Yesu Adieyi Kalonga mu Kuma kia Kintinu kia Nzambi

“Wele akangala muna mavata, yo muna mpata-vata, wele alonginge yo samunang’e nsangu zambote za kintinu kia Nzambi.”​—⁠LUKA 8:⁠1.

TUZOLANGA mokena mambu mana tuyangalelanga. Yesu yandi kibeni wavova vo: “muna ulolo wa ntima i uvovelang’o nua.” (Matai 12:​34) Avo tufimpidi mambu mana Yesu kalonga ekolo kasalanga e salu kiandi ova ntoto, tulenda bakula vo e nsangu za Kintinu kia Nzambi mfunu kikilu zakala kwa Yesu.

Nki i Kintinu kia Nzambi? E kintinu i luyalu luyalwanga kwa ntinu. Muna kuma kiaki, Kintinu kia Nzambi i luyalu lwasikidiswa kwa Nzambi. Yesu nkumbu miayingi kayikanga Kintinu kia Nzambi yo kitula kio se ntu a diambu wa nsangu zandi. E mvovo Kintinu fulu 110 wasonama muna Nsangu Zambote zasoneka antumwa. Kansi Yesu kalonga kaka mu mvovo miankatu ko. E mavangu mandi mpe malonga mambu mayingi mu kuma kia Kintinu kia Nzambi ye dina kisinga vanga.

Nani i Ntinu? O Ntinu a Kintinu kia Nzambi kasolwa kwa wantu ko. Yave yandi kibeni wansola. Muna malongi mandi, Yesu wasonga vo Nzambi wansola mu kala se Ntinu.

Yesu wazaya wo vo ungunza wa Nkand’a Nzambi wazayisa vo Masia wasilwa o nsilu oyala muna Kintinu kiakwele mvu. (2 Samuele 7:​12-14; Daniele 7:​13, 14; Matai 26:​63, 64) Sungamena dio vo Yesu wavova vo yandi kibeni i Masia wasilwa o nsilu. Ikuma vo Yesu wazaya wo vo yandi i Ntinu wasolwa kwa Nzambi. (Yoane 4:​25, 26) Muna kuma kiaki, nkumbu miayingi Yesu kasadila e mvovo “kintinu kiame.”​—⁠Yoane 18:⁠36.

Yesu walonga mpe vo oyala ye wantu akaka muna Kintinu. (Luka 22:​28-​30) Wabayikila vo “finkambi-kambi,” kadi lutangu lwau lwakete. Wabavovesa vo: “I luzolo lua Tata lulu, lua kunuvan’e kintinu.” (Luka 12:​32) O nkanda wa nsuka muna Nkand’a Nzambi usonganga vo 144.000 bavewa elau dia yala kumosi yo Kristu.​—⁠Lusengomono 5:​9, 10; 14:⁠1.

Akweyi kikalanga e Kintinu? Yesu wavova kwa Pontio Pilatu wa nyadi a Roma vo: “E kintinu kiame ke kia nza yayi ko.” (Yoane 18:​36) E Kintinu kia Nzambi vana moko ma Kristu ke kiyalwa kwa wantu ko. Nkumbu miayingi Yesu wayikila Kintinu kia Nzambi vo “kintinu ki’ezulu.” * (Matai 4:17; 5:​3, 10, 19, 20) Ozevo e Kintinu kia Nzambi i luyalu lw’ezulu.

 Ekolo kakala ova ntoto, Yesu wakala ye vuvu kia vutuka kun’ezulu. Wavova vo: Okwenda ‘kubika fulu,’ mu ziula nzila mu kuma ki’awana keyala yau kumosi.​—⁠Yoane 14:​2, 3.

E Kintinu nkia diambu kilungisa? Yesu walonga awana banwanga basambanga kwa Nzambi vo: “E kintinu kiaku kiza. O luzolo luaku luavangam’ova nza nze koko’zulu.” (Matai 6:​9, 10) Luzolo lwa Nzambi luvangamanga kun’ezulu. E Kintinu kiaki kilungisa ekani dia Nzambi ova ntoto. Muna lungisa ekani diadi, e Kintinu mambu mayingi kisoba ova ntoto.

E Kintinu nkia mambu kivanga ova ntoto? Yesu walonga vo Kintinu kia Nzambi kifokola o bi ova nza muna fwasa awana bevanganga wo. (Matai 25:​31-34, 46) Ediadi disongele vo o bi wawonso ye umpumbulu ufokoka emvimba. Yesu walonga vo “alembami,” asongi, akwa nkenda, ‘aveledi muna ntima’ ye avangi a ungudi bevw’e nza.​—⁠Matai 5:​5-9.

Nga wantu awaya va nza yayi yasafulwa besinga zingila? Ve kikilu! Yesu wasia nsilu vo e Kintinu kia Nzambi mambu mambote kitwasa ova ntoto. E kimpumbulu ndiona wakomwa va nti vana ndambu a Yesu wavova vo: “E Yesu, ungindula vav’oluaka muna kintinu kiaku.” Yesu wamvovesa vo: ‘Kieleka o unu isamunwini vo, okala yame muna Paradiso.’ (Luka 23:​42, 43) Kieleka, e Kintinu kia Nzambi kikitula o ntoto wawonso se paradiso, nze una wakala muna mpatu a Edene.

E Kintinu kia Nzambi nkia mambu diaka kivanga mu kuma kia wantu? Yesu mayingi kavanga, ka sia kaka nsilu wa mambu metwasa e Kintinu kia Nzambi ko. Wasonga  mpe mambu kisinga vanga. Yesu wawuka wantu akete mu mpil’esivi muna songa vo masivi mayingi kevanga muna luyalu lwa Kintinu kiandi. Nsangu Zambote zivovanga mu kuma kia Yesu vo: “O Yesu wele azieta Ngalili yawonso, wele alonginge muna masambilu mau, yo samunwinang’e nsangu zambote za kintinu, yo wukanga mayela mawonso ye yimbevo yawonso muna wantu.”​—⁠Matai 4:⁠23.

Yesu wawuka yimbevo ya mpila mu mpila. ‘Watemona meso ma muntu wawutuka mpofo.’ (Yoane 9:​1-7, 32, 33) Kuna lembama kwawonso, Yesu wawuka nkwa wazi. (Maku 1:​40-​42) Vava bantwasila “fwa-matu, yo nkukumi,” Yesu wasonga vo lenda ‘wisa afwa-matu yo vovesa mababa.’​—⁠Maku 7:​31-37.

Ntinu ndioyo wasolwa kwa Nzambi wakala ye nkuma wa fula mafwa. Yesu nkumbu ntatu kafula mafwa. Wafula mwan’amosi wa nkento ansona, dumbelele kia mvu 12 ye Lazaro wa nkundi andi anzolwa.​—⁠Luka 7:​11-15; 8:​41-55; Yoane 11:​38-44.

Vava kayika mambu mambote bevingilanga awana besakalelanga Kintinu kia Nzambi, Yesu wasakula muna Yoane wa ntumwa oku vo: “Tala, e saba kia Nzambi kina yo wantu, kakala yau, bekala nkangu andi, Nzambi yandi kibeni okala yau, se Nzambi au: kakunguna mansanga mawonso muna meso mau; o lufwa, ke lukala diaka ko; musungula kala diaka dilu, yovo kazu, ngatu mpasi: oma mantete maviokele.” (Lusengomono 1:1; 21:​3, 4) Yindula una ukala e nza yakondwa dilu ye ntantu, mpasi ye lufwa. I bosi kilungana e sambu tusambanga vo luzolo lwa Nzambi luavangama ova ntoto nze una lwavangamena kun’ezulu.

E Kintinu kia Nzambi nkia ntangwa kikwiza? Yesu walonga vo luyalu lwa kintinu kiandi luyantika vava kifwana e ntangwa yasikidiswa ina kayikila vo ‘nkal’andi.’ Yesu wayika ungunza mu songa e ntangwa keyantika yala se ntinu muna kintinu kia nkuma. E ntangwa yayi izayilwa muna mambu mevangama mu nza yawonso nze, vita, nzala, nzakama za ntoto, vuku ye wokela kwa umpumbulu. (Matai 24:​3, 7-12; Luka 21:​10, 11) Mambu mama ye makaka mpe kavova Yesu mevangamanga tuka muna mvu wa 1914 kianwana Vit’Antete ya Nz’Amvimba. Ozevo, Yesu oyalanga se Ntinu. Ke kolo ko Kintinu kiaki kikwiza ova ntoto mu lungisa luzolo lwa Nzambi. *

E ngiz’a Kintinu kia Nzambi nkia nsasa ina kwa ngeye? Olenda yo zaya muna mpila ina obadikilanga malongi ma Yesu.

[Mvovo Vana Yand’a lukaya]