Jesus Christ—Nte Etop Esie Ebehede Fi

“Ami ndi man mmọ ẹkpenyene uwem ẹkpenyụn̄ ẹnyene enye uwak uwak.”—JOHN 10:10.

JESUS CHRIST ekedi isọn̄ man ọnọ owo n̄kpọ idịghe man ẹnọ enye. Enye ama ada utom ukwọrọikọ esie ọnọ ubonowo ata ọsọn̄urua enọ—kpa etop oro anamde ẹfiọk Abasi ye uduak Esie. Mbon oro ẹnyịmede etop oro ẹkeme ndidu eti uwem idahaemi, ndien ata ediwak Christian ẹkeme ndisọn̄ọ ke emi edi akpanikọ. * Edi se idide ata akpan n̄kpọ ke etop oro Jesus ọkọkwọrọde edi akakan enọ oro enye ọkọnọde—kpa mfọnmma uwem oro enye ọkọnọde ke ibuot nnyịn. Nte nnyịn inamde n̄kpọ iban̄a akpan ikpehe emi ke etop esie edinam nnyịn inyene nsinsi uwem.

Se Abasi ye Christ ẹkenọde Jesus ama ọfiọk ke mme asua ẹdiwot imọ ubiak ubiak. (Matthew 20:17-19) Kpa ye oro, enye eketịn̄ ke John 3:16 oro ẹtịmde ẹmehe ete: “Abasi ama enen̄ede ama ererimbot tutu enye ọnọ ikpọn̄-ikpọn̄ edibon Eyen esie, man owo ekededi eke ọbuọtde idem ye enye okûtak edi enyene nsinsi uwem.” Jesus ama ọdọhọ n̄ko ke imọ ikedi man ‘inọ ukpọn̄ [m̀mê, uwem] imọ nte ufak ke ibuot ediwak owo.’ (Matthew 20:28) Ntak emi enye ọkọdọhọde ke idinọnọ uwem imọ utu ke ndidọhọ ke ẹdidada?

Anana-mbiet ima ama anam Abasi anam ndutịm man anyan̄a mme owo osio ke ndammana idiọkn̄kpọ ye mme utịp esie—oro edi, unana mfọnmma ye n̄kpa. Abasi akanam emi ke ndinọ ikpọn̄-ikpọn̄ Eyen esie edi isọn̄ edikpa n̄kpa uwa. Jesus ama enyịme emi onyụn̄ ọnọ mfọnmma uwem esie ke ibuot nnyịn. Enọ emi, emi ẹkotde ufak, edi akakan enọ emi ẹnọde ubonowo. * Enye edi enọ emi ekemede ndinam owo enyene nsinsi uwem.

Se anade afo anam Ndi afo ke idemfo amada ufak emi nte enọ? Mbubehe fo edi oro. Ke uwụtn̄kpọ, yak idọhọ ke owo osio ekwo anyan ọnọ fi. Ke nditịm ntịn̄, enye idịghe kan̄a okwommọ tutu afo anyan ubọk ọbọ enye. Kpasụk ntre, Jehovah ọnọ fi ufak, edi enọ emi idịghe kan̄a okwommọ ibọhọke afo anyan ubọk ọbọ enye. Didie?

Jesus ọkọdọhọ ke mbon oro ‘ẹbuọtde idem’ ye imọ ẹdibọ nsinsi uwem. Mbuọtidem abuana nte afo odude uwem fo. (James 2:26) Ndibuọt idem ye Jesus ọwọrọ ndidu uwem ekekem ye mme n̄kpọ oro enye eketịn̄de onyụn̄ anamde. Man anam oro, ana afo enen̄ede ọfiọk Jesus ye Ete esie. Jesus ọkọdọhọ ete: “Nsinsi uwem ọwọrọ mmọ ndinyene ifiọk mban̄a fi, ata Abasi kierakiet, ye enye emi afo okosiode ọdọn̄, kpa Jesus Christ.”—John 17:3.

N̄kpọ nte isua 2,000 emi ẹkebede, Jesus Christ ama ọkwọrọ etop oro okpụhọrede uwem ata ediwak owo ke ofụri ererimbot. Ndi akpama ndifiọk n̄kpọ en̄wen mban̄a etop oro ye nte afo ye mme owo fo ẹkemede ndibọ ufọn esie, idịghe idahaemi kpọt, edi ke nsinsi? Mme Ntiense Jehovah ẹtetie ẹbet ndin̄wam fi.

Mme ibuotikọ oro ẹtienede ẹyen̄wam fi ọdọdiọn̄ ọfiọk Jesus Christ, kpa owo emi ọkọkwọrọde etop oro ekemede ndikpụhọde uwem fo.

[Mme Ikọ Idakisọn̄]