba ninia Aman nia hanoin, sentimentu, no hahalok sira. Kuandu Oan neʼe mai toʼo mundu nuʼudar ema, nia laran-manas atu hanorin lia-loos kona-ba ninia Aman. Ita bele aprende buat barak kona-ba Aman hodi rona buat neʼebé Oan neʼe hanorin.

Maromak nia naran Ba Jesus, Maromak nia naran, Jeová, importante tebes. Oan doben neʼe hakarak ema seluk atu hatene no temi ninia Aman nia naran. Jesus nia naran iha arti, naran Jesus katak “Jeová mak Salvasaun”. Iha kalan antes nia mate, Jesus harohan ba nia Aman Jeová hodi hatete: “Haʼu fó-hatene tiha ba sira Ita-nia naran.” (Joao 17:26) Sin, Jesus temi Maromak nia naran no nia mós fó-hatene naran neʼe ba ema seluk. Hodi hatene Maromak nia naran, no naran neʼe katak sá, mak ema bele komprende lia-loos kona-ba Maromak Jeová. *

Maromak nia domin boot Loron ida kuandu Jesus halo orasaun ba Maromak, nia hatete: “Aman, . . . Ita hadomi haʼu molok mundu hahú.” (Joao 17:24) Kuandu Jesus sei iha lalehan nia haree oinsá Maromak hatudu nia domin, tan neʼe kuandu Jesus iha rai nia fó sai no hatudu dalan oioin kona-ba Maromak nia domin.

Jesus hatudu katak Maromak Jeová nia domin mak boot tebetebes. Jesus hatete: “Maromak hadomi tebes mundu toʼo fó Nia Oan-Mane mesak, atu ema hotu neʼebé fiar iha nia la bele lakon, maibé hetan moris rohan-laek.” (Joao 3:16) Iha eskritura neʼe, liafuan “mundu” neʼebé tradús husi lia-gregu laʼós katak “rai”, maibé katak ema hotu neʼebé moris iha rai. Tanba Maromak nia domin boot ba ema, nia fó ninia Oan neʼebé nia hadomi liu atu ema neʼebé fiar ba nia bele sai livre husi sala no mate no iha esperansa atu moris ba nafatin. Tuir loloos, ita la bele sukat Maromak nia domin.—Roma 8:38, 39.

Jesus hatete lia-loos ida neʼebé halo ita sente kmaan: Maromak Jeová hadomi tebes ema ida-idak neʼebé adora nia. Jesus hanorin katak Maromak Jeová hanesan bibi-atan neʼebé hatene no hafolin ninia bibi ida-idak. (Mateus 18:12-14) Jesus hatete katak Maromak Jeová hatene kuandu manu-oan ida monu ba rai. Jesus hatutan tan: “Imi-nia fuuk iha ulun mós sura hotu.” (Mateus 10:29-31) Se Maromak Jeová hatene kuandu manu-oan ida lakon husi knuuk, ita mós bele fiar katak Maromak haree no tau matan liután ba ema ida-idak neʼebé adora nia. Se Maromak Jeová hatene no bele sura ita-nia fuuk lahan ida-idak, iha ka lae, buat ruma neʼebé nia la bele hatene kona-ba ita-nia moris, ita-nia presiza, ita-nia terus, no laran-susar?

Aman iha lalehan Hanesan ita lee tiha ona, Jesus mak Maromak nia Oan-Mane mesak. Tan neʼe, kuandu nia koʼalia ba Maromak Jeová liuhusi orasaun, nia bolu Maromak nuʼudar ninia “Aman”. Tuir loloos, iha Jesus nia liafuan primeiru neʼebé hakerek iha Bíblia, neʼebé nia hatoʼo iha templu kuandu nia tinan 12, nia koʼalia kona-ba Maromak Jeová nuʼudar “haʼu Aman”. (Lucas 2:49) Liafuan  “Aman” mosu besik dala 190 iha Evanjellu sira. Jesus koʼalia dala barak kona-ba Maromak Jeová nuʼudar “imi-nia Aman”, “ami Aman”, no “haʼu Aman”. (Mateus 5:16; 6:9; 7:21) Hodi uza beibeik liafuan Aman, Jesus hatudu katak ema sala-naʼin bele iha relasaun diʼak no besik ba Aman Jeová.

Laran-luak no prontu atu perdua Jesus hatene katak ema sala-naʼin presiza Maromak Jeová nia laran-luak. Iha Jesus nia ai-knanoik kona-ba oan neʼebé husik hela uma, nia kompara Maromak Jeová nuʼudar Aman ida neʼebé laran-diʼak, no fó perdua hodi simu fali ho liman rua ninia oan neʼebé arrepende an. (Lucas 15:11-32) Jesus nia ai-knanoik neʼe ajuda ita atu fiar katak kuandu ema halo sala, Maromak Jeová haree ba ema neʼe nia laran atu buka-hatene se ema neʼe hakribi nia sala ka lae. Nia halo nuneʼe tanba nia hakarak duni fó perdua ba ema neʼe. Sin, Aman Jeová hakarak duni atu fó perdua ba sala-naʼin sira-neʼebé arrepende an. Jesus hatete: “Haʼu dehan ba imi katak iha lalehan sei haksolok tanba ema maksalak ida neʼebé hakribi nia sala, liu fali ema diʼak sianulu-resin-sia neʼebé la kuran atu hakribi sala.” (Lucas 15:7) Ita sente besik duni ba Maromak neʼebé hatudu laran-luak hanesan neʼe, loos ka lae?

Maromak rona orasaun Antes Jesus mai toʼo rai, nia haree ho matan rasik katak Maromak Jeová kontente atu “rona” orasaun husi ema neʼebé adora nia ho laran-metin. (Salmo 65:2; 1 Joao 5:14) Nuneʼe, kuandu Jesus halaʼo ninia serbisu haklaken, nia hanorin ema oinsá atu halo orasaun no atu husu kona-ba saida. Nia fó konsellu atu ita labele repete beibeik ita-nia orasaun. Jesus hanorin ema atu halo orasaun hodi husu Maromak halo tuir ninia hakarak “iha rai nuʼudar iha lalehan”. Ita mós bele halo orasaun atu husu ai-han loroloron nian, perdua ba ita-nia sala, no atu la monu ba tentasaun. (Mateus 6:5-13) Jesus hanorin katak Maromak Jeová mak hanesan aman ida-neʼebé hadomi loos ninia oan sira hotu, no katak nia hatán ninia atan sira-nia orasaun neʼebé sira hatoʼo ho fiar.—Mateus 7:7-11.

Loos duni, Jesus hakaʼas an atu hanorin lia-loos ba ema kona-ba Maromak Jeová. Maibé iha tan buat seluk kona-ba Maromak Jeová neʼebé Jesus hakarak ema atu hatene. Neʼe mak oinsá Maromak Jeová sei troka buat barak iha mundu tomak atubele kumpre ninia hakarak ba rai no ba ema. Tuir loloos, husi mensajen neʼebé Jesus haklaken, ida-neʼe mak buat importante liu.

[Nota–rodapé]