Jesu-Kristo​—Say Mensahe To tan Sika

“Linma ak dia pian nawalaan ira na bilay, salanti, andukey a bilay.”​—JUAN 10:10.

SI Jesu-Kristo et linma’d dalin pian mangiter, aliwan mangawat. Diad panamegley na ministeryo to, inter toy mabmablin regalo ed katooan​—sakey a mensahen mangipapaamta na katuaan nipaakar ed Dios tan say gagala To. Saramay onkiwas ed satan a mensahe et napanliketan da lay maabig a bilay natan, a singa papaneknekan na minilyon a tuan Kristiano. * Balet say akasentroan na mensahen impulong nen Jesus et sankablian ed amin a regalo​—say perpekton bilay ya inter to parad sikatayo. Akadepende so andi-anggaan a pankaabigan tayo diad ikiwas tayo ed sayan sankaimportantian a kabiangan na mensahe to.

No antoy inter na Dios tan si Kristo Amta la nen Jesus a naeksperiensya toy ansakisakit ya ipapatey diad lima na saray mamubusol ed sikato. (Mateo 20:17-19) Ingen, diad samay kabkabat a balikas to ed Juan 3:16 et oniay inkuan to: “Ontan lay panangaro na Dios ed mundo ya inter to so bogbogtong ya Anak to, ta pian balang sakey a mangipapanengneng na pananisia ed sikato et agnaderal noagta nawalaan na bilay ya andi-anggaan.” Imbaga to met a sikatoy linma dia pian “iter toy kamarerwa [odino bilay] to a panondon ed amayamay.” (Mateo 20:28) Akin et imbaga ton niiter so bilay to imbes ya alaen itan?

Lapud agnaparaan a panangaro na Dios, walay intarya to‘d totoo pian nisalba ira ed atawir a kasalanan tan saray epekto na satan​—ag-inkaperpekto tan ipapatey. Ginawa to iya diad impangibaki to’d bogbogtong ya Anak to ed dalin pian ompatey bilang bagat. Mabulos a tinmulok si Jesus, ya inter toy perpekton bilay to parad sikatayo. Sayan probisyon a tatawagen a dondon so sankablian a regalo na Dios ed katooan. * Sakey itan a regalon mangitonton ed andi-anggaan a bilay.

No antoy kaukolan mon gawaen Kasin say dondon et sakey a regalo ed sika? Akadepende itan ed sika. Bilang ilustrasyon: Isip mo pan walay mangiyaawat ed sika na sakey a regalo. Siempre, agmo nibagan gawam itan a regalo no agmo ni inawat. Mipadpara, intarya nen Jehova so dondon parad sika, balet sayan regalo et agmo ni gawa no agmo ni inawat. Antoy gawaen mo pian naawat mo itan?

Imbaga nen Jesus a say makaawat na andi-anggaan a bilay et saramay “mangipapanengneng na pananisia” ed sikato. Saya et kaukolan mon ipatnag ed panagbilay mo. (Santiago 2:26) Pian nipanengneng moy pananisia ed si Jesus, nepeg a manbilay ka unong ed saray imbaga tan ginawa to. Nagawaan mo itan sano kabaten mon maong si Jesus tan say Ama to. Inkuan nen Jesus: “Saya so mankabaliksan na bilay ya andi-anggaan, a kabaten da ka, say saksakey a tuan Dios, tan samay imbakim, si Jesu-Kristo.”​—Juan 17:3.

Manga 2,000 taon lay apalabas, impulong nen Jesu-Kristo so mensahen akapanguman ed bilay na minilyon a totoo ed interon mundo. Labay mo ta nin naaralan a maong so nipaakar ed satan a mensahe, tan no panon kan nagunggonaan pati saray kapamilyaan mo, aliwa labat a natan noagta diad andi-anggaan? Maliket iray Tasi nen Jehova ya ontulong ed sika.

Diad ontumbok iran artikulo et mas lalon nakabat moy Jesu-Kristo, say toon angipulong na sakey a mensahe a nayarin makapanguman ed bilay mo diad andi-anggaan.

[Saray paimano ed leksab]