Jesus Kristu Oñgeni Onondaka Mbae Mbukuvatela

“Ame neya opo mukale nomuenyo, amukala nao omunyingi.”​—JOÃO 10:10.

JESUS KRISTU weile pano pohi opo aave, ha pala apewe. Novilinga viae viokuivisa, oe waavela ovanthu otyipuka tyakolela​—onondaka mbuhololola otyili konthele ya Huku nehando liae. Vana vetavela onondaka ombo vapondola okukala nomuenyo omuwa pahe, ngetyi tyilekesa otyinyingi tyo Vakristau vo tyotyili. a Mahi otyipuka otyinene monondaka Jesus aivisa, otyipuka aava tyakolela unene kuaviho​—omuenyo uhena nkhali aava pala okutuyovola. Opo tukamone ouwa uhapu, tyitei oñgeni tukahi nokutavela onondaka mbae.

Oityi Huku na Kristu vaava Jesus ankho utyii okuti maipawa no nondyale mbae ononkhia mbuihama unene. (Mateus 20:17-19) Nongotyo, monondaka mbae mbuiwe nawa mbukahi mu João 3:16, oe wati: “Huku una oluembia olunene novanthu, waava omona wae wongunga, opo kese omunthu ukala nekolelo mwe ahakanyimueko, mahi akakale nomuenyo wahapu.” Jesus tupu wati oe weya opo “aave omuenyo wae ngofeto pala okuyovola ovanthu ovanyingi.” (Mateus 20:28) Omokonda yatyi apopila okuti omuenyo wae mewave, keupolwa?

Mokonda yoluembia olunene, Huku walinga epongiyo opo ayovole ovanthu konkhali nononkhia vapiñgana. Huku walinga ngotyo mokutuma Omona wae wongunga pano pohi opo ankhie ngotyilikutila. Jesus tyahakuluminyua wetavela okuava omuenyo wae wehena nkhali opo etuyovole. Otyilikutila otyo tyiihanwa okuti ofeto yeyovo, otyali otyinene Huku aavela ovanthu. b Otyali otyo tyipondola okutuala komuenyo wahapu.

Oityi ove wesukisa okulinga Okuti ofeto yeyovo o pala ove? Otyo tyitei kuove muene. Mongeleka, soka ñgeno umwe wekuavela otyipuka otyiwa tyawingilua nawa mokakasa. Tyotyili, otyo kamatyikala vala tyove inkha utyitambula nokutyitavela. Ngotyawa otyo, Jeova waava ofeto yeyovo pala ove, mahi, otyiawa otyo matyikala vala tyove inkha ulinga ononkhono mbokutyitambula nokutyitavela. Oñgeni ngotyo?

Jesus wati vana vena ekolelo mwe mavakatambula omuenyo wahapu. Okukala nekolelo tyakutikinya onkhalelo ove ukahi nokutyinda omuenyo wove. (Tiago 2:26) Okukolela mu Jesus tyihangununa okutyinda omuenyo welikuata novipuka apopia nevi alinga. Opo ulinge ngotyo, una yokunoñgonoka nawa Jesus na Tate yae. Jesus wati: “Omuenyo wahapu oyou, okunoñgonoka ove awike Huku yotyotyili, na Jesus Kristu una watumine.”—João 17:3.

Momanima 2.000 okualamba, Jesus Kristu waivisa onondaka mbapilulula omienyo viovanthu ovanyingi mouye. Ove uhanda okunoñgonoka vali nawa onondaka ombo, no ñgeni ove nombunga yove mupondola okupolako esilivilo ha pahetyino vala, mahi apeho? Onombangi mba Jeova mavakala nehambu liokukuvatela.

Ononthele mambulandulako mambukuvatela okunoñgonoka vali nawa Jesus Kristu, omulume waivisa onondaka mbupondola okupilulula omuenyo wove apeho.

[Onondaka Poutoi]