Iesu Kristo Aron Rotakim n Ana Rongorongo

“I roko ngai bwa e aonga n reke te maiu irouia tiibu ao a na maiu n aki toki.”​—IOANE 10:10.

MOAN te kakawaki rokon Iesu Kristo i aon te aba bwa e na anganga ao tiaki n ae e na anganaki. Rinanon ana mwakuri ni minita, e anga te bwaintituaraoi ae moan te kakawaki nakon te botannaomata ae te rongorongo ae kaotaraea te koaua ibukin te Atua ao Ana kantaninga. A kona ni karekea te maiu ae raoiroi riki akana butimwaea te rongorongo anne n aron ae e a tia n oti koauana irouia Kristian ni koaua aika mirion ma mirion. * Ma e boto ana rongorongo Iesu are e tataekinna i aon te bwaintituaraoi ae moan te kakawaki i buakoni bwaai nako, ae maiuna ae kororaoi are e anga ibukira. E boto maiura n aki toki i aon arora nakon iteran ana rongorongo ae moan te kakawaki aei.

Te bwai ae a anga te Atua ao Kristo E ataia Iesu bwa e na boni mate n te aro ae rangi ni kammaraki ni baia taan ribaia. (Mataio 20:17-​19) Ma e ngae n anne, e kangai n ana taeka ake a rangi n ataaki n Ioane 3:16: “E rangi n tangiriia kaain te aonnaba te Atua, n te aro are e a anga Natina ae te rikitemanna, bwa e aonga n aki kamaunaaki ane onimakinna, ma e na reke irouna te maiu are aki toki.” E taekinna naba Iesu ae e roko bwa “e na anga maiuna bwa te kaboomwi ibukia aomata aika bati.” (Mataio 20:28) E aera bwa e taekinna ae e na anga maiuna n oneani mwin are e na anaaki?

Ibukin ana tangira ae korakora te Atua, e a katauraoa iai kamaiuaia aomata man rikiaia ae te bure ao mwina ae te aki kororaoi ao te mate. E karaoa aei te Atua ngke e kanakoa Natina ae ana rikitemanna nako aon te aba bwa e na mate bwa te karea. E kukurei Iesu n ongeaba n anga maiuna ae kororaoi ibukira. E aranaki ana bwaintituaraoi te Atua ae moanibaan te raoiroi aei nakon te botannaomata, bwa te kaboomwi. * Bon te bwaintituaraoi ae kona ni karekea te maiu n aki toki.

Te bwai ae ko riai ni karaoia E koaua ae te kaboomwi te bwaintituaraoi nakoim? E a nakoim anne. Ibukini kamatataana: Iangoia bwa e arora baina temanna nakoim ae taua te bwaintituaraoi ae te bwaoki ae batianaki. Ni koauana, tiaki te bwaintituaraoi nakoim ni karokoa ko arora baim ni butimwaeia. N aron naba anne, e anganiko Iehova te kaboomwi ma e tuai n riki bwa te bwaintituaraoi nakoim ni karokoa ko arora baim ni butimwaeia. N te aro raa?

E taku Iesu bwa tii te koraki ake a “onimakinna” aika a na karekea te maiu are aki toki. E irekereke te onimaki ma aroni maium. (Iakobo 2:26) Onimakinan Iesu e nanonaki iai kaboraoani maium ma baike e taekin ao ni karaoi. Ni karaoan anne, ko riai ni kinaa raoi Iesu ma Tamana. E taku Iesu: “Ibukini karekean te maiu are aki toki, a riai n ataiko ae tii ngkoe te Atua ae koaua, ao n ataa naba teuare ko kanakomaia ae Iesu Kristo.”​—Ioane 17:3.

E tibwaa nako te rongorongo Iesu Kristo 2,000 tabun te ririki n nako, ae e a tia ni bitii maiuia mirion ma mirion aomata ni katobibia te aonnaba. Ko kan ataa riki te rongorongo anne ao te aro ae ko kona ni kakabwaiaaki iai ma akana tangiraki iroum, tiaki tii ngkai ma n aki toki? A kukurei Ana Tia Kakoaua Iehova ni buokiko.

[Kabwarabwara ae nano]