Jesucristop Yachachisqan, ¿imaynatá yanapasunkiman?
Jesucristop Yachachisqan, ¿imaynatá yanapasunkiman?
“Noqarí jamuni kawsayniyoj kanankupaj, aswan juntʼasqa kawsayniyoj kanankupajtaj.” (JUAN 10:10)
JESUCRISTOQA, runasrayku kawsayninta qunanpaq Jallpʼaman jamurqa. Diosmanta, Munayninmanta ima yachachisqanqa, runapaq juk sumaq regalojina karqa. Chay yachachisqantaq kunanpis achkha chiqa cristianosta kusisqas kawsakunankupaq yanapachkan. * Chaywanpis, kawsayninta runasrayku qunanmantapis yachachillarqataq. Juntʼa kawsayninta ñuqanchikrayku qusqanqa, may valorniyuq regalojinallataq. Chayrayku wiñaypaq kusisqa kawsakunanchikpaqqa, Jesuspa yachachisqanta kasukunanchik tiyan.
Jehovawan Jesuswan, ñuqanchikrayku ruwasqanku Jesusqa, enemigosnin wañuchinankukama ñakʼarichinankuta yacharqa (Mateo 20:17-19). Chayta yachaspapis Jallpʼaman jamurqa. Pay nirqa: “Diosqa chay jinatapuni kay pachapi kaj chhikata munakusqanrayku, uj kʼata Churinta qorqa. Ajinamanta pillapis paypi creejqa mana chinkayman renqachu, astawanqa wiñay kawsayniyoj kanqa”, nispa (Juan 3:16). Chantá wak kutipi, “kawsaynin[ta] qoj, ashkha runas salvasqa kanankupaj” jamusqanta nillarqataq (Mateo 20:28). ¿Imaraykutaq kawsayninta qunanpaq jamusqanta nirqa?
Jehová mayta munakuwasqanchikrayku, juchamanta, wañuymanta ima kacharichinawanchikpaq, Jallpʼaman kʼata Churinta kachamurqa ñuqanchikrayku kawsayninta qunanpaq. Churinpis kawsayninta quyta munallarqataq. Churinpa kawsayninwan juchamanta rantiwasqanchikqa, Diospa juk jatun regalon, imaraykuchus chayta ruwasqanrayku wiñay kawsayta tariyta atinchik. *
¿Chay jatun regalota japʼikuyta munankichu? Jehová qusqan regalota japʼikunaykiqa qammanta kachkan. Kaypi tʼukuriy; pillapis juk regalota jaywasuptin, mayta agradecekuspa chay regalota japʼikuwaq, ¿icharí? Jinallataq Jehová Dios chay regalota quwasqanchikwanpis. Wiñay kawsayta tariyta munanki chayqa, chay regalota japʼikuyta munasqaykita rikuchinayki tiyan, ¿imaynamantá?
Rikurqanchikjina Jesusqa, paypi iñiyta churaqkunalla wiñay kawsayta japʼinankuta nirqa. Chaywanpis Jesuspi iñisqanchiktaqa, yachachisqanmanjina kawsaspa rikuchinanchik tiyan (Santiago 2:26). Chaypaqtaq, Jesusta, Jehovata ima allinta riqsinanchik tiyan. Jesús nirqa: “Kaymin chay wiñay kawsayqa: Qan kʼata cheqa Diosta rejsisunanku, kachamusqayki Jesucristotapis”, nispa (Juan 17:3).
Iskay waranqa wataña pasan Jesús Jallpʼapi yachachisqanmanta, chaywanpis yachachiykunasninqa, achkha runasta yanapachkallanpuni. ¿Paypa yachachiykunasninmanta astawan yachakuyta munawaqchu? ¿Yachachiykunasnin imaynatachus qamta, familiaykita ima, kunan tiempopi, wiñaypaq ima yanapasunaykichikta yachayta munallawaqtaqchu? Ajina kaptinqa, Jehovamanta sutʼinchaqkunawan parlariy, paykunataq may kusiywan chaymanta sutʼinchasunqanku.
Qhipan yachaqanaspi astawan Jesucristomanta yachakunki, piqpatachus yachachiykunasnin achkha runasta yanaparqa.
[Sutʼinchaykunasnin]
^ párr. 3 Jesuspa chiqa discipulosninqa, mana cristianos kasqallankutachu ninku, astawanqa Diosmanta, Paypa munayninmanta ima, Jesús yachachisqanmanjina kawsakunku (Mateo 7:21-23).
^ párr. 5 Kaymanta astawan yachakunaykipaq, ¿Imatapunitaq Biblia yachachin?, libromanta 5 yachaqananta, “Dios rantiwasqanchik, Diospa astawan jatun regalon”, sutichasqata ñawiriy. Kaytataq Jehovamanta sutʼinchaqkuna urqhunku.