Jesucristo yatichäwipax yanaptʼiristamwa

“Nayax juttwa jakañanïpxañamataki, ukhamarak jilarkir jakañanïpxañamatakiraki.” (JUAN 10:10)

JESUCRISTOX janiw serviyasiñatak jutkänti jan ukasti sirviriw jutäna. Chiqansa, kuntï yatiykäna ukax jaqinakatakix wali suma churäwipunïnwa, Diosat ukat munañapat kunatï chiqäki uk yatiyäna. Ukhamatwa, millón millón chiqpach cristianonakax sum jakasxapxaraki. * Ukhamarusa, kuntï yatiykäna ukaxa, jiwasar qhispiyañatak jiwawaykäna uk qhanstayarakïna, ukaw taqi kunat sipans suma churäwipaxa. Kunjamxay uka yatiyäwipar istʼchiñäni ukarjamaw jutïrin sum jakasxañäni.

Diosan ukat Criston suma churäwipa Uñisirinakapan jiwañkam tʼaqhisiyatäñäpxa Jesusax sum yatïna (Mateo 20:17-19). Uk yatkasasa, Uraqir jutaskakïnwa. Kunjamtï wali uñtʼat arunakapax Juan 3:16 qillqatan siski: “Diosax akapachar wal munatap laykuw mä sapa Yuqapar khitani, taqi khitinakatix jupar iyawsapki ukanakax jan chhaqañapataki, jan ukasti wiñay jakañanïñapataki” sasa. Qhipatxa, Jesús pachpaw akham säna ‘janiw serviyasiñatak jutkti jan ukasti serviriw jutta, ukhamarak jakañaj churiri walja jaqinakar qhispiyañataki’ sasa (Mateo 20:28). Jichhasti, ¿kunatsa nayaw jakäwix churä janiw apaqapkitaniti sasin sispachäna?

Jaqinakar wal munasitap laykuw Diosax nayrïr chacha warmix jucharu ukat jiwañaru aptʼawaykistu ukanakat qhispiyañ munäna. Ukatwa, jiwasanakar qhispiyañatakix mä sapa Yuqapar jan juchan jakäwip luqtañapataki khitanïna. Ukat Jesusax jakäwip jiwas layku churañatakix jankʼakirakïnwa. Janipuniw uka qhispiyäwjamax yaqha suma churäwix utjkiti, kunattix wiñay jakañ suytʼäwi taqinir churistu. *

Kunjamatsa askinak katuqasma ¿Uka suma churäwitx askinak apsütati? Sapa maynitäxaniwa. Amuytʼañataki: Maynitix mä caja, regal papelamp llawunttʼat churäm siristam ukhaxa, ¿kamachasmasa? “Jankʼakiw yuspärtʼasin katuqtʼasiristxa” sasmawa. Diosax jaqinakar qhispiyäwi churki ukax uka pachparakiwa. Khitinakatix uka qhispiyäwit bendicionanak katuqañ munki ukaxa, katuqañ munatapwa uñachtʼayañaparaki. ¿Kunjamatsa?

Kunjamtï Jesusax siskänxa, jupar iyawsäwi uñachtʼayapkani ukanakakiw wiñay jakañ katuqapxani sasaw säna. Chiqansa, jakäwisampiw iyawsäwinitas uñachtʼaytanxa (Santiago 2:26). Ukhamasti, Jesusar iyawsäwinïñax kuntï yatichkäna lurkäna ukarjam sarnaqañawa. Ukatakix Awkiparu ukat juparu sum uñtʼañasawa. Jesusax akham sänwa: “Aka wiñay jakañax juma sapa chiqpach Diosar uñtʼañanwa utji, ukhamarak Jesucristoru kawkïrirutix jumax khitankta ukaru” sasa (Juan 17:3).

Jesusan yatichäwinakapax millón millón jaqinakaruw jakäwipan yanaptʼawayi, uka yatichäwinakapatxa pä waranq maranakaw pasawayxi. ¿Uka yatichäwinakapat jukʼamp yatxatañ munasmati? ¿Kunjamatsa jumarusa familiamarusa jichhasa wiñayatakis yanaptʼiristam uk yatiñ munasmati? Jehová Diosan Qhanañchirinakapampiw parltʼañama, jupanakaw uka jisktʼanakar qhanañchañ yanaptʼapxätam.

Akxarusti Jesucristot jukʼamp yatichäwinak jikxatarakïta, jupan yatichäwipaw wiñay sum jakasiñamatak yanaptʼätam.

[Qhanañchäwinaka]