Nzyaakayiisya Jesu Kujatikizya Leza

“Makani oonse ndaapegwa kuli-Taata. Taakwe uuzi Mwana na nguni, pele Taata, a-Taata na nguni, pele Mwana, ayooyo ngwakanza Mwana kumuyubulwida.”—LUKA 10:22.

KATANASIKA aano anyika, Mwana wa Leza wakutaanguna wakakkala a Baswaabo kwamyaka minji. (Ba-Kolose 1:15) Imwana wakabazyiba kabotu Baswaabo mbobakali kuyeeya, mbobakali kulimvwa azyintu nzyobakali kucita. Imwana ooyu Jesu naakaboola anyika, wakalilisungude kubayiisya bantu kasimpe kajatikizya Baswaabo. Tulakonzya kwiiya makani manji aamba Leza kwiinda mukuswiilila nzyaamba Mwana ooyu.

Izyina lya Leza Izyina lya Leza Jehova, lyakali kuyandika kapati kuli Jesu. Imwana ooyu uuyandwa wakali kuyanda kuti bamwi balizyibe izyina lya Baswaabo akulibelesya. Izyina lya kuti Jesu lyaamba kuti, “Jehova Ndufwutuko.” Masiku katanafwa, Jesu wakaamba boobu mumupailo kuli Jehova: ‘Ndabazyibya zyina lyako.’ (Johane 17:26) Tacigambyi kuti Jesu wakalibelesya izyina lya Leza akulizyibya kubantu bamwi. Baswiilizi bakwe nibatakakazyiba kasimpe kaamba Jehova ikuti nibatakalilizyi izyina lyakwe ancolyaamba. *

Luyando lwa Leza ndupati Jesu ciindi cimwi wakaamba boobu mumupailo kuli Leza: “Taata . . . wakali kundiyanda inyika kiitanaanzwa.” (Johane 17:24) Akaambo kakuti wakamubona Leza mbwaakali kumuyanda naakali kujulu, Jesu naakali anyika wakalutondezya luyando oolu munzila ziindene-indene.

Jesu wakatondezya kuti luyando lwa Jehova ndupati. Jesu wakaamba kuti: “Leza mbwaakayandisya nyika, wakapa Mwanaakwe simuzyalwa alike, kuti umwi umwi uumusyoma atafwidilili, pele abe abuumi ubutamani.” (Johane 3:16) Ibbala lya Chigiliki lyaamba kuti “nyika” talyaambi “nyika ini.” Kweelana ambolyabelesyegwa aawa lyaamba bantu boonse. Leza ulabayanda kapati bantu cakuti wakaaba Mwanaakwe kutegwa bantu basyomeka bakonzye kuzwa mucibi alufwu akujana buumi butamani. Eelo kaka Leza ulabayanda kapati bantu!—Ba-Roma 8:38, 39.

Jesu wakaamba kaambo kamasimpe: Jehova ulabayanda bakombi bakwe boonse. Jesu wakali kuyiisya kuti Jehova uli mbuli mweembezi uuzyizyi kabotu mbelele zyakwe akuti aimwi ilayandika. (Matayo 18:12-14) Jesu wakaamba kuti kunyina nokaba kayuni kakonzya kuwida ansi Jehova kakunyina kukazyiba. Jesu wakayungizya kwaamba kuti: “Masusu aali amitwe yanu alibalidwe oonse.” (Matayo 10:29-31) Ikuti Jehova kakonzya kuzyiba kuti kayuni komwe takako mucitente, sena eeci tacitondezyi kuti ulababikkila maano babelesi bakwe? Ikuti Jehova kakonzya kwaabala masusu eesu nkokuti ulizyizyi zyintu nzyotuyandika mubuumi, mapenzi eesu anzyotuyeeya.

Taata Wakujulu Kweelana ambotwabona mucibalo cainda, Jesu Mwana wa Leza simuzyalwa alikke. Nkakaambo kaako Imwana ooyu uuyandwa lyoonse wakali kwaamba  Jehova kuti “Taata.” Masimpe ngakuti, majwi aakutaanguna ngaakaamba Jesu mutempele naakali amyaka iili 12, wakaamba Jehova kuti “Taata.” (Luka 2:49) Ibbala lyakuti “Taata” lilajanika ziindi zitandila ku 190 mu Makani Mabotu. Jesu muziindi ziindene-indene wakaamba Jehova kuti “Usowanu,” “Taateesu,” a “Taata.” (Matayo 5:16; 6:9; 7:21) Kwiinda mukubelesya mabala aaya, Jesu wakali kutondezya kuti bantu batalondokede alimwi bakabisya balakonzya kumvwana a Jehova.

Ulaaluse alimwi ulalekelela Jesu wakalizyi kuti bantu batalondokede bakali kuyandika kulekelelwa a Jehova. Mucikozyanyo ncaakaamba camwana mutaka, Jesu wakakozyanya Jehova kuli taata siluse, uulekelela alimwi uukonzya kumutambula mwana wakwe kuti naa weempwa. (Luka 15:11-32) Majwi ngaakaamba Jesu atutondezya kuti Jehova ulakonzya kumulekelela muntu ikuti weempwa. Jehova ulilibambilide kulekelela muntu weempwa. Jesu wakaamba kuti: “Mbubonya obo akujulu kunooli kubotelwa nkaambo kaumwi mucitazibi uwasanduka, kwiinda baluleme abali makumi aali musanu mwaane amusanu mubane abatabuli kusanduka.” (Luka 15:7) Ngwani uutayandi kumvwana a Leza uli boobu, siluse?

Sikumvwa mipailo Katanasika aano anyika, Jesu wakalibonena kuti Jehova ngu ‘sikuswiilila mipailo’ akuti ulakkomana bakombi bakwe basyomeka bana kupaila. (Intembauzyo 65:2) Aboobo, naakali mumulimo wakwe waanyika, Jesu wakabayiisya baswiilizi bakwe kupaila anzyobakeelede kulomba. Wakabaambila kuti, “mukukomba kwanu mutaindululi.” Wakabakulwaizya baswiilizi bakwe kulomba kuti luyando lwa Leza ‘lucitwe ansi aano mbubonya mbuli kujulu.’ Tulakonzya kulomba kuti atupe izyakulya, kutulekelela zibi zyesu akutugwasya kutegwa tuzunde masunko. (Matayo 6:5-13) Jesu wakayiisya kuti Jehova ulaingula mipailo yababelesi bakwe ibajisi lusyomo.—Matayo 7:7-11.

Kwaamba masimpe, Jesu wakali kuyanda kuyiisya kasimpe kaamba Jehova ambwabede. Pesi kuli acimwi Jesu ncaakali kuyanda kwaamba kujatikizya Jehova—inzila Jehova njaya kubelesya kucinca zyintu anyika kutegwa azuzikizye makanze aakwe. Masimpe, makani aaya ngaakali mutwe wamakani Jesu ngaakali kukambauka.

Bupanduluzi buyungizidwe