Zezi Kri, son mesaz e ou

“Mon’n vini pour zot ganny lavi, en lavi konplet.”—ZAN 10:10.

ZEZI KRI ti vin lo later avan tou pour donnen me pa pour resevwar. Atraver son minister i ti ofer limanite en kado, enn ki nou pa kapab atas okenn pri avek. Sa kado i sa mesaz ki revel laverite lo Bondye ek Son lavolonte. Bann ki byen reazir anver sa mesaz i kapab viv en lavi satisfezan la konmela, parey plizyer milyon vre Kretyen in eksperyanse pour zot menm. * Sa mesaz ki i ti prese i santre lo sa kado pli presye, son lavi parfe ki i’n donnen pour nou. Nou byennet a lavenir i tou depan lo lafason nou reazir anver sa laspe pli enportan dan son mesaz.

Ki Bondye ek Zezi in donn nou Zezi ti konnen ki son bann lennmi ti pou touy li dan en fason kriyel. (Matye 20:17-19) Me malgre sa, dan son parol ki bokou dimoun i konn tre byen, i ti dir: “Bondye in telman kontan lemonn ki i’n donn son sel Garson, pour ki nenport ki, ki krwar dan li, pa pou mor, me i a ganny lavi eternel.” (Zan 3:16, nou ki’n met an italik.) Zezi ti osi dir ki in vin pour “donn son lavi konman pri pour liberasyon bokou dimoun.” (Matye 20:28, nou ki’n met an italik.) Akoz i ti dir ki son lavi pou ganny donnen olye ganny pran?

Pouse par son lanmour ki pli siperyer, Bondye ti fer laranzman pour liber bann imen dan pese ki zot in erite e avek son bann konsekans, ki enkli lenperfeksyon ek lanmor. Bondye ti fer sa par anvoy son sel Garson byenneme lo later pour mor pour nou. Zezi ti volonterman aksepte pour fer sa par sakrifye son lavi parfe konman en imen pour nou. Sa laranzman ki Bondye in fer i apel en ranson e sa i sa pli gran kado ki Bondye in donn limanite. * I en kado ki kapab fer nou ganny lavi eternel.

Ki ou bezwen fer? Pour ou personnelman, eski ou konsider ranson konman en kado? Sa i tou depan lo ou. Annou pran en legzanp: Fer krwar en dimoun i donn ou en kado ki’n ganny anpakte dan papye kado. I pa vreman vin ou kado si ou pa anvoy ou lanmen pour pran sa kado e aksepte li. Pareyman, Zeova in fer sa laranzman ranson pour ou, me sa kado pa pou vreman vin pour ou si ou pa fer ou par pour aksepte sa kado. Ki mannyer ou kapab fer sa?

Zezi ti dir ki se bann ki “krwar” dan li ki pou ganny lavi eternel. Lafason ou viv ou lavi i demontre si ou annan lafwa. (Zak 2:26) Pour krwar dan Zezi i vedir viv ou lavi an armoni avek sa ki i ti dir e fer. Pour fer sa, ou bezwen konn Zezi ek son Papa byen. Zezi ti dir: “Ou’n donn li pouvwar lo tou dimoun pour donn lavi eternel tou bann ki ou’n donn li. Savedir ki zot konn ou konman sel vre Bondye, ek Zezi-Kri ki ou’n anvoye.”—Zan 17:2, 3.

Apepre 2,000 an pase, Zezi Kri ti partaz en mesaz ki’n sanz lavi plizyer milyon dimoun dan lemonn antye. Eski ou ti pou kontan konn plis lo sa mesaz e ki mannyer ou ek bann ki ou kontan i kapab benefisye avek sa mesaz pa zis la konmela me pour touzour? Temwen Zeova pou byen kontan pour ed ou.

[Not anba lo paz]