Yesu Kristu Malongi Mandi Mfunu Mena kwa Ngeye
Yesu Kristu Malongi Mandi Mfunu Mena kwa Ngeye
“Omono yayiza kinumana vo nwakal’o, moyo, yo wokelwa wo.”—YOANE 10:10.
YESU KRISTU wayiza ova ntoto kimana kavana kansi ke tambula ko. Muna salu kiandi kasala ova ntoto, Yesu wavana lukau lwantalu kwa wantu, i sia vo walonga e ludi mu kuma kia Nzambi ye luzolo Lwandi. Awana belemvokelanga malongi mama balenda kala ye zingu kisundidi o mfunu owau nze una wina e zingu kia ulolo wa Akristu akieleka. * O moyo alunga kavana Yesu muna wete dieto i lukau lusundidi ntalu muna nsangu kasamuna. E mpila tulemvokelanga malongi masundidi o mfunu kalonga Yesu, ilenda songa kana vo tuvwa yovo lembi vwa nsambu zakwele mvu.
Nzambi yo Kristu nkia lekwa bavana Yesu wazaya wo vo lufwa lwa mpasi kefwa vana moko ma atantu andi. (Matai 20:17-19) Kansi, muna Yoane 3:16 tutanganga e mvovo miandi mitomene zayakana vava kavova vo: “Muna nzola kazolele nza o Nzambi i kavanin’o Mwan’andi amosi, kimana konso on’okwikilanga muna yandi ke vila ko, moyo a mvu ya mvu kevwa.” Yesu wavova mpe vo wayiza ‘vana moyo andi [yovo zingu] se lukulu lua wantu ayingi.’ (Matai 20:28) Ekuma kavovela vo moyo andi kevana vana fulu kiavova vo ukatulwa?
Mu kuma kia zola kwandi kusundidi, Nzambi wakubika diambu kimana wantu bavuluzwa muna mfwilu mi’esumu basambukila, i sia vo nkala ya lembi lunga yo lufwa. Nzambi wavanga wo muna tuma Mwan’andi amosi ova ntoto mu fwa se kimenga. Muna zola kwawonso, Yesu wavana moyo andi walunga muna wete dieto. E nkubika yayi iyikilwanga vo lukûlu, i lukau lwampwena kavana o Nzambi kwa wantu. * Lukau lwalu lulenda sadisa wantu mu vwa moyo a mvu ya mvu.
Dina ofwete vanga Nga lukûlu i lukau lwavewa mu kuma kia ngeye mosi kaka? Ngeye mosi olenda vana e mvutu. Muna bong’e nona: Yindula vo muntu unatini lukau lwatoma zingwa. Kieleka, ekolo kutambwidi lo ko kulendi lo yikila ko vo lwaku. Diau adimosi mpe, Yave wakubika lukûlu mu kuma kiaku, kansi avo kutambwidi lo ko yo kwikila lo, lukau lwalu ke lukala lwaku ko. Aweyi olenda tambulwila lukau lwalu yo kwikila lo?
Yesu wavova vo awana ‘bekwikila’ muna yandi moyo a mvu ya mvu bevwa. Lukwikilu muna mavangu lusongelwanga. (Yakobo 2:26) Kwikila muna Yesu disongele vo fwete wizanesa e zingu kiaku ye mambu mana Yesu kavova yo vanga. Muna vanga wo, divavanga vo watoma zaya Yesu yo S’andi. Yesu wavova vo: “I wau wuwu o moyo a mvu ya mvu, bazaya ngeye vo i Nzambi aludi, yo Yesu Kristu mpe ona watuma.”—Yoane 17:3.
Mvu 2.000 miviokele kala tuka Yesu Kristu kasamuna e nsangu zisobanga e zingu kia mazunda ye mazunda ma wantu ova nza. Nga ozolele zaya mambu mayingi mu kuma kia malongi ma Yesu ye nluta mina ngeye ye azolw’aku nulenda baka tuka owau yakwele mvu? Mbangi za Yave bena ye kiese mu kusadisa.
Elongi dilende divovela Yesu Kristu, muntu ona walonga mambu malenda soba e zingu kiaku yakwele mvu.
[Mvovo Vana Yand’a lukaya]
^ tini. 3 Ke konso muntu ko okiyikilanga vo Nkristu i nlandi akieleka a Kristu. Alandi akieleka a Yesu i awana bena ye zingu kina ngwizani ye ludi kalonga Yesu mu kuma kia Nzambi ye luzolo Lwandi. —Matai 7:21-23.
^ tini. 5 Muna zaya diaka maka mambu mu kuma kia Sono ya Nkand’a Nzambi iyikanga lukûlu, tala kapu kia 5, “Lukulu i Lukau Lwampwena lwa Nzambi,” muna nkanda O Nkand’a Nzambi Adieyi Kieleka Kelonganga? wavaikiswa kwa Mbangi za Yave.