Le baʼaxoʼob tu kaʼansaj Jesús yoʼolal Diosoʼ

«Mix máak xan kʼaj óoltmail máax le Taataoʼ wa maʼ chéen le Paaloʼ yéetel le máaxoʼob kun u yóolt le Paal u tsʼáa u kʼaj óoltoʼoboʼ.» (LUCAS 10:22)

TÁANIL tiʼ u síijil bey wíinikeʼ, u yáax Paal Dioseʼ tu máansaj yaʼab jaʼaboʼob tu yéetel teʼ kaʼanoʼ (Colosailoʼob 1:15, NM). Teʼ kʼiinoʼob tu máansaj yéetel u Taataoʼ, jach kʼuch u kʼaj óolt bix u tuukul, bix u modos yéetel bix u chʼaʼatuklik u beetik wa baʼax. Le oʼolal ka taal way Luʼumeʼ jach tu tsʼáaj u yóol u kaʼans tiʼ le máakoʼob baʼaloʼob yaan yil yéetel u Taataoʼ. ¿Baʼaxoʼob jeʼel u páajtal k-kanik tiʼ le baʼaxoʼob tu kaʼansoʼ?

U kʼaabaʼ Dios Jesuseʼ jach kʼaʼanan u yilik u kʼaj óoltaʼal yéetel u chʼaʼachiʼitaʼal u kʼaabaʼ Dios, Jéeoba. Tak u kʼaabaʼ Jesuseʼ, u kʼáat u yaʼal, «Jéeobaeʼ Salvación». Le oʼolaleʼ le áakʼab táanil tiʼ u kíimloʼ tu yaʼalaj tiʼ u Taata ich oración: «Tin tsʼáaj u yojéeltoʼob máaxech» (Juan 17:26). Jeʼex k-ilkoʼ Jesuseʼ jach tu chʼaʼachiʼitaj u kʼaabaʼ Dios yéetel tu kaʼansaj tiʼ uláakʼ máakoʼob. Le máaxoʼob uʼuyik kaʼach Jesusoʼ, ¿bix ken u yojéeltoʼob u jaajil yoʼolal Jéeoba wa maʼ u yojloʼob bix u kʼaabaʼ mix baʼax u kʼáat u yaʼal u kʼaabaʼiʼ? *

U nojoch yaabilaj Utéenjeakil le táan u payalchiʼ tiʼ Diosoʼ, Jesuseʼ tu yaʼalaj: «In Yuum, [...] ta yaabiltajen maʼiliʼ beetaʼak yóokʼol kaabeʼ» (Juan 17:24). Le tiaʼan kaʼach Jesús teʼ kaʼanoʼ tu yilaj jach nojoch u yaabilaj Dios, le oʼolal ka taal way Luʼumeʼ tu beetaj tuláakal le ku páajtal utiaʼal ka ojéeltaʼak tumen le máakoʼob bix u yeʼesik yaabilaj Dios.

Yáaxeʼ Jesuseʼ tu kaʼanseʼ Jéeobaeʼ u yaabiltmaj tuláakal máak. Letiʼeʼ tu yaʼalaj: «Tumen Jajal Dioseʼ tu sen yaabiltaj le yóokʼol kaabaʼ, ka tu tsʼáaj u juntúuliliʼ Paal, utiaʼal tuláakal le máax ku yoksik u yóol tiʼeʼ maʼ u saʼatal, baʼaleʼ ka yanak kuxtal minaʼan u xuul tiʼ» (Juan 3:16). Le tʼaan ich griego «yóokʼol kaaboʼ», maʼ táan u tʼaan jach tiʼ le Luʼumaʼ, baʼaxeʼ táan u tʼaan tiʼ le wíinikoʼoboʼ. Letiʼe nojoch yaabilaj ku yuʼubik tu yoʼolal le wíinikoʼob beet u kʼubik u Paal jach u yaabiltmoʼ. Chéen bey jeʼel u páajtal kaʼach u tokik le máakoʼob tiʼ le kʼeban yéetel le kíimil utiaʼal ka yanaktiʼob le kuxtal minaʼan u xuuloʼ. Lelaʼ ku yeʼesikeʼ maʼ tu páajtal k-ojéeltik bukaʼaj nojchil u yaabilaj Dios (Romailoʼob 8:38, 39).

Baʼaleʼ Jesuseʼ tu kaʼansaj xaneʼ: Jéeobaeʼ u yaabiltmaj cada utúul tiʼ le máaxoʼob meyajtikoʼ. Jesuseʼ tu ketaj xan u Taata yéetel utúul j-kanan taman jach u yaabiltmaj cada utúul tiʼ u tamanoʼob (Mateo 18:12-14). Tu yaʼalaj xaneʼ mix utúul chan chʼíichʼ ku kíimil wa maʼ tu yojéeltik Jéeoba. Tsʼoʼoleʼ tu yaʼalaj xan: «Tak u tsoʼotsel a pooleʼexeʼ láaj xokaʼan tu jujunkúulil» (Mateo 10:29-31). Bey túunoʼ wa Jéeoba u yaabiltmaj utúul chan chʼíichʼeʼ, ¿máasaʼ maas jeʼel u yaabiltik utúul máax meyajtikeʼ? Yéetel wa u xokmaj tuláakal u tsoʼotsel k-pooleʼ, ¿máasaʼ maas jeʼel u yilik baʼax kʼaʼabéettoʼon yéetel jeʼel u yáantkoʼon k-aktáant le talamiloʼoboʼ?

Le Taatatsil yaan teʼ kaʼanoʼ Jeʼex tsʼoʼok k-ilkoʼ Jesuseʼ u juntúuliliʼ Paal Dios. Le oʼolaleʼ  letiʼeʼ yaʼab utéenel tu yaʼaleʼ Jéeobaeʼ u «Taata». Le yaan 12 jaʼaboʼob tiʼ Jesús tiaʼan kaʼach teʼ templooʼ tʼaanaj tu yoʼolal Jéeoba, ka tu yaʼaleʼ «in Taata»; lelaʼ letiʼe yáax ka tʼaanaj Jesús ku chíikpajal teʼ Bibliaoʼ (Lucas 2:49). Teʼ Evangelioʼoboʼ ciento noventa utéenel ku chíikpajal le tʼaan Taata ken chʼaʼachiʼitaʼak u kʼaabaʼ Jéeobaoʼ. Jesuseʼ yaʼab utéenel meyajnajtiʼ tʼaanoʼob jeʼex «a Taataʼex», «k-Taata, NM» yéetel «in Taata» (Mateo 5:16; 6:9; 7:21). Beyoʼ tu yeʼeseʼ tak le kʼeban máakoʼob jeʼel u páajtal u biskubaʼob yéetel Diosoʼ.

Ku chʼaʼik óotsilil yéetel ku perdonar Jesuseʼ u yojel kaʼacheʼ tumen kʼeban wíinikoʼoneʼ, kʼaʼabéet u chʼaʼabaltoʼon óotsilil tumen Dios. Le oʼolaleʼ tu kettʼaanil le paal lukʼ tu yotochoʼ, tu ketaj Dios yéetel utúul taatatsil jach ku chʼaʼik óotsilil yéetel ku kaʼa kʼamik u hijo yéetel kiʼimak óolal tumen tsʼoʼok u arrepentir (Lucas 15:11-32). Jeʼex túun k-ilkoʼ wa Jéeoba ku yilik yaan baʼax ichil k-puksiʼikʼal ku yeʼesik tsʼoʼok k-arrepentireʼ ku chʼaʼiktoʼon óotsilil yéetel ku perdonarkoʼon. ¿Baʼaxten? Tumen letiʼeʼ jach tu jaajil taak u perdonartik le máax tsʼoʼok u arrepentiroʼ. Jesuseʼ tu yaʼalaj: «Kin waʼalik tiʼ teʼexeʼ bey xanoʼ yaan maas kiʼimak óolal teʼ kaʼanoʼ tu yoʼolal juntúul kʼeban wíinik ku kʼexik u tuukuleʼ ke tu yoʼolal noventa y nueve utsil wíinikoʼob maʼ kʼaʼabéet u kʼexik u tuukuloʼobiʼ» (Lucas 15:7). ¿Máasaʼ jach jeʼel u taaktal a meyajtik utúul Dios beyaʼ?

Ku yuʼubik k-oracionoʼob Le tiaʼan Jesús kaʼach teʼ kaʼanoʼ, tu kaneʼ Jéeobaeʼ ku yuʼubik le oracionoʼoboʼ (Salmo 65:2). Le oʼolal ka taal way Luʼumeʼ tu kaʼansaj u disipuloʼob orar. Letiʼeʼ tu yaʼalaj: «Maʼ a babal aʼalik maʼ nuʼukaʼan tʼaanoʼobiʼ». Tsʼoʼoleʼ tu yaʼalaj xan tiʼob baʼax jeʼel u páajtal u kʼáatkoʼob tiʼ Dioseʼ: ka beetaʼak baʼax u kʼáat «way luʼumeʼ jeʼel bix u beetaʼal teʼ kaʼanoʼ», ka tsʼaʼabak baʼax kʼaʼabéettiʼob sáamsamal, ka perdonartaʼak u kʼebanoʼob yéetel ka áantaʼakoʼob utiaʼal maʼ u lúubloʼob tiʼ baʼax kʼaas (Mateo 6:5-13). Jesuseʼ tu yeʼeseʼ Jéeobaeʼ utúul Taatatsil jach yaan u yaabilaj yéetel ku núukik u oración le máaxoʼob meyajtik tu jaajil u yóoloʼoboʼ (Mateo 7:7-11).

Jeʼex túun tsʼoʼok k-ilkoʼ: Jesuseʼ tu kaʼansaj u jaajil yoʼolal Jéeoba yéetel bix u modos. Baʼaleʼ yaan uláakʼ baʼax u kʼáat kaʼach u kaʼans Jesús: letiʼe baʼax kun meyaj tiʼ Jéeoba utiaʼal u tsʼoʼokbesik le baʼax u tukulmaj utiaʼal le Luʼum yéetel le wíinikoʼoboʼ. Lelaʼ letiʼe baʼax jach tu kʼaʼaytaj ka taal way Luʼumaʼ.

[Tsolajiloʼob]