San Yesus ben leri sma fu a Kownukondre fu Gado
San Yesus ben leri sma fu a Kownukondre fu Gado
„A bigin go na ala den foto nanga den dorpu fu preiki a bun nyunsu fu Gado kownukondre.”—LUKAS 8:1.
WI LOBI fu taki fu sani di de prenspari gi wi, noso sani di wi lobi. Yesus srefi ben taki dati „san furu na ati, na dati mofo e taki” (Mateyus 12:34). Te wi poti prakseri na den sani di Yesus ben taki di a ben e du en diniwroko, dan wi kan taki dati a Kownukondre fu Gado ben de tumusi prenspari gi en.
San na a Kownukondre fu Gado? Wan kownukondre na wan tirimakti di abi wan kownu leki tiriman. Sobun a Kownukondre fu Gado na wan tirimakti di Gado seti. Yesus ben e taki furu fu a Kownukondre fu Gado, a ben de a moro prenspari sani fu san a ben taki. Moro leki 110 leisi den fo Evangelietori e taki fu a Kownukondre dati. Ma Yesus no ben e gi leri wawan fu a Kownukondre. Den sani di a ben du, leri sma furu sani tu fu Gado Kownukondre èn san a tirimakti disi o du.
Suma na a Kownu? A no libisma poti a sma di o tiri leki kownu fu Gado Kownukondre. Ma na Gado srefi poti a Tiriman disi. Di Yesus ben e gi leri, dan a sori taki en na a sma di Gado poti leki kownu.
Yesus ben sabi taki den Bijbel profeititori ben taki na fesi taki a Mesias di Gado pramisi ben o tiri wan Kownukondre di o tan fu ala ten (2 Samuel 7:12-14; Danièl 7:13, 14; Mateyus 26:63, 64). Memre taki Yesus ben taki krin dati ensrefi ben de a Mesias dati. Na so fasi Yesus ben e agri taki en na a Kownu di Gado poti fu tiri (Yohanes 4:25, 26). Dati meki a fiti taki Yesus ben gebroiki den wortu „mi kownukondre”, difrenti leisi.—Yohanes 18:36.
Yesus ben sori tu taki tra sma ben o tiri makandra nanga en na ini a Kownukondre (Lukas 22:28-30). A kari den sma disi wan „pikin ipi”, fu di den sma disi no furu. A ben taigi den: „Un Tata feni en bun fu gi unu a kownukondre” (Lukas 12:32). A lasti buku fu Bijbel e sori taki ala nanga ala 144.000 sma o abi a grani fu tiri makandra nanga Krestes.—Openbaring 5:9, 10; 14:1.
Pe a Kownukondre de? Yesus ben taigi a Rome tiriman, Pontius Pilatus: „Mi kownukondre no de fu a grontapu disi” (Yohanes 18:36). A Kownukondre fu Gado, di abi Krestes leki Kownu, no o tiri nanga yepi fu libisma tiriman. Ibri tron baka Yesus ben taki fu a Kownukondre fu Gado, leki „a kownukondre fu hemel” (Mateyus 4:17; 5:3, 10, 19, 20). * Sobun, a Kownukondre fu Gado na wan hemel tirimakti.
Yesus ben angri trutru fu drai go baka na hemel, baka di a kaba a diniwroko fu en na grontapu. A ben taki dati te a go drape, a ben o „sreka wan presi” gi den tra tiriman so taki den kan kon tu pe a de.—Yohanes 14:2, 3.
San a Kownukondre o du? Yesus leri den arkiman fu en fu begi Gado: „Meki yu wani pasa na grontapu soleki fa a e pasa na hemel” (Mateyus 6:9, 10). A wani fu Gado e pasa na hemel. Nanga yepi fu a Kownukondre, den sani di Gado abi na prakseri gi grontapu, o kon tru. Fu meki a wani fu Gado pasa, a Kownukondre o tyari bigi kenki kon na a grontapu disi.
San a Kownukondre o du na grontapu? Yesus leri sma taki a Kownukondre fu Gado o tyari wan kaba kon na ogridu, fu di a o pori den sma na grontapu di de nomonomo fu du ogri (Mateyus 25:31-34, 46). Dati wani taki dati wan kaba o kon na ala kruktudu nanga ogridu. Dan soleki fa Yesus leri, grontapu o furu nanga sma di abi „safri-ati”, di e du san reti, di abi sari-ati gi trawan, di abi „wan krin ati”, èn di e suku vrede.—Mateyus 5:5-9.
Den sma disi di du san Gado wani o libi na ini wan pori grontapu? Nôno, kwetikweti! Yesus ben pramisi taki bigi kenki o kon na grontapu te Gado Kownukondre e tiri. A man di ben spikri na sei Yesus, ben aksi en: „Yesus, memre mi te yu kon na ini yu kownukondre.” Yesus piki en: „Fu tru, mi e taigi yu tide: Yu o de nanga mi na ini Paradijs” (Lukas 23:42, 43). Iya, a Kownukondre fu Gado o kenki a heri grontapu kon tron wan paradijs, neleki a wan di ben de na ini a dyari fu Eden.
Sortu tra sani a Kownukondre o du gi libisma? Yesus ben du moro leki fu pramisi sma san a Kownukondre fu Gado o du. A ben sori den tu san a Kownukondre o du. Yesus ben dresi furu sma na wan wondru fasi. Na so a ben sori san a o du na heri grontapu te a o tiri leki Kownu. Na Evangelietori di Gado meki sma skrifi e taki disi fu Yesus: „A waka lontu na ini heri Galilea, aladi a ben e gi leri na ini den snoga fu den, èn ben e preiki a bun nyunsu fu a kownukondre. A ben e dresi ibri sortu siki tu nanga ibri sortu mankeri di den sma ben abi.”—Mateyus 4:23.
Yesus ben dresi ala sortu siki. A ben „opo den ai fu wan sma di ben breni di a gebore” (Yohanes 9:1-7, 32, 33). Na wan switi fasi Yesus ben fasi wan man di ben abi a takru siki gwasi, èn a man ben kon betre (Markus 1:40-42). Di sma ben tyari wan ’man di ben dofu èn di no ben man taki bun’, kon na Yesus, dan a sori taki a kan meki ’dofusma yere baka èn taki babaw-sma taki baka’.—Markus 7:31-37.
A Kownu di Gado poti abi a makti srefi fu wiki den dedesma. Na dri okasi di skrifi na ini Bijbel, Yesus gi dedesma wan opobaka. A ben gi wan opobaka na a wan-enkri manpikin fu wan uma di en masra dede, na wan meisje fu 12 yari, èn na en lobi mati Lasarus.—Lukas 7:11-15; 8:41-55; Yohanes 11:38-44.
Yesus ben meki na apostel Yohanes skrifi sortu tumusi moi tamara den borgu fu Gado Kownukondre o abi. Yohanes skrifi: „Luku! A tenti fu Gado de na den libisma, èn Gado o tan nanga den, èn den o de en pipel. Gado srefi o de nanga den. A o figi ala watra puru na den ai, èn dede no sa de moro; nowan sari, noso krei, noso pen no sa de moro. Den fositen sani pasa gowe” (Openbaring 1:1; 21:3, 4). Prakseri a sani disi, wi o libi na ini wan grontapu pe sari no o de, pen no o de, èn dede no o de tu! Na a ten dati, a begi di e taki dati a wani fu Gado o pasa na grontapu, soleki fa a e pasa na hemel, o kon tru dorodoro.
O ten Gado Kownukondre o kon? Yesus leri sma taki a o bigin tiri na a srefi pisi ten di a e kari a „denoya” fu en. Yesus taki finifini fu wan profeititori fu sori o ten a tiri fu en leki kownu ben o bigin. Na a ten dati problema ben o de na heri grontapu, sosrefi feti, angriten, gronseki, siki di e kiri ipi-ipi sma, èn kruktudu ben o de moro nanga moro (Mateyus 24:3, 7-12; Lukas 21:10, 11). Den sani disi èn sosrefi tra sani di Yesus ben taki fu den, ben de spesrutu fu si sensi 1914, a yari di a Fosi Grontapu Feti bigin. Sobun, Yesus e tiri now leki Kownu. Heri esi a ten o doro taki a Kownukondre o meki a wani fu Gado pasa na grontapu. *
Te a Kownukondre fu Gado kon, dan san dati o wani taki gi yu? Dati didon na den sani di yu o du te yu yere a boskopu fu Yesus.
[Futuwortu]
^ paragraaf 8 Den wortu „a kownukondre fu hemel” de fu feni sowan 30 leisi na ini na Evangelietori fu Mateyus.
^ paragraaf 17 Efu yu wani sabi moro fini fa wi du sabi taki Gado Kownukondre de krosibei, dan luku kapitel 9, „Wi e libi na ini ’den lasti dei’?”, na ini a buku San Bijbel e leri wi trutru? Yehovah Kotoigi tyari a buku disi kon na doro.