Diospa Gobiernonmanta Jesuspa yachachisqankuna

“[Jesusmi] purirqan llapa llaqtakunata huch’uy llaqtakunatawan, Diospa qhapaqsuyunmanta allin willakuykunata willaspa.” (LUCAS 8:1.)

JESUSMI nirqan: “Imachus sonqopi hunt’a kashan chaytan simiqa riman”, nispa (Mateo 12:34). Imatachus allinpaq qhawarinchis chaymantan llapanchispas rimayta munanchis. Jesusqa Diospa qhapaqsuyunmantan rimallaqpuni. Paypaqqa chaymanta rimaymi aswan importante karqan.

¿Imataq Diospa qhapaqsuyunri? Chayqa Diospa churasqan gobiernon, chaypaqtaq churan huk reyta. Jesusqa chay gobiernomantan rimallaqpuni, tawantin Evangeliokunapiqa 110 kutita hinaraqmi rikhurin chaymantaqa. ¿Imaynatan yachasunman astawan chay Gobiernomanta, imakuna ruwananmantapas? Chaypaqqa yachananchismi Jesuspa rimasqanmanta ruwasqanmantawan.

¿Pitaq chay reyri? Chay reyqa Jesucriston. Paytaqa kikin Diosmi akllarqan, manan runachu.

Biblian nirqan Mesías chay gobiernopi kamachikuq kananta, Jesuspas chaytaqa yacharqanmi (2 Samuel 7:12-14; Daniel 7:13, 14; Mateo 26:63, 64). Maypachachus pay willarqan Mesías kasqanta chayqa, Diospa Gobiernonpi rey kananmantan nisharqan (Juan 4:25, 26). Chayraykun askha kutipi chay gobiernomanta nirqan: ‘Ñoqaqmi’, nispa (Juan 18:36).

Jesusqa rimallarqantaqmi huk runakunawan kuska gobiernamunanmanta (Lucas 22:28-30). Paykunatan suticharqan: “Pisi t’aqa”, nispa. Nillarqantaq: ‘Yayaykichismi gobiernonta qosunkichis’, nispa (Lucas 12:32). Apocalipsis qelqan willan 144.000 runakuna chaypaq akllasqa kasqankuta (Apocalipsis 5:9, 10; 14:1).

¿Maymantan gobiernamunqa? Poncio Pilatotan Jesús nirqan: ‘Gobiernoyqa manan kay pachamantachu’, nispa (Juan 18:36). Chayraykun Jesusqa mana necesitanqachu runakunaq organizacionninpa ima yanapaynintapas kamachimunanpaq. Hanaq pachapin churasqa kashan chay gobiernoqa, chaymi Jesusqa askha kutipi chayta suticharqan: ‘Hanaq pacha gobierno’, nispa (Mateo 4:17; 5:3, 10, 19, 20). *

Jesusqa yacharqanmi kay pachapi imachus ruwananta tukuspaqa hanaq pachaman kutipunanta. Chaypin payqa suyamunan  karqan kay pachamanta akllasqa runakunata (Juan 14:2, 3).

¿Imatan ruwanqa chay gobierno? Jesusmi qatikuqninkunata yachachirqan Diosmanta khaynata mañakunankupaq: “Qhapaqsuyuyki hamuchun, munayniyki kay pachapi ruwakuchun, imaynan hanaq pachapipas ruwakun hinata”, nispa (Mateo 6:9, 10). Diospa munayninqa hanaq pachapiqa ruwakushanñan, Gobiernontaqmi munaynintapas hunt’achinqa kay pachapi. Ichaqa chaypaqqa imaymanakunataraqmi ruwanqa.

Millay kawsaytan tukuchinqa. Jesuspa nisqan hina, Diospa Gobiernonqa kay pachapi millay kawsaytan chinkachinqa millay runakunata wañuchispa (Mateo 24:37-39). Chhaynapin manaña kanqachu ñak’ariypas ima mana allinpas. Aswanpas ‘llamp’u sonqo’, chanin, khuyapayakuq, ‘ch’uya sonqoyoq’, thak-kaypi kawsaq runakunallañan pachantinpi kanqa (Mateo 5:5-9).

¿Qhelli pachapichu chay runakuna tiyanqaku? Manapunin. Bibliaqa willarqanñan Diospa akllasqan Kamachikuqqa kay pachata Paraisoman tukuchinanmanta, arí, Edén huerta hinan kay pacha kapunqa (Isaías 11:1-9). Jesuspas willarqanmi Diospa Gobiernon chaykuna ruwananta, paymi nirqan: “Kusisamiyoqmi llamp’u sonqoyoqkunaqa, paykunaqa kay pacha hallp’atan herenciapaq chaskinqaku”, nispa (Mateo 5:5). Arí, Diospa Gobiernonmi kay pachataqa Paraisoman tukuchinqa.

¿Imatawanmi ruwanqa runakunarayku? Jesusqa manan willayllachu willarqan Diospa Gobiernon imakuna ruwananta, aswanmi milagrokunata ruwaspa rikuchirqan cheqaqpuni kasqanta. Askha  onqosqakunatan qhaliyachirqan, chaywanmi rikuchirqan Rey kaspa imakuna ruwananta. Apóstol Mateon khaynata qelqarqan: “Jesustaq Galileantinta purirqan sinagogakunapi yachachispa, Diospa qhapaqsuyunmanta allin willakuykunata willaspa, llapa onqoyniyoq, nanayniyoq runakunata qhaliyachispa”, nispa (Mateo 4:23).

Huk kutinmi ñawsa naceq runata qhaliyachirqan (Juan 9:1-7, 32, 33). Huk kutinpitaq lepra onqoyniyoq runata llamiykuspalla qhaliyachirqan (Marcos 1:40-42). Chaymantapas qhaliyachillarqantaq “huk akllu-roqt’u runata”, arí, payqa ‘roqt’ukunatan uyarichirqan, upakunatan rimarichirqan’ (Marcos 7:31-37).

Diospa akllasqan Reyqa wañusqakunatapas kawsarichirqanmi. Bibliapin willan huk viudaq wawanta, 12 watayoq sipaschata, amigon Lazarotawan kawsarichisqanta (Lucas 7:11-15; 8:41-55; Juan 11:38-44).

Jesusmi apóstol Juanman willarqan Diospa Gobiernon runakunapaq imakuna ruwananta, paymi nirqan: “Kunanqa runakunawanñan Diosqa tiyan [...]. Diosmi paykunaq ñawinkumanta tukuy weqeta pichanqa, manan wañuypas kanqañachu, manallataqmi llakikuypas, waqaypas, nanaypas kanqañachu, ñawpaqkaqkunaqa manaña kapusqanrayku”, nispa (Apocalipsis 1:1; 21:3, 4). May sumaqchá kay pachapiqa kawsay kanqa llakikuy, nanay, wañuypas chinkapuqtin. Chhaynapin Diospa munaynin kay pachapi ruwakunqa “yayayku” mañakuypi nisqan hina.

¿Hayk’aqmi qallarinqa gobiernayta? Jesusqa kamachikuytaqa qallarinan karqan ‘kay tiempo p’uchukapunanpaqña kashaqtinmi’. Chay tiempopin kanan karqan: guerrakuna, yarqaykuna, terremotokuna, mast’arikuq onqoykuna ima; millay ruwaq runakunapas yapakunanmi karqan (Mateo 24:3, 7-12; Lucas 21:10, 11). Chaykunataqa alayritan rikukurqan 1914 watamantapacha, chay watapin qallarirqan primera Guerra Mundial nisqa. Chaywanmi yachanchis Jesusqa hanaq pachapi Reyña kasqanta. Chhaynaqa pisillañan kashan Diospa Gobiernon kay pachata kamachimunanpaq, Diospa munaynin hunt’akunanpaqwan. *

Diospa Gobiernon hamuqtin, ¿iman ñoqanchismanta kanqa? ¿Kawsasunchu icha wañusunchu? Jesuspa yachachikusqanman hina kawsasunchis chayqa, wiñaypaqmi kawsasun.

[Uranpi willakuykuna]