Kwagh u Yesu Tese Ior sha Kwagh u Aôndo La
Kwagh u Yesu Tese Ior sha Kwagh u Aôndo La
“Ka Wan tseegh a fe Ter vighe vighe ye. Kpa Wan soo u pasen mbagenev kwagh u Ter sha er ve kpa vea fa un yô.”—LUKA 10:22, BIBILO I Í YER ÉR CONTEMPORARY ENGLISH VERSION la.
SHIGHE u Waniunda u Aôndo lu a va shin tar ga la, lu vea Ter na kôôsôô anyom kpishi a or fe iyenge ga yô. (Mbakolose 1:15) Nahan Wan hingir u fan mbamhen mba Ter na kua igbenda na kpaa cii. Shighe u Wan ne va shin tar va hingir or u i yilan ér Yesu la, lu un toon toon u tesen ior mimi sha kwagh u Ter na. Se fatyô u henen kwagh u Aôndo kpishi sha u keghen ato sha kwagh u Wan ne yange ôr la.
Iti i Aôndo Icighanti u Aôndo, u í yer ér Yehova la lu Yesu kwagh u vesen. Wan u ishima ishima ne yange soo wener ior ve fa iti i Ter na shi ve yilan sha i kpaa. Inja i iti i Yesu ér “Yehova ka Myom.” Hen tugh mbu kpernan i wua Yesu la, a er msen hen Yehova a kaa ker ér: “M pase ve iti You.” (Yohane 17:26) Kpiligh se iyol er Yesu yilan sha iti i Aôndo shi tesen mbagenev i ga. Gadia, a er nan man ior mba yange ve keghen ato a Yesu mbara vea kav mimi sha kwagh u Yehova a u fan iti Na shin kwagh u iti shon i til sha mi la shio? *
Dooshima u vesen u Aôndo Sha shighe ugen la Yesu er msen hen Aôndo ér: “Tere, . . . M doo U ishima je er i lu a gba tar ga yô.” (Yohane 17:24) Er Yesu vande doon Ter na ishima sha yô, zum u a va shin tar ne la, a ker u tesen dooshima la sha igbenda i injaa kposo kposo.
Yesu tese ér dooshima u Yehova za shimi. Yesu kaa ér: “Gadia tar ne doo Aôndo ishima je, nahan A na Wan Na u môm môm la sha er anti or u nan ne Un jighjigh yô, nana̱ de timin ga kpa nana̱ zua a uma u tsôron.” (Yohane 3:16) Ishemberti i ken zwa Grika i í gem ér “tar” la, ngi ôron kwagh u “tar u se lu sha u ne” kpôô kpôô ga. I yar tom a ishember ne heen sha u ôron kwagh u uumace; jim je yô, ka uumace sha won cii. Dooshima u Aôndo sha tsombor u uumace vese je yô, a na Wan na u hemban doon un ishima la sha er uumace mba jighjigh vea osough sha ikyev i isholibo man ku kera shi vea lu a ishimaverenkeghen i va zuan a uma u tsôron yô. Se fatyô u kaven mze u imba dooshima u vesen ne ga.—Mbaromanu 8:38, 39.
Yesu pase mimi ugen u taver or ishima tsung ér: Hanma or u civir Yehova yô, nan doo un ishima. Yesu tese ér Yehova ngu er orkuranilev u hanma iyôngo na yô, i lu kposo shi i gbe un kwagh yô. (Mateu 18:12-14) Yesu kaa ér atsator môm kpa una gba inya a mfe u Yehova shio ga. Shi a kaa ér: “Ice yen i sha ityou kpaa, i ôr i cii.” (Mateu 10:29-31) Aluer Yehova ngu a tahav mbu fan atsator môm u a kera lu sha iya na ga yô, man hide se uumace mba se civir un ne ve, una hemba wan se ikyo ga ye he? Aluer ice yase i sha ityou je kpa, Yehova ôr i cii yô, ma kwagh ngu ken uuma asev, er mbamgbe asev man iniôngon yase shin ishimanyian yase nahan, u Yehova una kanshio u fan yôô?
Ter u sha Er se vande teren ken ngeren u a bee ne nahan, Yesu ka wan u Aôndo u môm môm. Ka nahan ve ashighe kpishi, Wan u ishima ishima ne yange a ôr kwagh u Yehova shi a yila Un ér “Ter” na kpaa ye. Jighilii yô, Yesu yange yila Yehova ér “Terem” ken kwaghôron na u hiihii u i nger shin takerada, u yange ôr ken tempel shighe u lu anyom 12 la. (Luka 2:49) I yila Aôndo ér “Ter” ken ityakerada i Ivangeli nôngo u kuman kwa 190. Yesu ôr kwagh u Yehova sha igbenda kposo kposo ér “Ter wen” man “Ter wase” man “Terem.” (Mateu 5:16; 6:9; 7:21) Er Yesu yar tom a ati ne kpur kpur yô, kwagh la tese ér uumace mba asorabo mba ve yen ne kpa vea fatyô u yan ikyar kôôsôô vea Yehova.
Zungu mhôônom shi den kwaghbo Yesu yange fa er kwagh a gbe uumace a mhôônom ma Yehova kpishi je yô. Ken injakwagh i Yesu ôr sha kwagh u wan u a undu ter na la, a tôô Yehova a kar sha ter u lun a mhôônom shi den kwaghbo, u a kegh a kegh iyol u hiden ngohol wan na u nan gem ishima, nan hidi her a na yô. (Luka 15:11-32) Mkaanem ma Yesu mara na se ibumun ér Yehova keren a ker orisholibo u nan gem ishima yô, sha er Una zungwe nan mhôônom yô. Ka girim Yehova iyol u den orisholibo u nan gem ishima yô, isholibo i nan. Yesu kaa ér: “Me kaa ne, kape m-ember una lu Sha sha ci u orsholibo môm u nan gema ishima la, á hemba u sha mba akunduanyiingber kar utaankarunyiin mba perapera mba kwagh a gbe ve a mgemshima ga la.” (Luka 15:7) Ka an je nana soo u kporom ikyua a Aôndo u zungwen mhôônom imba la nahan ga?
Ongo mbamsen Cii man Yesu va shin tar ne yô, vande fan er Yehova a “ongo msen” shi mbamsen mba mbacivir un sha jighjigh la ve gbe un kwagh yô. (Pasalmi 65:2) Sha nahan yô, shighe u Yesu lu pasen kwagh shin tar la, a tese ior er vea eren msen man kwagh u vea sônon kpaa yô. A wa ve kwagh ér: “De zeren nen kimbir [akaa] gbilin gbilin . . . ga.” A kaa a ior mba lu tesen ve la ér ve eren msen ve kaan ér, “i̱ er ishima [i Aôndo] shin tar kpaa vough er i eren i Sha nahan.” Shi se fatyô u sônon ser i na se kwaghyan u ayange ayange shin i de se asorabo gayô i na se tahav mbu hendan a imeen. (Mateu 6:5-13) Yesu tese ér Yehova ongo mbamsen mba mbacivir Un er ter u lun a dooshima nahan, ne ve akaa a ve sen sha jighjigh u nan la.—Mateu 7:7-11.
Jighilii yô, Yesu yange keren a ker u tesen ior mimi sha kwagh u Yehova man imba Aôndo u a lu la. Kpa, kwagh ugen lu u Yesu soo ér ior ve fa sha kwagh u Yehova yô. Kwagh shon lu gbenda u Yehova una va a mbamgem sha tar cii sha u kuren awashima na sha kwagh u tar ne kua uumace mba ve lu sha u la. Ka vegher u loho u Yesu ne je yange lu itinekwagh i kwaghpasen na jim jim ye.
[Ngeren u shin kpe]
^ Iti i Yehova la due ken ungeren mba Bibilo mba hiihii mbara kuma kwa 7,000. Inja i iti la ér “M ngu er m luun yô.” (Ekesodu 3:14.) Aôndo una fatyô u lun nyityôkwagh i a nenge ér gba u una lu sha u kuren awashima na cii. Iti ne hingir ibumun hen a vese ér Aôndo una lu u mimi hanma shighe cii man shi hanma kwagh u a tende zwa cii una kure sha mi vough.