Jesus Kristu ninia mensajen no Ita

“Haʼu mai atu ema hetan moris, hodi hetan moris neʼe waʼin liután.”—JOAO 10:10.

RAZAUN primeiru Jesus Kristu mai toʼo rai mak atu fó buat ruma, laʼós atu simu. Liuhusi ninia serbisu haklaken, nia fó prezente neʼebé folin boot tebes ba ema hotu, neʼe mak mensajen lia-loos nian kona-ba Maromak no Ninia hakarak. Sira neʼebé simu mensajen neʼe bele halaʼo moris neʼebé kontente agora, hanesan ema kristaun loos rihun ba rihun sente ona. * Maibé, liafuan neʼebé importante liu husi Jesus nia mensajen neʼe mak kona-ba saran ninia moris nuʼudar ema sala-laek atu salva ema. Ita-nia moris rohan-laek depende ba ita atu simu mensajen importante neʼe.

Saida mak Maromak no Kristu fó Jesus hatene katak nia sei hetan terus barak no sei mate iha ninia inimigu sira-nia liman. (Mateus 20:17-19) Maibé, iha Joao 3:16, nia hatete: “Basá Maromak hadomi tebes mundu toʼo fó Nia Oan-Mane mesak, atu ema hotu neʼebé fiar iha nia la bele lakon, maibé hetan moris rohan-laek.” Jesus mós hatete katak nia mai atu “saran nia moris atu soi ema barak”. (Mateus20:28) Tanbasá mak Jesus hatete katak nia sei saran nia moris, laʼós katak ema sei oho nia?

Tanba Maromak hadomi tebes ema, nia halo arranju atu salva ema husi sala no husi buat aat neʼebé sala lori mai, neʼe mak isin neʼebé la perfeitu no mate. Maromak halo ida-neʼe hodi haruka ninia Oan-Mane mai rai atu mate nuʼudar sakrifísiu. Jesus ho hakarak rasik halo tuir hodi fó nia moris neʼebé perfeitu atu salva ema. Sakrifísiu neʼe mak Maromak nia prezente neʼebé folin boot liu hotu ba ema. * Prezente neʼe bele lori ema ba moris rohan-laek.

Saida mak Ita presiza halo Sin, Jesus nia sakrifísiu mak hanesan prezente, maibé Ita bele simu prezente neʼe ka lae? Resposta mak depende ba Ita. Atubele komprende, mai ita haree toʼok ai-knanoik tuirmai neʼe: Hanoin toʼok se ema ida hakarak fó ba Ita prezente ida. Tuir loloos, prezente neʼe seidauk sai Ita-nian se Ita seidauk lolo Ita-nia liman hodi simu. Nuneʼe mós, Maromak Jeová fó ba Ita Jesus nia sakrifísiu, maibé prezente neʼe seidauk sai Ita-nian se Ita la lolo liman no simu ida-neʼe. Oinsá mak Ita bele halo ida-neʼe?

Jesus hatete katak ema neʼebé “fiar iha nia” mak sei hetan moris rohan-laek. Fiar envolve ita-nia hahalok loroloron nian. (Tiago 2:26) Fiar iha Jesus katak halo tuir buat neʼebé nia hanorin no ninia hahalok. Atu halo ida-neʼe, Ita tenke hatene didiʼak Jesus no ninia Aman. Jesus hatete: “Neʼe mak moris rohan-laek: hatene Ita nuʼudar Maromak loos mesak deʼit, no Jesus Kristu neʼebé Ita haruka mai.”—Joao 17:3.

Maizumenus tinan 2.000 liubá Jesus Kristu fahe mensajen neʼebé espesiál. Toʼo ohin loron, mensajen ida-neʼe troka tiha ema rihun ba rihun nia moris iha mundu tomak. Ita hakarak hatene liután kona-ba mensajen neʼe ka lae? Ita hakarak hatene oinsá mak Ita no ema neʼebé Ita hadomi bele hetan buat diʼak husi mensajen neʼe ohin loron no ba nafatin ka lae? Testemuña ba Jeová kontente atu ajuda Ita.

Informasaun tuirmai sei ajuda Ita atu koñese liután Jesus Kristu, mane neʼebé fó sai mensajen ida neʼebé bele troka Ita-nia moris ba nafatin.

[Nota–rodapé]