A Zezi Kirist koɛɛgã yõod ne yãmba

“Mam waame tɩ piisã paam vɩɩm, la b paam hal wʋsgo.”—ZÃ 10:10.

A ZEZI KIRIST sẽn wa tẽngã zugã, yaa sẽn na n sõng nebã. A pa wa tɩ b sõng-a ye. Ne a koe-moonegã maasem, a kõo ãdem-biisã kũun sẽn yaa kãsenga. A koɛɛgã kɩtame tɩ nebã bãng Wẽnnaam la a raabã. Kiris-neb hakɩkã milyõ rãmbã tõe n kõo kaset tɩ ned ning fãa sẽn sakd koe-kãngã paamdame t’a vɩɩmã lebgd sõma. * La a Zezi sẽn yeel la a maanã fãa sʋka, bũmb ning yõod sẽn yɩɩd yaa a sẽn dɩk a vɩɩmã sẽn zems zãngã n kõ tõnd yĩngã. Tõnd beoog daar vɩɩmã bee ne d manesem sẽn yaa to-to ne kũun-kãngã.

Wẽnnaam ne Kiristã sẽn maan bũmb ning tõnd yĩngã: A Zezi ra miime t’a bɛɛbã na n nams-a lame la b kʋ-a. (Matɩe 20:17-19) La baasgo, Zã 3:16 neb wʋsg sẽn mi wã pʋgẽ, a Zezi yeela woto: ‘Wẽnnaam nonga dũniyã hal tɩ b kõ b Biigã sẽn ka to, tɩ ned ninga fãa sẽn tẽed-a kõn sãam ye, la a na paam vɩɩm sẽn ka sɛta.’ A Zezi yeelame me t’a waame ‘n na n kõ a vɩɩmã tɩ yao neb wʋsg yĩnga.’ (Matɩe 20:28) Bõe yĩng t’a yeel t’a na n kõo a vɩɩmã, n pa yeel tɩ b na n deega a vɩɩmã?

Wẽnnaam sẽn nong ãdem-biisã wʋsgã kɩtame t’a maan bũmb n na n fãag-b ne b yaab a Ãdem beegrã sẽn wa ne bũmb ningã, rat n yeel tɩ yel-wẽndã la kũumã. Rẽ n so t’a tʋm a biigã sẽn ka to wã tẽngã zug t’a wa ki tɩ yɩ maoong tõnd yĩnga. A Zezi saka ne yamleoogo, n kõ a vɩɩmã sẽn zems zãngã, n na n fãag tõndo. Bõn-kãngã Wẽnnaam sẽn maan ãdem-biisã yĩng tɩ b boond tɩ rondã yaa kũun sẽn ka to. * Yaa kũun-kãng maasem yĩng la d tõe n paam vɩɩm sẽn pa satã.

Y sẽn segd n maanega: Yãmb dɩta rondã yõod bɩ? Rẽ bee ne yãmba. D na n dɩka makr n wilg d sẽn yet woto wã võore. Tags-y n ges-y wala ned sẽn na n sẽb kũun bũmb pʋgẽ n wa kõ-yã, tɩ y pa mi sẽn yaa bũmb ning ye. Vẽenega, sã n pa y lodg n bãng kũunã sẽn yaa a soaba, y pa tõe n dɩ a yõod ye. A Zeova me kõo tõnd fãa rondã, la yaa ned kam fãa n segd n mao n dɩ a yõodã. Bõe la d segd n maane?

A Zezi yeelame tɩ yaa neb nins sẽn “tẽed” yẽ wã n na n paam vɩɩm sẽn pa satã. La pa ne noor bal la d segd n tẽ a Zezi ye. D segd n wilgda rẽ ne d tʋʋmã me. (Zak 2:26) Tẽ a Zezi wã rat n yeelame tɩ f modgd tɩ f vɩɩmã fãa zemsd ne bũmb nins a Zezi sẽn wilgã, la a sẽn maanã. Sẽn na yɩl n maan dẽ, y segd n bao n bãnga a Zezi ne a Ba wã sõma. A Zezi yeelame: “Vɩɩm sẽn kõn sɛ wã, yaa b bãng yãmba, Wẽnd meng sẽn ka to, la b bãng y sẽn tʋm a soabã, a Zezi Kirista.”—Zã 17:3, Sebr Sõngo.

A Zezi Kirist sẽn moon a koɛɛgã tẽng zug ka wã taa yʋʋm 2 000 masã, la koe-kãng toeema neb milyõ rãmb vɩɩm dũniyã gill zugu. Y tʋll n bãnga koɛɛg ning a sẽn moonã sõma, la y bãng a sẽn tõe n naf yãmb ne y nebã rũndã-rũndã la wakat fãa to-to bɩ? Y sã n data, a Zeova Kaset rãmbã na n sõng-y-la ne b sũy fãa.

[Tẽngr not rãmbã]