Mambu Yina Yezu Kulongaka na Yina Metala Kimfumu ya Nzambi

“Yesu kwendaka kutambula na babwala ya nene ti na babwala ya fioti. Yandi vandaka kulonga nsangu ya mbote ya Kimfumu ya Nzambi.”​—LUKA 8:1.

BETO kezolaka kutubila mambu yina kele mfunu mingi sambu na beto mpi mambu yina kesepedisaka beto. Mutindu Yezu yandi mosi kutubaka, “muntu ke tubaka mambu yina me fulukaka na ntima na yandi.” (Matayo 12:34) Kana beto tadila mambu yina Yezu kutubilaka na kisalu na yandi ya kusamuna, beto lenda sukisa nde Kimfumu ya Nzambi kuvandaka mfunu mingi sambu na yandi.

Kimfumu ya Nzambi kele inki? Kimfumu kele guvernema yina ntotila keyalaka. Yo yina, Kimfumu ya Nzambi kele guvernema yina Nzambi metulaka. Yezu kutubilaka mingi Kimfumu ya Nzambi. Yo vandaka ntu-dyambu ya nsangu na yandi. Baevanzile iya ketubilaka Kimfumu yina bambala kuluta 110. Kansi, Yezu kulongaka ve kaka ti bangogo mpamba. Bisalu na yandi kulongaka mpi mambu mingi ya metala Kimfumu ya Nzambi mpi mambu yina yo tasala.

Nani kele Ntotila? Bo keponaka ve Ntotila ya Kimfumu ya Nzambi na nzila ya vote yina bantu kesalaka. Kansi, Nzambi yandi mosi muntu meponaka Mfumu yai. Na malongi na yandi, Yezu kumonisaka nde yandi kele muntu yina Nzambi kuponaka na kuvanda Ntotila.

Yezu kuzabaka nde bambikudulu ya Biblia kutubaka na ntwala nde Mesia ya lusilu zolaka kuyala Kimfumu mosi ya mvula na mvula. (2 Samuele 7:12-14; Daniele 7:13, 14; Matayo 26:63, 64) Yibuka nde Yezu kutubaka pwelele nde yandi kele Mesia ya lusilu. Na mutindu yina Yezu vandaka kundima nde yandi kele Ntotila yina Nzambi meponaka. (Yoane 4:25, 26) Yo yina, Yezu kusadilaka mbala mingi bangogo “Kimfumu na mono.”​—Yoane 18:36.

Yezu kulongaka mpi nde bantu yankaka tayala ti yandi na Kimfumu. (Luka 22:28-30) Yandi bingaka bantu yai ya tayala ti yandi nde “kibuka ya fyoti,” (NW) sambu ntalu na bo zolaka kuvanda fyoti. Yandi tubaka mutindu yai sambu na bo: “Tata na beno ke mona kiese na kupesa beno Kimfumu na yandi.” (Luka 12:32) Mukanda ya nsuka ya Biblia kemonisa nde bantu 144 000 tavanda ti dibaku ya kuyala ti Kristu.​—Kusonga 5:9, 10; 14:1.

Kimfumu kele na wapi? Yezu kuzabisaka Ponse Pilate, mfumu ya Roma nde: “Kimfumu na mono kele ya nsi-ntoto yai ve.” (Yoane 18:36) Kimfumu ya Nzambi ya kele na nsi ya kiyeka ya Kristu tayala ve na nsadisa ya bantu. Yezu kubingaka Kimfumu ya Nzambi mbala mingi nde “Kimfumu” ya zulu. * (Matayo 4:17; 5:3, 10, 19, 20) Yo yina, Kimfumu ya Nzambi kele guvernema ya zulu.

 Yezu vandaka kundima nde yandi tavutuka na zulu na nima ya luzingu na yandi na ntoto. Yandi tubaka nde, kuna, yandi zolaka ‘kuyidikila bo kisika,’ disongidila kukangudila bantu yina tayala ti yandi nzila sambu bo landa yandi.​—Yoane 14:2, 3.

Inki mambu Kimfumu talungisa? Yezu kulongaka bawi na yandi na kusamba Nzambi nde: “Kimfumu na nge kwisa, luzolo na nge kusalama awa na ntoto bonso na zulu.” (Matayo 6:9, 10) Luzolo ya Nzambi ke na kusalama na zulu. Kimfumu kele mwaye yina lukanu ya Nzambi sambu na ntoto ke na kusalama. Sambu na kulungisa yo, Kimfumu tasala bansoba ya nene na ntoto yai.

Inki mambu Kimfumu tasala na ntoto? Yezu kulongaka nde Kimfumu ya Nzambi tamanisa mambi na kukatulaka bantu yina kele ti lukanu ya kusala mambu ya mbi. (Matayo 25:31-34, 46) Dyambu yai tatendula nsuka ya mitindu yonso ya luvunu mpi ya mambi. Yezu kulongaka nde ntoto tafuluka ti bantu yina kele “pima,” lunungu, kewilaka bankaka mawa, “kele ntima-mpembe,” mpi kekotisaka ngemba.​—Matayo 5:5-9.

Keti bantu ya kwikama ya mutindu yai tazinga na ntoto ya kubeba? Ata fyoti ve! Yezu kusilaka nde bansoba ya kitoko tasalama na ntoto na nsi ya Kimfumu ya Nzambi. Muntu yina bo zolaka kufwa na lweka ya Yezu kutubaka nde: “Yesu, yindula mono ntangu nge ta kwisa kuvutuka sambu na kuvanda ntotila.” Yezu kuvutulaka nde: ‘Mono ketubila nge mambu ya kieleka bubu yai, nge tavanda ti mono na Paladiso.’ (Luka 23:42, 43) Ya kyeleka, Kimfumu ya Nzambi takumisa ntoto yai paladisu yina tavanda na ntoto ya mvimba​—paladisu ya mefwanana ti yina kuvandaka na masamba ya Edeni.

Inki mambu yankaka Kimfumu tasala sambu na bantu? Yezu kusilaka kaka ve mambu yina Kimfumu ya Nzambi tasala. Yandi monisaka mpi mambu yina yo tasala. Yezu kubelulaka bantu mingi na mutindu ya kuyituka. Na mutindu yina, yandi monisaka na kiteso ya fyoti mambu yina yandi tasala na kiteso ya kuluta nene na bilumbu kekwisa ntangu yandi tayala na Kimfumu  na yandi. Disolo ya kupemama ya Evanzile ketuba mutindu yai sambu na Yezu: “Yesu vandaka kwenda kutambula na ntoto yonso ya Galilea; yandi vandaka kwenda kulonga bantu ya ndambu yina na banzo na bo ya bisambu, yandi vandaka kwenda kuzabisa bo nsangu ya mbote sambu na Kimfumu ya Nzambi, yandi vandaka kwenda kubelula bantu yina vandaka na maladi to mpasi ya mutindu na mutindu.”​—Matayo 4:23.

Yezu kubelulaka bamaladi ya mutindu na mutindu. Yandi ‘kangulaka meso ya muntu mosi ya butukaka na meso ya kufwa.’ (Yoane 9:1-7, 32, 33) Yezu kusimbaka na mawete yonso muntu mosi ya vandaka na maladi ya nzanzi ya lepre mpi kubelulaka yandi. (Marko 1:40-42) Ntangu “bantu kwisaka kunatila yandi baba mosi vandaka mpi na makutu ya kufwa,” Yezu kumonisaka nde yandi lenda sala nde ‘bantu ya makutu ya kufwa kuwa mpi bababa kutuba.’​—Marko 7:31-37.

Ntotila ya Nzambi meponaka vandaka nkutu ti kiyeka ya kununga lufwa. Biblia ketubila bambala tatu yina Yezu kufutumunaka bafwa. Yandi futumunaka mwana-bakala mosi kaka ya mufwidi mosi, mwana-nkento mosi ya bamvula 12, mpi nduku na yandi ya zola Lazare.​—Luka 7:11-15; 8:41-55; Yoane 11:38-44.

Ntangu yandi vandaka kutubila makwisa ya kitoko yina kevingila bantu ya Kimfumu ya Nzambi, Yezu kutubaka na nzila ya ntumwa Yoane nde: “Ntangu yai Nzambi ke zinga na kati ya bantu! Yandi ta zinga ti bo, bo ta vanda bantu na yandi. Yandi mosi Nzambi ta vandaka ti bo, yandi ta vandaka Nzambi na bo. Yandi ta kusula mansanga yonso na meso na bo. Lufwa ta vandaka diaka ve, bantu ta lwataka mpidi diaka ve, bo ta dilaka diaka ve, bo mpi ta waka diaka mpasi ve. Na ntangu yina mambu ya ntama ta vanda me vila.” (Kusonga 1:1; 21:3, 4) Yindula fyoti​—nsi-ntoto ya kukonda mansanga ya mawa, bampasi, mpi lufwa! Ebuna kisambu ya beto kesalaka sambu luzolo ya Nzambi kusalama na ntoto mutindu yo kesalama na zulu talungana mpenza.

Inki ntangu Kimfumu ya Nzambi takwisa? Yezu kulongaka nde luyalu na yandi bonso ntotila tayantika ntangu mosi ti nsungi mosi ya ntangu ya sikisiki yina yandi bingaka nde “kuvanda” (NW) na yandi. Yezu kupesaka mbikudulu yina kele ti mambu mingi sambu na kumonisa ntangu yina kuvanda na yandi na kiyeka ya kimfumu zolaka kuyantika. Mavwanga na ntoto ya mvimba, yika mpi bitumba, banzala, kunikana ya ntoto, bamaladi, mpi kumata ya kukonda nsiku tamonana mingi na nsungi yina. (Matayo 24:3, 7-12; Luka 21:10, 11) Mambu yai mpi mambu yankaka yina Yezu kutubilaka memonanaka pwelele mingimingi banda na mvu 1914, mvula yina Mvita ya Ntete ya Ntoto ya Mvimba kuyantikaka. Yo yina, Yezu keyala ntangu yai bonso Ntotila. Kubika fyoti ntangu talunga sambu Kimfumu kukwisa mpi kusala nde luzolo ya Nzambi kusalama na ntoto. *

Kukwisa ya Kimfumu ya Nzambi tatendula inki sambu na nge? Mvutu ketadila mutindu nge kepona na kundima to na kubuya nsangu ya Yezu.

[Banoti na Nsi ya Lutiti]