Sa ki Zezi ti ansennyen lo Rwayonm Bondye

“Zezi ti vwayaz dan plizyer lavil ek vilaz pour pres Bonn Nouvel Rwayonm Bondye.”—LIK 8:1.

NOU kontan koz lo keksoz ki vreman enportan pour nou e ki nou vreman kontan. Parey Zezi li menm ti dir, “labous i koz sa ki deborde dan leker.” (Matye 12:34) Kan nou reflesir lo sa ki Zezi ti koz lo la dan son minister, nou kapab remarke ki Rwayonm Bondye ti sa size ki ti vreman enportan pour li.

Ki si sa Rwayonm Bondye? En Rwayonm i en gouvernman ki ganny dirize par en lerwa. Alor Rwayonm Bondye i en gouvernman ki’n ganny etabli par Bondye. Zezi ti koz en kantite lo Rwayonm Bondye e son mesaz ti santre lo la. I annan plis ki 110 referans lo Rwayonm dan sa kat Levanzil. Zezi pa ti zis servi parol, me osi par son aksyon i ti ansenny en kantite lo Rwayonm Bondye e sa ki i pou fer.

Lekel sa Lerwa? Lerwa sa Rwayonm pa ganny apwente par bann imen. O kontrer, sa dirizan i ganny swazir par Bondye li menm. Kan Zezi ti ansennyen, i ti revele ki i sa enn ki Bondye in swazir pour vin Lerwa.

Zezi ti konnen ki bann profesi Labib ti’n predir ki sa Mesi ki ti’n ganny promet pou diriz dan en Rwayonm ki pou reste pour touzour. (2 Samyel 7:12-14; Danyel 7:13, 14; Matye 26:63, 64) Ou rapel, nou’n vwar pli boner ki Zezi ti piblikman idantifye li konman sa Mesi ki ti’n ganny promet. Alor Zezi ti pe montre ki i sa Lerwa ki’n ganny apwente par Bondye. (Zan 4:25, 26) I pa drol alor ki Zezi ti servi sa lekspresyon “mon Rwayonm” plizyer fwa.—Zan 18:36.

Zezi ti osi ansennyen ki i pou annan lezot ki pou dirize ansanm avek li dan Rwayonm. (Lik 22:28-30) I ti apel zot “pti troupo” akoz i pou annan en ptigin zot. I ti dir zot: “Zot Papa i’n war bon pour donn zot son Rwayonm.” (Lik 12:32) Dernyen liv Labib i montre ki i pou annan 144,000 zot an tou ki pou ganny sa privilez pour dirize ansanm avek Kris.—Revelasyon 5:9, 10; 14:1.

Kote sa Rwayonm i ete? Zezi ti dir avek en dirizan Romen, Pons Pilat: “Mon Rwayonm pa sorti lo sa later.” (Zan 18:36) Kris ki pou diriz Rwayonm Bondye me pa bann imen lo later. Zezi ti souvan refer avek Rwayonm Bondye konman “Rwayonm Lesyel.” * (Matye 4:17; 5:3, 10, 19, 20) Alor, i kler ki Rwayonm Bondye i dan lesyel.

 Zezi ti konn tre byen ki i ti pou retourn dan lesyel apre son sezour lo later. I ti dir ki i pou “prepar en plas” laba pour ki bann ki pou diriz ansanm avek li i osi kapab zwenn li.—Zan 14:2, 3.

Ki sa Rwayonm pou akonplir? Zezi ti ansenny son bann disip pour priy Bondye: “Ki ou Renny i ganny etabli; Ki ou lavolonte i ganny akonplir lo later parey dan lesyel.” (Matye 6:9, 10) Lavolonte Bondye pe ganny fer dan lesyel. Sa Rwayonm i sa mwayen atraver ki plan Bondye pou ganny akonplir lo later. Pour son plan ganny akonplir, sa Rwayonm pou anmenn bann gran sanzman lo later.

Ki sa Rwayonm pou fer lo later? Zezi ti ansennyen ki Rwayonm Bondye pou retir bann move keksoz par detrir bann ki kontinyen fer bann keksoz mal. (Matye 25:31-34, 46) Sa i vedir ki i pou annan en lafen avek koripsyon ek mesanste. Zezi ti dir ki later pou ranpli avek bann dimoun ki “dou[s],” drwat, demontre mizerikord, annan “leker pir” ek bann “ki fer lape.”—Matye 5:5-9.

Eski sa bann dimoun fidel pou bezwen reste lo en later ki polye? Sa i pa ditou le ka. Zezi ti promet ki Rwayonm Bondye pou anmenn bann sanzman merveye lo later. En zonm ki ti pe ganny met a mor akote Zezi ti dir: “Zezi, mazin mwan ler ou retournen konman lerwa.” Zezi ti reponn li: “An verite, mon dir ou ozordi ou pou avek mwan dan paradi.” (Lik 23:42, 43) Wi, Rwayonm Bondye pou fer later vin en paradi zis parey sa enn ki ti egziste dan zarden Edenn.

Ki sa Rwayonm pou fer ankor pour limanite? Zezi ti fer plis ki zis promet sa ki sa Rwayonm Bondye pou akonplir. I ti osi  montre ki i pou fer. Zezi ti fer plizyer gerizon mirakile ki ti zis pe donn en avangou konsernan sa ki i pou fer dan lavenir lo en pli gran lesel kan i pou dirize dan Rwayonm. Sa resi ki’n ganny enspire i dir sa lo Zezi: “Zezi ti al partou dan Galile, e i ti prese dan bann sinagog e anons Bonn Nouvel konsernan Rwayonm Bondye. I ti geri bann ki ti annan tou sort maladi.”—Matye 4:23.

Zezi ti fer plizyer gerizon. I ti “fer en aveg war kler.” (Zan 9:1-7, 32, 33) Avek tandres Zezi ti geri en zonm ki ti ganny lalep. (Mark 1:40-42) Kan zot ti anmenn “en zonm sourd e ki ti koz avek difikilte” kot Zezi, i ti montre ki i kapab fer “bann sourd tande e bann kozpa koze.”—Mark 7:31-37.

Sa Lerwa ki Bondye in apwente i menm annan pouvwar pour redonn lavi. Trwa fwa Zezi ti resisit bann ki ti’n mor. I ti resisit sel garson en vev, en fiy ki ti annan 12 an ek son bon zanmi Lazar.—Lik 7:11-15; 8:41-55; Zan 11:38-44.

Zezi ti pe dekrir sa lavenir merveye ki pe esper tou bann ki pou viv anba dominasyon Rwayonm Bondye e atraver zapot Zan i ti predir: “La aprezan Bondye in fer son demer parmi zonm. I pou reste avek zot. Zot pou vin son pep, e i pou vin zot Bondye. I pou eswiy tou larm dan zot lizye. Lanmor pou nepli egziste. Pou nepli annan ni dey, ni plere, ni soufrans, parski lemonn ansyen in disparet.” (Revelasyon 1:1; 21:3, 4) Zis mazin sa, en lemonn kot pou napa ni plere, ni soufrans e lanmor pou nepli! Sa letan sa lapriyer konsernan lavolonte Bondye i ganny fer lo later parey dan lesyel pou konpletman ganny akonplir.

Kan ki Rwayonm Bondye pou vini? Zezi ti dir ki sa letan ki i pou konmans dirize konman lerwa pou ariv an menm tan ki sa peryod letan ki i ti apel son “prezans” (NW). Zezi ti eksplik en profesi an detay konsernan kan ki i pou konmans dirize konman Lerwa. Sa letan lavi pou difisil dan lemonn antye. I pou annan lager, lafamin, tranblemandter, lepidemi e bann dimoun pou kontinyen fer sa ki move. (Matye 24:3, 7-12; Lik 21:10, 11) Tou sa bann keksoz ek lezot laspe ki Zezi ti predir in sirtou evidan depi lannen 1914, sa lannen ki Premye Lager Mondyal ti deklare. Alor i kler ki Zezi pe aprezan dirize konman Lerwa. Byento sa Rwayonm pou egzers son dominasyon e lavolonte Bondye pou ganny fer lo later. *

Ki Rwayonm Bondye pou vedir pour ou? Sa i tou depan lo lafason ki ou deside pour reazir anver mesaz Zezi.

[Not anba lo paz]