Jiisusi Kristusi — Tusarliussaa illillu

“Tikiuppunga inooqqullugit.” — JOHANNESI 10:10.

JIISUSI KRISTUSI pingaarnerpaamik nunarsuarmukarpoq tunisiumalluni, tunineqarnissani pinnagu. Kiffartornermigut inuiaat nalissaqanngitsumik tunissuteqarfigai — tassa tusarliussamik Guuti taassumalu piumasaa pillugit sallusuissummik paasinarsisitsisumik. Tusarliussamik ilassinnittut maannangaaq pitsaanerusumik inooriaaseqalertarput, tamannalu kristumiut ilumoortut millionillit uppernarsarsinnaavaat. * Pingaarnerpaamilli tusarliussaa tunissutit tamarmik pingaanerpaartaannut tunngassuteqarpoq — tassa inuunermut naammalluinnartumut uagut iluaqutissatsinnut pilliutigisaanut. Taassuma tusarliussaata ilaanut pingaarutilimmut tamatumunnga qanoq periarnerput naassaanngitsumik pilluarnissatsinnut aalajangiisuuvoq.

Guutip Kristusillu tunniussaat Jiisusip nalunngilaa naalliulluni akeqqaminit toqutaasussaalluni. (Matthæusi 20:17-19) Taamaakkaluartorli oqaatsit ilisimaneqarluartut Johannesi 3:16-imiittut uku oqaatigai: “[Guutip] silarsuaq ima asatigaa ernituani tunniussimallugu taassumunnga uppertoq kinaluunniit tammaqqunagu naassaanngitsumilli inooqqullugu.” Jiisusi aamma oqarpoq tikiulluni “[inuunini] akissatut tunniutissallugu amerlasuut utertinneqaatissaattut”. (Matthæusi 20:28) Sooq oqarpa inuunini tunniunneqarumaartoq?

Guuti inunnik ima asanningaartigaaq taakkua ajortimit kingornuttakkamit tamatumalu kingunipiluinit — naammalluinnanngissutsimit toqumillu — aniguisinneqarsinnaanngortillugit. Taamaaliorpoq ernituani nunarsuarmut aallartillugu inuunerminik pilliutiginneqqullugu. Jiisusi kajumilluni taamaaliorumavoq, inuuninilu naammalluinnartoq uagut iluaqutissatsinnut tunniuppaa. Aaqqissuussaq tamanna, utertitsissummik taaneqartartoq, Guutip inuiannut tunissutigaa pingaarnerpaaq. * Aap, tunissutaavoq naassaanngitsumik inuuneqalersitsisinnaasoq.

Illit iliuuserisariaqakkatit Utertitsissut ilinnuttaaq tunissutaava? Illit nammineq apeqqutaavutit. Takorlooriaruk tunissummik kusanartumik poortorneqarsimasumik ilinnut aggiussisoqartoq. Taanna tunissutisiarilissavat aatsaat illit nammineq taanna tigugukku. Jehovap utertitsissummik tunissummik ilinnut isaassineranut tunngatillugu aamma taamaappoq. Aatsaat illit nammineq tigugukku tunissutisiarilissavat. Tunissulli tamanna qanoq ililluni tiguneqarsinnaava?

Jiisusi oqarpoq ‘imminut uppertut’ naassaanngitsumik inuujumaartut. Upperneq inooriaatsimut tunngassuteqarpoq. (Jaaku 2:26) Jiisusimut uppernermut ilaavoq inuunermik taassuma oqaasiinut iliuusiinullu naapertuuttunngortitsineq. Taamaaliorsinnaajumalluni Jiisusi taassumalu Ataataa ilisarisimalluartariaqarput. Jiisusi ima oqarpoq: “[Inuuneq] naassaanngitsoq tassaavoq ilinnik, ilumut kisimi Guutiusumik aallartitannillu Jiisusi-Kristusimik, ilisimanninneq.” — Johannesi 17:3.

Jiisusip Kristusip ukiut 2000-it missiliorlugit matuma siorna tusarliussaa pissutigalugu silarsuaq tamakkerlugu inuit millionillit inuunerminnik allannguipput. Tusarliussaq tamanna aamma illit asasatillu maannakkuinnaanngitsoq naassaanngitsumilli tamatuminnga qanoq iluaqutiginnissinnaanersusi pillugit paasisaqarnerorusuppit? Taamaappat Jehovap Nalunaajaasuisa ikiorusuppaatsit.

[Quppernerup ataani ilanngussat]