Yesus Krestes​—San a boskopu fu en wani taki gi yu?

„Mi kon fu meki sma kisi libi so taki den kan abi disi pasa marki.” —YOHANES 10:10.

YESUS KRESTES ben kon na grontapu, na a fosi presi fu gi sani, èn no fu kisi sani. Nanga yepi fu a diniwroko fu en a gi libisma wan diri kado, iya, wan boskopu di e tyari kon na krin san na den tru tori di abi fu du nanga Gado èn a wani fu En. Den sma di e gi yesi na a boskopu disi kan abi wan moro bun libi now. Den sani di milyunmilyun tru Kresten na ini a ten disi e ondrofeni, e sori taki dati tru. * Ma a moro prenspari pisi fu a boskopu di Yesus ben preiki, na a libi fu en di a gi fu a bun fu wi. Dati na a moro diri kado di a gi libisma. A têgo tanbun fu wi o didon na a fasi fa wi o handri tapu a prenspari pisi disi fu a boskopu.

Den sani di Gado nanga Krestes gi wi Yesus ben sabi taki den feanti fu en ben o meki a pina èn dede (Mateyus 20:17-19). Toku na ini den wortu fu en di furu sma sabi èn di skrifi na ini Yohanes 3:16, a taki: „Gado ben lobi grontapu so te, taki a gi en wan-enkri Manpikin, so taki ala sma di e bribi na ini en no sa dede, ma sa kisi têgo libi.” Yesus ben taki tu dati a kon fu „gi en sili [noso libi] leki wan lusu-paiman fu frulusu furu sma” (Mateyus 20:28). Fu san ede Yesus taki dati a ben o gi en libi, na presi fu taki dati sma ben o teki en libi?

Fu di Gado abi tumusi bigi lobi gi libisma, meki a seti sani so taki den kan kon fri fu sondu, di e tyari dede kon leki bakapisi. Gado du disi fu di a seni en wan-enkri Manpikin kon na grontapu fu dede leki wan ofrandi gi wi. Yesus di no ben abi sondu ben de klariklari fu gi en libi fu a bun fu wi. Disi na san Bijbel e kari a lusu-paiman, èn dati na a moro bigi kado di Gado gi libisma. * Na wan kado di kan meki sma kisi têgo libi.

San yu musu du A lusu-paiman na wan kado gi yu tu? We, dati didon na yu. Luku wan eksempre: Kon meki wi taki dati wan sma e langa wan kado gi yu. A no de fu taki dati efu yu wani a kado disi, dan yu musu langa yu anu teki en. Na so a de tu taki Yehovah e gi yu a lusu-paiman, ma a didon na yu fu teki en. Fa yu kan sori taki yu e teki a lusu-paiman?

Yesus ben taki dati na den sma di „e bribi” na ini en, o kisi têgo libi. A fasi fa yu e libi e sori efu yu abi bribi (Yakobus 2:26). Fu poti bribi na ini Yesus wani taki dati yu musu libi soleki fa Yesus ben taki èn du. Fu man du dati, yu musu sabi Yesus nanga en Papa bun. Yesus ben taki: „Efu sma wani kisi têgo libi, dan den musu tan leri sabi yu, a wan-enkri tru Gado, èn a sma di yu seni kon, Yesus Krestes.”—Yohanes 17:3.

Sowan 2000 yari pasa, Yesus Krestes preiki wan boskopu di kenki a libi fu milyunmilyun sma na heri grontapu. Yu wani sabi moro fu a boskopu dati? Yu wani sabi fa yu nanga den wan di yu lobi kan kisi wini fu a boskopu dati now, èn fu ala ten? Yehovah Kotoigi ben o breiti fu yepi yu.

Den artikel di e kon o yepi yu fu kon sabi moro fu Yesus Krestes, a man di preiki wan boskopu di kan kenki yu libi fu ala ten.

[Futuwortu]