Jesu Kriste​—Molaetša wa Gagwe le Wena

“Ke tlile gore di be le bophelo le gore di be le bjona ka boati.” —JOHANE 10:10.

JESU KRISTE o tlile lefaseng ka mo go kgethegilego bakeng sa go nea, e sego go amogela. Ka bodiredi bja gagwe, o neile batho mpho e bohlokwa-hlokwa—molaetša woo o utollago therešo ka Modimo le thato ya Gagwe. Bao ba arabelago molaetšeng woo ba tla thabela bophelo gona bjale, ka ge Bakriste ba therešo ba dimilione ba ka hlatsela seo. * Eupša molaetša woo Jesu a bego a o bolela o be o e-na le mpho e bohlokwa kudu—bophelo bjo bo phethagetšego bjo a bo gafilego bakeng sa rena. Katlego ya rena ya ka mo go sa felego e ithekgile ka tsela yeo re arabelago ka yona karolong ye e bohlokwa ya molaetša wa gagwe.

Seo Modimo le Kriste ba se neilego Jesu o be a tseba gore manaba a gagwe a be a tlo mmolaya ga bohloko. (Mateo 20:17-19) Lega go le bjalo, mantšung a gagwe a tsebegago ao a hwetšwago go Johane 3:16, o itše: “Modimo o ratile lefase kudu mo a ilego a gafa Morwa wa gagwe yo a tswetšwego a nnoši gore yo mongwe le yo mongwe yo a dumelago go yena a se ke a fedišwa, eupša a be le bophelo bjo bo sa felego.” Jesu le gona o boletše gore o tlile “go nea moya wa gagwe [goba, bophelo] gore e be topollo bakeng sa ba bantši.” (Mateo 20:28) Ke ka baka la’ng a ile a bolela gore bophelo bja gagwe bo tla newa e sego go tšewa?

A tutueditšwe ke lerato le legolo, Modimo o dirile tokišetšo ya gore batho ba phološwe sebeng sa leabela le go ditla-morago tša sona—go se phethagale le lehu. Modimo o dirile se ka go romela Morwa wa gagwe yo a tswetšwego a nnoši lefaseng gore a hwe lehu la sehlabelo. Jesu ka go rata o ile a dumela, a gafa bophelo bja gagwe bjo bo phethagetšego bakeng sa rena. Tokišetšo ye, yeo e bitšwago topollo, ke mpho e kgolo yeo Modimo a e neago batho. * Ke mpho yeo e ka dirago gore batho ba hwetše bophelo bjo bo sa felego.

Seo o swanetšego go se dira Na topollo ke mpho yeo e lebišitšwego go wena? Seo se ithekgile ka wena. Ka mohlala: Nagana ka motho yo a otlollago letsogo la gagwe gore a go nee mpho yeo e lego ka lepokising leo le phuthetšwego. Ka ntle le pelaelo, ga se mpho ya gago go fihlela ge o otlolla letsogo la gago o e amogela. Ka mo go swanago, Jehofa o go nea mpho ya topollo, eupša mpho ye ga se ya gago go fihlela ge o otlolla letsogo la gago gomme o e amogela. Bjang?

Jesu o boletše gore batho bao ba “dumelago” go yena ke bona ba tlago go hwetša bophelo bjo bo sa felego. Tumelo e akaretša tsela yeo o phelago ka yona. (Jakobo 2:26) Go bontšha tumelo go Jesu go bolela gore o dumelelanya bophelo bja gago le dilo tšeo a di boletšego le go di dira. Gore o dire bjalo, o swanetše go tseba Jesu le Tatagwe gabotse. Jesu o boletše gore: “Se se bolela bophelo bjo bo sa felego, gore ba hwetše tsebo ka wena Modimo a nnoši wa therešo le ka yo o mo romilego, Jesu Kriste.”—Johane 17:3.

Nywaga e 2 000 e fetilego, Jesu Kriste o ile a botša batho molaetša woo o ilego wa fetoša maphelo a batho ba dimilione lefaseng ka bophara. Na o tla rata go tseba mo go oketšegilego ka molaetša woo le ka moo o ka holago wena gotee le baratiwa ba gago, e sego gona bjale feela, eupša ka mo go sa felego? Dihlatse tša Jehofa di tla thabela go go thuša.

Dihlogo tše di latelago le tšona di tla go thuša go tseba Jesu Kriste gabotse, monna yo a bego a bolela ka molaetša woo o ka fetošago bophelo bja gago ka mo go sa felego.

[Mengwalo ya tlase]