Yesu Kristo Bɔ ni Eshɛɛ Sane lɛ Kɔɔ Ohe

“Miba beni afee ni amɛná wala ni amɛná ni ateke nɔ.”—YOHANE 10:10.

YESU KRISTO ba shikpɔŋ nɛɛ nɔ koni efee ejurɔ shi jeee ni afee lɛ ejurɔ. Etsɔ esɔɔmɔ nitsumɔ lɛ nɔ eha adesai nikeenii ko ni nɔ bɛ—eshɛɛ sane lɛ ha ale anɔkwale ni kɔɔ Nyɔŋmɔ kɛ Esuɔmɔnaa nii lɛ he lɛ he nii. Mɛi ni boɔ nakai shɛɛ sane lɛ toi lɛ baanyɛ aná shihilɛ ni miishɛɛ yɔɔ mli amrɔ nɛɛ taakɛ eji yɛ anɔkwa Kristofoi akpekpei abɔ agbɛfaŋ lɛ. * Nɔ ni ji otu yɛ Yesu shɛɛ sane ni eshiɛ lɛ mli ji nikeenii ni jara wa kɛha mɛi fɛɛ—wala ni eye emuu ni ekɛha yɛ wɔhewɔ lɛ. Wɔ wɔsɛɛ naanɔ shihilɛ damɔ bɔ ni wɔhereɔ shɛɛ sane ni he hiaa waa nɛɛ wɔhaa lɛ nɔ.

Nɔ ni Nyɔŋmɔ kɛ Yesu kɛha Yesu le akɛ esa akɛ egbo piŋmɔ gbele yɛ ehenyɛlɔi lɛ adɛŋ. (Mateo 20:17-19) Kɛlɛ, ewiemɔi ni ale jogbaŋŋ ni yɔɔ Yohane 3:16 lɛ kɛɔ akɛ: ‘Nyɔŋmɔ sumɔ je lɛ, akɛ eŋɔ ebi koome lɛ eha, koni mɔ fɛɛ mɔ ni heɔ enɔ yeɔ lɛ hiɛ akakpata, shi moŋ ená naanɔ wala.’ Yesu wie hu akɛ eba koni ‘eŋɔ esusuma [loo wala] lɛ eha yɛ mɛi pii akpɔmɔ hewɔ.’ (Mateo 20:28) Mɛni hewɔ ewie ákɛ ebaaŋɔ ewala eha shi jeee ni abaaŋɔ ewala lɛ?

Suɔmɔ ni nɔ bɛ ji nɔ ni tsirɛ Nyɔŋmɔ ni eto gbɛjianɔ koni akɛkpɔ̃ adesai kɛjɛ esha kɛ nibii ni ejɛ mli kɛba lɛ mli—emuu ni ayeee kɛ gbele lɛ mli. Nyɔŋmɔ fee enɛ kɛtsɔ e-Bi koome lɛ ni etsu kɛba shikpɔŋ lɛ nɔ koni ebagbo afɔleshaa gbele lɛ nɔ. Yesu jɛ esuɔmɔ mli ekpɛlɛ nɔ, ni ekɛ adesa wala ni yeɔ emuu ni eyɔɔ lɛ baha yɛ wɔhewɔ. Atsɛɔ gbɛjianɔtoo nɛɛ akɛ kpɔ̃mɔnɔ lɛ, ni eji Nyɔŋmɔ nikeenii ni fe fɛɛ ni ekɛha adesai. * Eji nikeenii ni baanyɛ ekɛ mɔ aya naanɔ wala mli.

Nɔ ni esa akɛ ofee Ani kpɔ̃mɔnɔ lɛ ji nikeenii kɛha bo akɛ aŋkro? No damɔ bo diɛŋtsɛ onɔ. Ákɛ nɔkwɛmɔnɔ lɛ: Ŋɔɔ lɛ akɛ mɔ ko hiɛ nikeenii ni aha he fɛfɛo ni ekɛ miiha bo. Yɛ anɔkwale mli lɛ, enyɛŋ etsɔ onikeenii ja okpã onine mli ohe yɛ mɔ lɛ dɛ̃. Yɛ gbɛ ni tamɔ nakai nɔŋŋ nɔ lɛ, Yehowa ekpã kpɔ̃mɔnɔ lɛ mli eha bo, shi dani nikeenii nɛɛ baatsɔ onɔ lɛ, ja okpã onine mli ohe. Te ooofee tɛŋŋ onine ashɛ nɔ?

Yesu kɛɛ akɛ, mɛi ni “náa emli hemɔkɛyeli” lɛ ji mɛi ni baaná naanɔ wala. Bɔ ni ohiɔ shi ohaa lɛ haa anaa akɛ oyɛ hemɔkɛyeli. (Yakobo 2:26) Hemɔkɛyeli ni oooná yɛ Yesu mli lɛ tsɔɔ akɛ obaahi shi yɛ nibii ni ewie kɛ nibii ni efee lɛ anaa. Bɔni afee ni onyɛ ofee nakai lɛ, esa akɛ ole Yesu kɛ e-Tsɛ lɛ jogbaŋŋ. Yesu kɛɛ akɛ, “Enɛ ji naanɔ wala lɛ, ákɛ amɛle bo, anɔkwa Nyɔŋmɔ kome lɛ, kɛ Yesu Kristo, mɔ ni otsu lɛ.”—Yohane 17:3.

Aaafee afii 2000 ni eho nɛ lɛ, Yesu Kristo shiɛ shɛɛ sane ko, sane nɛɛ etsake mɛi akpekpei abɔ ashihilɛ yɛ je lɛŋ hei srɔtoi fɛɛ. Ani obaasumɔ ni ole nakai shɛɛ sane lɛ, kɛ bɔ ni okɛ osuɔlɔi baanyɛ aná he sɛɛ lɛ he nii babaoo amrɔ nɛɛ kɛ naanɔi fɛɛ? Yehowa Odasefoi baaná he miishɛɛ akɛ amɛaaye amɛbua bo.

Saji ni nyiɛ sɛɛ lɛ baaye abua bo koni ole Yesu Kristo, nuu ni shiɛ shɛɛ sane ni baanyɛ atsake oshihilɛ kɛya naanɔ lɛ he nii babaoo.

[Shishigbɛ niŋmai]