Jises Kraist Ifa Usun An Pworaus A Kküü Manauom

“Ngang üa feito pwe oupwe eäni manau, iei ewe manau mi somwola.”​—JON 10:10.

JISES KRAIST a äkkäeüin feitiw fönüfan pwe epwe fangolo, nge sap angei. Ren an angangen afalafal, a ngeni aramas eü liffang esor täppin, ina eü pworaus mi pwäratä ewe enlet usun Kot me letipan we. Chokkewe mi etiwa ena pworaus repwe amürinnölo manauer iei, usun fite million chon Kraist mi enlet ra tongeni pwäratä. * Nge menlapen ena pworaus Jises a afalafala, ina ewe liffang mi aüchea seni meinisin, weween, a fangolo manauan we mi unusöch fän äsengesich. Ach äpilükülükün manau esemuch a alongolong woon ach etiwa ena kinikinin an pworaus mi fokkun lamot.

Minne Kot me Kraist ra fangolo Jises a silei pwe epwe mälo fän riäfföü le pöün chon koputan. (Mattu 20:17-19) Iwe nge, alon we mi iteföülo lon Jon 3:16 a apasa: “Kot a echeni chon fanüfan, pwe a fangela Nöün Aleman, pwe meinisin mi lükü i resap pöütmwälila, pwe repwe eäni manau esemüch.” Jises a pwal apasa pwe a feito pwe epwe “fangala manauan fänäsengesin chomong aramas pwe möön manauer.” (Mattu 20:28) Pwata a erä pwe epwe fangolo manauan nge ese erä pwe repwe angei manauan?

Ren än Kot tong esor täppin, a akkota pwe epwe angasalo aramas seni tipisin Atam me pwününgawan, weween, manau ese unusöch me mälo. A föri ena ren an tinato nöün we äläemön ngeni fönüfan pwe epwe asoresini manauan. Jises a tipeeü ngeni an epwe fangolo manauan mi unusöch fän itach. Ena liffang mi iteni ewe möön kepich, ina än Kot liffang ngeni aramas mi lapalap seni meinisin. * Ena liffang a tongeni emmwenikich ngeni manau esemuch.

Minne a lamot kopwe föri Ewe möön kepich, ina liffangom? A pwisin nonnom reom. Äwewe chök: Anchangei mwo pwe emön a eiti ngonuk eü pworun liffang mi tükütükülo. Ren enletin, ese mwo iteni liffangom ika pwe kese eitiewu poum me angei. Pwal ina chök usun, Jiowa a eiti ngonuk ewe möön kepich, nge esap mwo liffangom ika pwe kese etiwa. Ifa usun?

Jises a apasa pwe chokkewe mi anganga ar “lükü” i repwe eäni manau esemuch. Lükü a pwälo ren föfförün lon manauom. (Jemes 2:26) Ach anganga ach lükü Jises a wewe ngeni ach älleasochisi ekkewe mettoch a apasa me föri. Ren ach föri ena, sipwe wesewesen silefichi Jises me Seman we. Jises a apasa: “Iwe, iei manau esemuch: Ar repwe silei en, ewe eman chök Kot mi let, repwe pwal silei Jesus Kraist, ewe ka tinato.”—Jon 17:3.

2,000 som ier loom, Jises Kraist a apworausa eü pworaus mi siwili manauen fite million aramas woon unusen fönüfan. Ka mochen alapalo om silei ena pworaus me ifa usun ämi me attongom kewe oupwe küna feiöch seni, sap chök iei, pwe pwal tori feilfeilo? Chon Pwäratä Jiowa repwe pwapwa le älisuk.

Ewe lesen mwirin ei epwe alapalo om silei Jises Kraist, ewe mwän mi afalafala eü pworaus mi tongeni siwili manauom tori feilfeilo chök.

[Ekkewe pwóróus fan]