Dahme Sises Ketin Padahngki Duwen Wehin Koht?

“Sises ahpw ketin kakahnseli nan kahnimw oh nan kousapw akan, ketin kapakapahrengki Rongamwahu duwen Wehin Koht.”​—LUK 8:1.

KITAIL kin perenki koasoia soahng kan me kesempwal ong kitail. Duwehte me Sises mahsanih, “ewen aramas kin kapwadewei audepen nan kapehde.” (Madiu 12:34) Ni atail kin tehk dahme Sises kin mahsanih erein sapwellime doadoahk en kalohk, kitail kak kilang me Wehin Koht wia mehkot me uhdahn kesempwal ong ih.

Dahkot Wehin Koht? Wehi ehu iei koperment ehu me nanmwarki men kin kaunda. Eri Wehin Koht iei koperment ehu me Koht ketin koasoanehdi. Sises kin ketin padahngki laud duwen Wehin Koht oh e ketin wiahkihla met oaralap en sapwellime padahk. Koasoiepen Wehio kin pwarada pak tohto sang 110 nan pwuhken Rongamwahu pahieuo. Ahpw Sises sohte kin ketin padahngkihte met. Sapwellime wiewia kan pil kin kasalehda laud duwen Wehin Koht oh dahme e pahn wia.

Ihs me wia Nanmwarki? Kaidehn aramas me usada Nanmwarki en Wehin Koht. Ahpw Koht me ketin pilada Kaun menet. Sises ketin kasalehda nan sapwellime padahk me Koht ketin pilada ih en wia Nanmwarki.

Sises mwahngih me kokohp kan en Paipel kin kasalehda me Mesaia me inoupe mie pahn kaunda Wehi ehu me sohte imwi. (2 Samuel 7:12-14; Daniel 7:13, 14; Madiu 26:63, 64) Taman me Sises ketin kasalehda ni sansal me ih iei Mesaiao. Sises kin ketin kadehdehda me ih iei Nanmwarkio me Koht ketin pilada. (Sohn 4:25, 26) Ihme kahrehda Sises ketin doadoahngki lepin lokaia wet “ei wehi” ekei pak.​—Sohn 18:36.

Sises pil ketin padahngki me mie me pahn iang ih kakaun nan Wehio. (Luk 22:28-30) E kin ketin likwerikin irail pwukat “kisin pwihn sihpw,” pwehki e koasoandier uwen tohtohn irail. E mahsanihong irail: “Samamwail kupwurperenkidahr en ketikihong kumwail sapwellime wehi.” (Luk 12:32) Kaimwiseklahn pwuhk en nan Paipel kin kasalehda me irail meh 144,000 me pahn ale kapai en iang Krais kakaun.​—Kaudiahl 5:9, 10; 14:1.

Ia wasa me Wehio mi ie? Sises mahsanih ong kaunen Rom Pontius Pailet: “Ei wehi, kaidehn kisehn sampah wet.” (Sohn 18:36) Wehin Koht me Krais kin ketin kakaun sohte pahn doadoahngki aramas pwehn kaunda. Sises kin pwurepwurehng mahsanih me Wehin Koht iei “wehin nanleng.” * (Madiu 4:17; 5:3, 10, 19, 20, NW) Eri, Wehin Koht iei koperment ehu nanleng.

Sises ketin kasik en pwurdahla nanleng mwurin  e ketiket pohn sampah. E mahsanih me e pahn ‘kaunopadahng dewerail’ nanleng pwe ienge kaun akan en iang ih wasao.​—Sohn 14:2, 3.

Dahme Wehio pahn wia? Sises ketin padahkihong irail kan me kin rong ih en kapakap ong Koht nda: “Mweimwi [“wehiomwi,” NW] en pweida wasa koaros, kupwuromwi en kin wiawi nin sampah duwen eh kin wiawi nanleng.” (Madiu 6:9, 10) Kupwuren Koht pweidahier nanleng. Wehio me Koht pahn ketin doadoahngki pwehn kapwaiada kupwuren Koht nin sampah. Pwe met en kak wiawi, Wehio pahn wiahda wekidekla laud kan nin sampah.

Dahme Wehio pahn wiahiong sampah? Sises ketin padahngki me Wehin Koht pahn kihsang suwed koaros ni eh pahn kasorehla irail kan me kin wia me suwed. (Madiu 25:31-34, 46) Met wehwehki me soangen suwed koaros pahn imwisekla. Sises ketin padahngki me sampah pahn direkihla aramas “me nan kapehd opampap akan,” me pwung kan, me diren mahk, “me nan kapehd mwakelekel kan,” oh irail me kin wiahda popohl.​—Madiu 5:5-9.

Ia duwe, irail me lelepek kan anahne mi nan sampah suwed ehu? Uhdahn soh! Mahsie kokohp kan en Paipel kohpadahr me kaun me pilipildahro pahn wiahda sampah en pwurehng wiahla paradais duwehte mwetuwel en Ihden. (Aiseia 11:1-9) Sises ketin kadehdehda me Wehin Koht pahn wiahda wekidekla kaselel pwukat. Ni en ohl emen me langada limwahn Sises peki reh en taman ih ni eh pahn ket nan sapwellime Wehio, Sises mahsanihong ih: “I ndaiong uhk ni mehlel rahnwet, ke pahn iang ie mi nan Paradais.” (Luk 23:42, 43, NW) Ei, Wehin Koht pahn wiahda sampah wet en wiahla paradais ehu.

Dahme Wehio pahn pil wiahiong aramas? Sises ketin wia laudsang inoukihdahte dahme Wehin Koht pahn wia. E pil ketin kasalehda dahme e pahn wia. Sises ketin wiahda manaman tohto pwehn kasalehda dahme e  pahn ketin wia nan sampah pwon ni ahnsou kohkohdo erein kaundahn sapwellime Wehi. Ehu pwuhken Rongamwahu ko mahsanih duwen Sises: “Sises eri ketin kakahnseli nan Kalili pwon, kawekawehweseli nan sinakoke kan en mehn Suhs akan, kapakapahrengki Rongamwahu en Wehin Koht, oh kamwakamwawihala soangen soumwahu oh luwet koaros rehn aramas akan.”​—Madiu 4:23.

Sises ketin kamwahwihala soangsoangen soumwahu kan. E ketin “kapehdpeseng pwoaren mesen me maskun sang ni eh ipwidi.” (Sohn 9:1-7, 32, 33) Sises ketin kapahla nin limeo oh doahke ohl emen me ahneki soumwahu en tokutok pwehn kamwahwihala ih. (Mark 1:40-42) Ni ahnsou me “ohl salengepon oh lohteng men” wisikdo rehn Sises, e ketin kasalehda me e kak kamwahwihala “me salengepon kan en rongada wasa oh kin ketin kalokaiahda me lohteng kan.”​—Mark 7:31-37.

Sapwellimen Koht Nanmwarki pilipilda pil kak kamourada me melahr akan. Pak siluh me e kileldi nan Paipel duwen en Sises eh ketin kaiasada me melahr akan. E ketin kaiasada nein liohdi men nah iehros, serepein men me sounpar 12, oh kompoakepah Lasarus.​—Luk 7:11-15; 8:41-55; Sohn 11:38-44.

Sises ketin padahkihong wahnpoaron Sohn duwen ahnsou kaselel me pahn kohdo ong irail kan me pahn mi pahn kaundahn Wehin Koht: “Iet tehnpas en Koht rehn aramas akan! E pahn ketiket rehrail, oh irail pahn wiahla sapwellime aramas. Pein Koht pahn kin ketiket rehrail oh e pahn wiahla ar Koht. E pahn kin ketin limwihasang pilen masarail koaros. Mehla solahr pahn wiawi, solahr mwahiei, solahr nsensuwed, solahr medek. Soahng mering kan sohralahr.” (Kaudiahl 1:1; 21:3, 4) Song medewehla duwen sampah ehu me sohte mwahiei, medek oh mehla! Ih ahnsowo me kapakap me kupwuren Koht pahn wiawi sampah duwehte nanleng pahn pweida mehlel.

Iahd me Wehin Koht pahn pweida? Sises ketin padahngki me sapwellime kaunda pahn tepida wiawi ni ahnsou me “kaimwiseklahn koasoandi en mehkan” pahn wiawi. Sises ketikihda kokohp oaritik kan pwehn kasalehda iahd me e pahn tepida kakaun nin duwen Nanmwarki men. Ahnsowo pahn sansalkihda kahpwal kan me pahn wiawi nin sampah pwon me duwehte, mahwen kan, duhpek, rerrer en sahpw akan, soumwahu lusulus akan, oh suwed pahn paraparala wasa koaros. (Madiu 24:3, 7-12, NW; Luk 21:10, 11) Mepwukat iangahki soahng tohto teikan me Sises ketin kohpadahr kin tepida wiawi sang nan pahr 1914, iei pahr me Mahwen Keieu en Sampah wiawi. Eri met Sises ketin wie kakaun nin duwen Nanmwarki men. Ni ahnsou keren, Wehio pahn kohdo oh kahrehiong kupwuren Koht en pweida nin sampah. *

Dahme pweidahn Wehin Koht pahn wiahiong uhk? Met kin pidada ia duwen omw mwekidki mahsen en Sises.

[Nting tikitik kan me mi pah]