Jésus Christ: Aye so lo fa abâ nga mo

“Mbi ga si ala lingbi ti wara fini na ala wara ni mingi.”​—JEAN 10:10.

KOZO ye so Jésus Christ aga na ndo ti sese ndali ni ayeke ti mû ye, me pëpe ti wara ye. Na lege ti kusala ti lo, lo fa tâ tënë na ndo ti Nzapa nga na ye so Nzapa aleke ti sara. Ye so ayeke mbeni matabisi so ahon atanga ni kue so lo mû na azo. Azo so asara ye alingbi na ye so lo fa alingbi ti duti na ngia na yâ ti fini ti ala laso. A yeke ye so asi na atâ Chrétien kutu mingi. * Me na ndo ti ye so lo fa, fini ti lo so alingbi kue so lo mû ndali ti e ayeke kota matabisi so ahon atanga ni kue. E yeke wara fini ti lakue lakue gi tongana e sara ye alingbi na kota matabisi so.

Ye so Nzapa na Christ amû Jésus ahinga lani so lo yeke kui kuâ ti ngangu na tïtî awato ti lo (Matthieu 20:17-19). Na yâ ti tënë ti Jésus so ayeke na Jean 3:16 so azo ahinga ni mingi, lo tene: “Nzapa andoye tâ azo ti dunia so mingi si lo mû gi oko Molenge ti lo ndali ti ala, si zo kue so amä na bê na lo, a lingbi ti futi lo pëpe, me lo wara fini ti lakue lakue.” Lo tene nga so lo ga “ti mû âme [wala fini] ti lo tongana ngere so a futa ti zi na azo mingi.” (Matthieu 20:28). Ngbanga ti nyen lo tene so lo mû fini ti lo ahon ti tene lo tene a mû fini ti lo ni mungo?

Ndoye so mara ni ayeke dä pëpe la apusu Nzapa ti sara mbeni ye ti zi azo na yâ ti siokpari so a dü ala dungo na ni nga na akpale so siokpari aga na ni nga na kuâ. Nzapa asara ni na tokuango oko Molenge ti lo na ndo ti sese ti mû fini ti lo na sandaga. Jésus ayeda na bê ti lo wani ti mû fini ti lo so alingbi kue ndali ti e. Ye ni so ayeke ngere so a futa ti zi na azo, kota matabisi so ahon atanga ni kue so Nzapa amû na azo. * A yeke mbeni matabisi so asara si zo ayeke wara fini ti lakue lakue.

Ye so a lingbi mo sara Ngere so a futa ti zi na azo ayeke mbeni matabisi so a mû na mo? Mo la mo lingbi ti sara si a ga ti mo. Zia e mû mbeni tapande: Tara ti bâ so mbeni zo ayôro na mo mbeni matabisi. Biani, a yeke ga ti mo gi tongana mo yôro maboko ti mo mo mû ni na mo yeda na ni. Legeoko nga, Jéhovah amû na mo ngere so a futa ti zi na azo, me a yeke ga ti mo gi tongana mo sara ngangu ti mû ni na ti yeda na ni. Tongana nyen?

Jésus atene so a yeke azo so “amä na bê” na lo si ayeke wara fini ti lakue lakue. Aye so mo yeke sara na yâ ti fini ti mo la ayeke fa so mo yeke na mabe (Jacques 2:26). Ti mä na bê na Jésus aye ti tene mo sara ye ague oko na ye so Jésus afa na lo sara. Ti sara ni, a lingbi mo hinga Jésus nga na Babâ ti lo nzoni. Jésus atene: “Ti wara fini ti lakue lakue, a lingbi ala manda ti hinga mo, mo so gi mo oko ayeke tâ Nzapa, nga ti hinga lo so mo tokua lo, Jésus Christ.”​—Jean 17:3.

A sara ngu 2 000 tongaso awe so Jésus Christ afa mbeni tënë so achangé fini ti azo kutu mingi na yâ ti dunia. Mo ye ti hinga ye mingi na ndo ti tënë so? Nga tongana nyen mo na azo so mo ye ala mingi alingbi ti bâ nzoni dä laso nga teti lakue lakue? A-Témoin ti Jéhovah ayeke na ngia ti mû maboko na mo.

[Akete tënë na gbe ni]