Yesu Kidishitu Musapu Wandi ne Abe
Yesu Kidishitu Musapu Wandi ne Abe
“Naiya’mba bakamone būmi, kumona kwa kwibumweneneja bwa ntanda ne miseke.”—YOANO 10:10.
YESU KIDISHITU wāile pano pa ntanda ke mwandapo wa kupebwa, ino i kupāna. Kupityila ku busapudi bwandi, wāpēle bantu kyabuntu kilēme—musapu usokola bubinebine butala padi Leza ne pa kiswa-mutyima Kyandi. Boba betaba ku uno musapu bakokeja kwikala na būmi bulumbuluke tamba’nka pano, monka mwikadile nabo Bene Kidishitu. * Kintu kyādi kimanine’po musapu wa Yesu i kupāna kyabuntu kitabukile byonso bulēme—ke būmi bubwaninine bwaāpene pa mwanda wetu kadi. Būmi bwetu bulumbuluke bwa nyeke bulondanga muswelo otwitaba ku uno musapu wa mvubu mikatampe.
Byāpene Leza ne Yesu Yesu wādi uyukile amba usa kufwa lufu lusansa ku makasa a balwana nandi. (Mateo 20:17-19) Ino, Yesu unena binenwa byandi biyukane bitanwa mu Yoano 3:16 amba: ‘Leza byāsenswe ba pano pa ntanda nenki, wapāna Mwana wandi wa bunka’mba, bonso bakumwitabija nankyo kebakonekapo, ehe, poso batambule būmi bwa kulādila monka nyeke ne nyeke.’ Kadi Yesu wānene amba wāidile ‘kupāna muya [nansha būmi] wandi ke kikūlwa kya bavule bene.’ (Mateo 20:28) Mwanda waka wānene kupāna būmi bwandi pa kyaba kya kwibuyata?
Leza pa kutononwa na buswe bukatampe, wātūdile’ko mpangiko ya kunyongolola bantu ku bubi bobapyene ne ku bibi bilupuka’ko—ke kubulwa kubwaninina ne lufu kadi. Leza i munyongolole bantu na kutuma wandi Mwana wa bunka pano pa ntanda afwe lufu lwa kwipāna. Yesu wāitabije na mutyima tō, kupāna būmi bwandi bubwaninine pa mwanda wetu. Ino mpangiko itelwa bu kikūlwa, i kyabuntu kikatakata kya Leza ku bantu. * I kyabuntu kikokeja kutwala muntu ku būmi bwa nyeke.
Byofwaninwe kulonga Lelo kikūlwa i kyabuntu kyobakupele? Bine i bakutambike’kyo. Tulete kimfwa: Langa’po shi muntu wakupe kyabuntu kivungile mu kasanduku. Bine, kikekala kyobe kyabuntu enka shi ubekiyata ne kwikitabija. Mo monka, Yehova nandi i mukutambike kikūlwa, ino kino kyabuntu kikekala kyobe enka shi ubekiyata ne kwikitabija. Muswelo’ka?
Yesu wānene amba i boba “bakumwitabija” bo abo bakamona būmi bwa nyeke. Lwitabijo lumwekanga mu muswelo oshikete mu būmi. (Yakoba 2:26) Kwitabija mudi Yesu kushintulula kwikala na būmi bukwatañene na byaānene ne byaālongele. Pa kwitabija, ufwaninwe kuyuka biyampe Yesu ne Shandi. Yesu wānene amba: “Ebiya’mba, bakuyūke, abe Leza enka wa binebine, ne Yesu Kidishitu o watumine nankyo bo būmi ne būmi bwine bwa kulādila nyeke na nyeke.”—Yoano 17:3.
Pano ke padi kintu kya myaka 2000, Yesu Kidishitu wāsapwile musapu ushintyile būmi bwa midiyo ne midiyo ya bantu ntanda yonso. Lelo usaka kuyukila’ko bivule pa uno musapu ne pa muswelo okokeja kumwena’mo abe ne baswe bobe dyalelo ne nyeke-ke? Batumoni ba Yehova bakasangela kukukwasha.
Kishinte kilonda’ko kisa kukukwasha wiyuke na Yesu Kidishitu, muntu wāsapwile musapu ukokeja nyeke kushinta būmi bobe.
[Kunshi kwa dyani]
^ Ke muntupo yense witela bu Mwine Kidishitu wikalanga mulondi wa bine wa Kidishitu. Balondi ba bine ba Kidishitu i boba badi na būmi bukwatañene na bubinebine bwaāfundije padi Leza ne pa kiswa-mutyima Kyandi.—Mateo 7:21-23.
^ Shi usaka kuyukila’ko bufundiji bwa mu Bisonekwa butala pa kikūlwa, tala dibuku Lelo I Bika Bine Bifundija Bible? mu shapita 5 udi na mutwe wa mwanda unena’mba, “Kikūlwa—Kyabuntu Kikatakata kya Leza,” dilupwilwe na Batumoni ba Yehova.