Iesu Karaiti​—Tana Karere e Koe

“I aere mai nei ra au kia rauka to ratou ora, e kia maata ua atu te ora.”​—IOANE 10:10.

KUA aere mai a Iesu Karaiti ki te enua nei, te akakoroanga maata kia oronga, kare kia rave mai. Na roto i tana angaanga orometua, kua oronga mai aia i tetai apinga aroa oko maata no te tangata nei​—tetai karere tei akakite mai i te tuatua mou no runga i te Atua e Tona anoano. Te aronga tei ariu atu ki taua karere ra ka rauka ia ratou tetai oraanga meitaki atu i teianei, mei ta te mirioni ua atu au Kerititiano ka akapapu mai. * Inara, ko te tuanga puapinga rava atu o te karere ta Iesu i tutu aere te apinga aroa oko maata roa atu​—te oraanga apa kore tana i oronga mai no tatou. Tei runga to tatou turanga no te tuatau mutu kore i to tatou tu me ariu atu ki teia tuanga puapinga rava atu o tana karere.

Ta te Atua e ta Karaiti i oronga mai Kua kite a Iesu e e mate rikarika tona i te rima o tona au enemi. (Mataio 20:17-19) E oti akera, i roto i tana tuatua matauia i roto ia Ioane 3:16, kua karanga aia e: “I aroa mai te Atua i to te ao nei, kua tae rava ki te oronga anga mai i tana Tamaiti anau tai, kia kore e mate te akarongo iaia, kia rauka ra te ora mutu kore.” Kua karanga katoa a Iesu e kua aere mai aia “kia oronga i tona ora ei oko no te tangata e manganui.” (Mataio 20:28) Eaa ra aia i karanga ai e ko tona oraanga ka orongaia te reira kare ra e ka raveia?

Akakeuia e te aroa aite koreia, kua oronga mai te Atua i te ravenga no te tangata kia akaoraia mei te ara i anauia mai ei ratou e te kino ta te reira i akatupu​—te tu apa ua e te mate. Kua rave te Atua i teia na te tono mai anga i tana Tamaiti anau tai ki te enua nei kia mate i te mate akaatinga. Kua kauraro puareinga ua a Iesu, te orongaanga i tona oraanga tangata apa kore no tatou. Ko teia ravenga tei kapikiia ko te oko, ta te Atua apinga aroa maata rava atu ki te tangata ravarai. * E apinga aroa te reira te ka arataki atu ki te oraanga mutu kore.

Taau ka anoanoia kia rave E apinga aroa ainei te oko kia koe uaorai? Tei runga te reira ia koe. Ei akatutu: Akamanako ua ana e te oronga maira tetai tangata i tetai apinga aroa i roto i te pia tei vaiia. E tika, kare te reira apinga aroa e riro naau kia mou roa koe e kia ariki i te reira. Mei te reira rai, te oronga atura a Iehova i te oko kia koe, inara kare teia apinga aroa e riro naau uaorai, mari ua kia mou mai koe e kia ariki i te reira. Akapeea ra?

Kua karanga a Iesu e ko te aronga tei “akarongo” i roto iaia te ka rauka te oraanga mutu kore. Ko te akarongo, te o maira te tu e akono ra koe i toou oraanga. (Iakobo 2:26) Te aiteanga o te akarongo i roto ia Iesu koia oki kia akarotai i toou oraanga ki te au mea tana i tuatua e tana i rave. Kia rave i te reira, ka anoanoia koe kia rauka te kite ia Iesu e tona Metua. “Teia oki te ora mutu kore,” i karanga ai a Iesu, “kia kite ratou ia koe i te Atua mou ra, e ia Iesu i te Mesia, i taau i tono maira.”​—Ioane 17:3.

Mei tetai 2,000 mataiti i topa, kua akakite a Iesu Karaiti i tetai karere tei akatuke i te oraanga o te mirioni ua atu tangata i te ao e pini ua ake. Ka inangaro ainei koe kia kite maata atu no runga i taua karere e ka akapeea koe e toou au akaperepere e puapingaia ai mei te reira, kare no teianei ua, mari ra e tuatau ua atu? Ka rekareka roa te Au Kite o Iehova i te tauturu ia koe.

Te au atikara e aru maira ka akamatau roa atu ia koe kia Iesu Karaiti, te tangata tei tutu aere i te karere te ka akatuke i toou oraanga e tuatau ua atu.

[Au Tataanga Rikiriki i Raro]