Jesucristopa: yachachikuyninqa yanapasunkim

“Ñoqam ichaqa hamurqani kawsanaykichikpaq hinaspa kawsaywan huntasqa kanaykichikpaq.” (JUAN 10:10.)

JESUCRISTOQA kay Pachamanqa hamurqa qonanpaqmi, manam chaskinanpaqchu. Yachachikuyninkunaqa ancha allinmi runakunapaq, Diosmantam cheqapta yachachirqa hinaspa munayninmantapas. Chay yachachisqankunaraykum millonnintin cheqap cristianokuna allintaña kawsakuchkanku. * Chaymantapas qawachinmi ñoqanchikrayku wañuspan sumaq regalo qowasqanchikta. Hinaspa wiñay kawsayniyoqmi kasun Jesuspa wañukusqanta chaninchaspallanchik.

Diospa hinaspa Jesuspa qowasqanchik. Jesusqa yacharqam enemigonkuna ñakarichispan wañuchinankuta (Mateo 20:17-19). Chayna kaptinpas kay Pachamanmi hamurqa. Juan 3:16 nisqanpi Jesuspa rimasqanman hinaqa “Diosqa ancha-anchatam kuyarqa runakunata, chaymi sapallan Churinta qomurqa pipas paypi iñiqqa manaña puchukaspa wiñaypaqña kawsananpaq”. Chaymantapas nirqataqmi ‘achka runakunapa rantinpi wañunanpaq’ hamusqanta (Mateo 20:28). Chaynaqa, ¿imanasqataq kikin wañunanmanta nirqa wañuchisqa kanan kaptinqa?

Runakunata anchata kuyasqanraykum Diosqa munarqa huchankumantawan wañuymanta librayta. Chaypaqmi sapallan Churinta kay Pachaman kachamurqa ñoqanchikrayku wañunanpaq. Jesuspas munarqamá chay rurayta. Librawananchikpaq churinta Diospa qosqanqa, mana pipapas qosqan suma-sumaq regalom, chayraykumá llapallanchik wiñay kawsayta tarichwan. *

Imaynatam yanapachikuwaq. Hinaptinqa, ¿yanapachikunkichu Diospa qowasqanchik regalowan? Piensariy: Sichu pipas qosunkiman sumaqllaña regalota, ¿imatam rurawaq? Ninkichá: “Abrazaykuspaymi agradecekuyman” nispa. Arí, Diospas chayna sumaq regalotam qowarqanchik, ñoqanchikrayku wañunanpaq Churinta qowaspanchik. Pipas chay regalowan yanapachikuyta munaspanqa munasqantam qawachinan. ¿Imaynata?

Yachamurqanchikmi Jesuspi iñiqkunalla wiñay kawsayniyoq kanankuta. Chay iñiytaqa qawachisunmi imayna kawsasqanchikwan (Santiago 2:26). Chaynaqa Jesuspi iñispaqa, yachachisqanman hinaspa rurasqanman hinam kawsananchik. Chaypaqqa paytawan Taytantam allinta reqsinanchik. Chaytam Jesuspas nirqa: “Wiñay kawsayniyoqqa kanku sapallan cheqap Dios kasqaykita reqsiqkunam hinaspa kachamusqayki Jesucristota reqsiqkunam”, nispa (Juan 17:3).

Yaqa 2.000 watañam, Jesuspa yachachisqanqa enteron pachapi millonnintin runakunata yanaparun. ¿Munawaqchu qampas yachayta? ¿Munawaqchu qamtawan familiaykita kunanpas hinaspa wiñaypaqpas imayna yanapasunaykipaq yachayta? Chaynaqa maskayá Jehová Diospa testigonkunata, paykunam kusikuywan yachachisunki.

Qatiqnin yachachikuykunapim astawan Jesusmanta yachanki, yachachisqanqa qampa vidaykitapas wiñaypaqmi cambiarunman.

[Willakuykuna]