Nsañu Yashimwineñayi Yesu Kristu, Chiyayikwashaña Enu
Nsañu Yashimwineñayi Yesu Kristu, Chiyayikwashaña Enu
“Ami nenjili kulonda akamoni wumi, akawumoni wakubadika kuvula.” —YOWANU 10:10.
YESU KRISTU wenjili hamaseki kulonda kuhana bayi kutambwilaku. Kuhitila mumudimu wakushimwina, wenkeli muchidi wamuntu chawana chalema wuseya, nsañu yamwekesheli chalala hadi Nzambi nihakukeña Kwindi. Antu atambwilaña iyi nsañu anateli kudiluñisha chihandilu chachiwahi hayinu mpinji, neyi chadiluñishaña yihita yawakwaKristu alala. * Wumi wawanina waheniyi Yesu kukoola etu dichawaana chalema nankashi, chadiña nakushimwinayi. Wumi wetu wahaya nyaka washindamena hakutambwila iyi nsañu yalema.
Chuma chahaniniyi Nzambi niKristu Yesu welukili nindi wakafwa kufwa kwatama mumakasa awayilumbu jindi. (Matewu 20:17-19) Nawa mumazwindi elukewa ekala haYowanu 3:16, wahosheli nindi: “Chaswejeliyi Nzambi kukeña mpata yamunu mwishina, waheni Mwanindi wumu hohu, kulonda muntu wukumukuhwelela aheti wumi wahaya nyaka, akabuli kunoña.” Yesu wahosheli cheñi nindi wenjili kulonda “akahani wumi windi wakukuula nachu antu amavulu.” (Matewu 20:28) Muloñadi chahosheleliyi nindi wakahana wumi windi bayi kuwutambulaku?
Hamuloña wakwikala nakukeña kwabadika, Nzambi waloñesheli njila yakupulwishilamu antu kufuma kunshidi yaswanawu nikuyuma yafumañamu, kubula kuwanina nikufwa. Nzambi welili mwenimu kuhitila mukutemesha Mwanindi wumu hohu kwinza heseki nakufwa kulonda kudihana neyi mulambu. Yesu wetejeli kuhana wumi windi wawanina kulonda kutukuula. Iwu mulambu watenañawu nawu ifutu danyiloña, hichawana chabadika chenkeliyi Nzambi muchidi wamuntu. * Ichi chawaana chalombolaña kuwumi wahaya nyaka.
Chuma chimwatela kwila Komana ifutu danyiloña hichawana kudenu? Ichi chinashindameni hadenu aweni. Chakutalilahu: Toñojokenu neyi chakwila muntu nakuyinka chawana chinavuñekeluwu muchikasha. Chakadi nikujina, hichikwikala chawana chenuku sampu muchitambula nikuchiteja. Munjila yoyimu, Yehova wayinka ifutu danyiloña, ilaña ichi chawana chikwikala chenu neyi muchitambula nikuchiteja. Munjilanyi?
Yesu wahosheli nindi antu ‘akumukuhwelela’ diwu akaheta wumi wahaya nyaka. Chikuhwelelu chabombelamu chiwahandaña muwumi weyi. (Yakoba 2:26) Kumukuhwelela Yesu chalumbulula kwikala nachihandilu chesekana nayuma yahosheliyi niyakoñeleñayi. Hakwila nawu mukoñi mwenimu, mwatela kumwiluka Yesu niTata yindi chikupu. Yesu wahosheli nindi: “Wumi wahaya nyaka woweniwu, wakukwiluka eyi Nzambi walala wumu hohu, niYesu Kristu watemesheli.”—Yowanu 17:3.
Hayaaka 2,000 yinahituhu, Yesu Kristu washimwinini nsañu yinahimpi yihandilu yawantu amavulu mwahita kaayi kejima. Komana munakukeña kwilukilaku jajivulu haniyi nsañu nichimwatela kuhetelamu hamu niantu imwakeña, hayinu mpinji nihaya nyaka? A Yinsahu jaYehova akutiya kuwaha kuyikwasha.
Yibaaba yinalondeluhu yikuyikwasha kudiza hadi Yesu Kristu, muntu washimwinini nsañu yinateli kuhimpa chikupu chihandilu chenu.
[Tumazu twaheshina]
^ Bayi neyi muntu wejima waditenaña kwikala mukwaKristu hikambanji kaKristu walalaku. Antu ashakamaña kwesekeja nachalala chatañishileñayi hadi Nzambi nikwila kukeña kwindi diwu atumbanji alala aYesu.—Matewu 7:21-23.
^ Neyi munakukeña kwilukilaku nsañu yikwawu kutalisha hachatañishaña Bayibolu hefutu danyiloña, talenu kapetulu 5, mumukanda waChumanyi Chacheni Chatañishaña Bayibolu? hamutu wunakuhosha nawu, “Ifutu daNyiloña-Chamukunkulu ChaNzambi Chabadika Kulema” wasonekawu kudi aYinsahu jaYehova.