Jesu Khristu—Indlela Umlayeto Wakhe Lokutsintsa Ngayo
Jesu Khristu—Indlela Umlayeto Wakhe Lokutsintsa Ngayo
“Mine ngitele kwekutsi bantfu babe nekuphila; babe nako kuphuphume.”—JOHANE 10:10.
NGALOKUYINHLOKO, Jesu Khristu weta emhlabeni kutewupha, hhayi kutewemukela. Ngenkonzo yakhe, Jesu wapha bantfu sipho lesikhulu kakhulu—umlayeto lowembula liciniso ngaNkulunkulu nangentsandvo yaKhe. Labo labemukela lomlayeto, bangajabulela imphilo lencono kakhulu nyalo, njengobe ijatjulelwa tigidzi temaKhristu eliciniso. a Ngetulu kwemlayeto Jesu labeshumayela ngawo, wasipha nesipho lesiligugu kakhulu kutendlula tonkhe—kuphila kwakhe lokute sono kute kuzuze tsine. Kute sitfole kuphila phakadze, kufanele semukele lencenye leyinhloko yalomlayeto wakhe.
Loko Nkulunkulu naKhristu labanikela ngako Jesu bekati kutsi titsa takhe betitawumbulala ngesibhuku. (Matewu 20:17-19) Nobe kunjalo, emavini akhe latiwa kakhulu latfolakala encwadzini yaJohane 3:16, watsi: “Nkulunkulu walitsandza live kakhulu kangangekutsi wadzimate wanikela ngeNdvodzana yakhe lekukuphela kwayo, kuze kutsi nome ngubani lokholwa ngiyo angabhubhi, kodvwa abe nekuphila lokuphakadze.” Jesu waphindze watsi futsi wetela ‘kutewunikela ngemphilo yakhe, kutsi ibe yinhlawulo yalabanyenti.’ (Matewu 20:28) Yini leyabangela Jesu watsi kutawunikelwa ngekuphila kwakhe, kunekutsi atsi kutawutsatfwa?
Ngesizatfu sekutsi abebatsandza kakhulu bantfu, Nkulunkulu wenta indlela yekutsi bantfu basindziswe esonweni nakulomphumela waso—kufa. Loko, Nkulunkulu wakwenta ngekutfumela iNdvodzana yakhe kutsi itekufa ibe ngumhlatjelo. Jesu wavuma ngekutitsandzela, wanikela ngekuphila kwakhe lokute sono kute kuzuze tsine. Lesipho lesibitwa ngekutsi sihlengo, sipho saNkulunkulu lesikhulu kunato tonkhe lasipha bantfu. b Lesi sipho lesiholela ekuphileni lokuphakadze.
Lokufanele ukwente Sihlengo, sipho lesicondziswe kuwe yini vele? Sekukuwe kutsi usibona sinjani. Ake sibekise: Mhlawumbe lotsite ukupha sipho lesivalelwe ebhokisini. Ecinisweni, lesipho asimane nje sibe sakho kudzimate kube ngulesikhatsi usemukela. Kuyafanana nangaJehova, ukupha sihlengo, kepha lesipho akusiso sakho, kudzimate kube ngulesikhatsi usemukela. Yini longayenta kute ukhombise kutsi uyasemukela?
Jesu watsi kuphila lokuphakadze kutawutfolwa ngulabo ‘labakholwa nguye.’ Kukholwa kufaka ekhatsi indlela lophila ngayo. (Jakobe 2:26) Kukholwa kuJesu kusho kuphila ngetintfo latisho nalatenta. Kute ukwati kwenta loko, kufanele umati kahle Jesu kanye neYise. Jesu watsi: “Kuphila lokuphakadze nguloku: kutsi bakwati wena, Nkulunkulu longuye yedvwa weliciniso, bamati naJesu Khristu lomtfumile.”—Johane 17:3.
Eminyakeni lengaba ngu-2 000 leyengcile, Jesu Khristu wasakata umlayeto lowagucula kuphila kwetigidzi tebantfu emhlabeni wonkhe. Ungatsandza yini kuba nelwati lolubanti ngalomlayeto nangendlela wena nabo bonkhe lobatsandzako leningazuza ngayo kuwo, hhayi nyalo nje kuphela kepha kuze kube phakadze? BoFakazi BaJehova batakujabulela kukusita kutsi wente njalo.
Tihloko letilandzelako titakufundzisa lokunyenti ngaJesu Khristu indvodza leyasakata umlayeto longagucula kuphila kwakho phakadze.
[Imibhalo lengentasi]
a Akusuye wonkhe umuntfu lotsi ungumKhristu kepha longumlandzeli sibili waKhristu. Balandzeli baKhristu beliciniso ngulabo labaphila ngeliciniso lalifundzisa ngaNkulunkulu nangentsandvo yaKhe.—Matewu 7:21-23.
b Nawufuna lwati lolubanti ngalemfundziso yemiBhalo mayelana nesihlengo, fundza sehluko 5, lesitsi, “Sihlengo—Sipho SaNkulunkulu Lesikhulu Kunato Tonkhe” lesisencwadzini letsi, “Lifundzisani Mbambambamba LiBhayibheli?” leshicilelwe boFakazi BaJehova.