Jesu Kristi—Ovuẹ Riẹ gbe Owhẹ

“Mẹ ze re a wo uzuazọ re a ruẹse woi buobu.”—JỌN 10:10.

UGOGO ẹjiroro nọ Jesu Kristi ọ rọ ziọ otọakpọ họ re ọ kẹ, orọnikọ re o mi hi. Ọ rehọ ẹkwoma odibọgba riẹ kẹ ahwo-akpọ okẹ jọ nọ o ghare thesiwa—ovuẹ nọ u dhesẹ uzẹme na via kpahe Ọghẹnẹ gbe oreva riẹ. Ahwo nọ a jowọ lele ovuẹ yena a rẹ sae reawere emamọ uzuazọ enẹna, wọhọ epanọ Ileleikristi uzẹme buobu nẹnẹ a ruẹ vuhumu no. * Rekọ oware nọ o mai wuzou evaọ ovuẹ nọ Jesu o whowho na họ okẹ nọ u wo ibe he—uzuazọ ogbagba riẹ nọ o si obọ no fiki mai. Obaro akpọ mai o roma hwa oghẹrẹ owọ nọ ma jẹ kpahe abọ nana nọ ọ mai wuzou evaọ ovuẹ riẹ na.

Oware nọ Ọghẹnẹ avọ Kristi a si obọ no fiki mai Jesu ọ riẹ nọ o ti whu uwhu oja evaọ obọ ewegrẹ riẹ. (Matiu 20:17-19) Ghele na, ọ ta evaọ ẹme riẹ nọ ọ rrọ Jọn 3:16 nọ a riẹ gaga na inọ: “Ọghẹnẹ o you akpọ na hrọ, ọ jẹ rehọ Ọmọvo riẹ kẹ, re kohwo kohwo nọ ọ rọwo riẹ o gbe vrẹ hẹ rekọ o re wo uzuazọ ebẹdẹ bẹdẹ.” Jesu ọ tẹ jẹ ta inọ ọ ziọ otọakpọ re ọ “rọ uzuazọ riẹ ta ibuobu.” (Matiu 20:28) Eme ma sae rọ ta nọ uwhu Jesu na yọ odhesẹvia uyoyou nọ o wo kẹ omai?

Uyoyou ulogbo o wọ Ọghẹnẹ ru ọruẹrẹfihotọ nọ a re ro si ahwo-akpọ no uzioraha nọ a reuku riẹ gbe uye nọ u lele i rie—sebaẹgba gbe uwhu. Ọghẹnẹ o ru onana ẹkwoma Ọmọvo riẹ nọ o vi ziọ otọakpọ re ọ rọ uzuazọ riẹ dhidhe. Jesu ọ rọwo, rọ unevaze si obọ no uzuazọ riẹ fiki mai. Ọruẹrẹfihotọ nana, nọ a se ẹtanigbo na họ okẹ nọ o mae rro nọ Ọghẹnẹ ọ kẹ ahwo-akpọ. * Onana yọ okẹ nọ o rẹ sai ru ahwo-akpọ wo uzuazọ ebẹdẹ bẹdẹ.

Oware nọ u fo nọ who re ru Kọ ẹtanigbo na yọ okẹ rọkẹ owhẹ? Obọ ra oyena o rrọ. Wọhọ oriruo: Ma rehọ iẹe nọ ohwo jọ ọ riẹ obọ kẹ owhẹ avọ uko nọ a fare nọ ọ be kẹ owhẹ. Ẹhẹ, okẹ na o rẹ jọ ora ha ajokpanọ whọ riẹ obọ who je mi ei. Epọvo na re, Jihova ọ riẹ abọ kẹ owhẹ avọ okẹ ẹtanigbo na, rekọ okẹ na o rẹ sae jọ ora ha ajokpanọ whọ rẹ riẹ obọ re who mi ei. Oghẹrẹ vẹ whọ sai ro ru ere?

Jesu ọ ta nọ ahwo nọ a “rọwo riẹ” a re ti wo uzuazọ ebẹdẹ bẹdẹ. Oghẹrẹ nọ who bi yeri uzuazọ ra who re ro dhesẹ ẹrọwọ ra via. (Jemis 2:26) Ẹrọwọ ofihọ Jesu u dhesẹ nọ who re yeri uzuazọ ra lele eware nọ ọ ta je ru. Re oyena o sae lọhọ, o gwọlọ nọ whọ rẹ riẹ Jesu gbe Ọsẹ riẹ ziezi. Jesu ọ ta nọ: “Onana họ uzuazọ ebẹdẹ bẹdẹ, re a riẹ owhẹ nọ whẹ ọvo họ uvi Ọghẹnẹ, gbe Jesu Kristi ọnọ who vi.”—Jọn 17:3.

Oware wọhọ ikpe idu ivẹ (2,000) nọ i kpemu, Jesu Kristi o whowho ovuẹ jọ nọ u nwene uzuazọ ima ahwo buobu wariẹ akpọ na họ no. Kọ whọ gwọlọ riẹ eware efa kpahe ovuẹ yena gbe epanọ whẹ avọ ahwo nọ who you wha sai ro wo erere noi ze enẹna, makọ bẹdẹ bẹdẹ? O te were Isẹri Jihova re a fi obọ họ kẹ owhẹ.

Izoẹme nọ e rrọ aro na i ti fi obọ họ kẹ owhẹ riẹ eware efa kpahe Jesu Kristi, ọzae nọ o whowho ovuẹ nọ o rẹ sai nwene uzuazọ ra bẹdẹ bẹdẹ.

[Oruvẹ-obotọ]