Yesu Kreste—Ndlela Leyi Rungula Rakwe Ri Ku Khumbaka Ha Yona

“Ndzi tile leswaku va ta kuma vutomi ni leswaku va byi kuma hi xitalo.”—YOHANE 10:10.

LOKO Yesu Kreste a ta laha misaveni a a tele ku nyika, ku nga ri ku amukela. Hi ku chumayela kakwe, u nyike vanhu nyiko ya risima swinene hikuva rungula rakwe ri dyondzise vanhu ntiyiso malunghana ni Xikwembu ni hi ku rhandza ka xona. Lava amukelaka rungula rero va nga tiphina hi vutomi lebyi tsakisaka sweswi, hilaha Vakreste va ntiyiso lava endlaka timiliyoni va tiphinaka hakona. * Hambileswi rungula leri a ri chumayeleke ri nga ra nkoka, kambe lexi nga xa nkoka ku tlula hinkwaswo i ku va a nyikele hi vutomi byakwe lebyi hetisekeke hikwalaho ka hina. Leswaku hi tsaka hilaha ku nga heriki, swi titshege hileswaku sweswi hi angula njhani eka rungula leri ra nkoka swinene.

Leswi Xikwembu na Kreste va hi endleleke swona Yesu a a swi tiva leswaku u ta dlayiwa hi valala vakwe hi ndlela leyi hlomulaka mbilu. (Matewu 20:17-19) Kambe emaritweni yakwe lama tivekaka swinene lama nga eka Yohane 3:16 u te: “Xikwembu xi rhandze misava swinene xi kala xi nyikela hi N’wana wa xona la tswariweke a ri swakwe, leswaku un’wana ni un’wana loyi a kombisaka ripfumelo eka yena a nga lovisiwi kambe a va ni vutomi lebyi nga heriki.” Yesu u tlhele a vula leswaku a a tele ku “nyikela moya-xiviri wakwe [kumbe vutomi] wu va nkutsulo wa lavo tala.” (Matewu 20:28) Ha yini a vule leswaku vutomi byakwe a byi ta nyikeriwa ematshan’weni yo va byi tekiwa?

Leswi Xikwembu xi va rhandzaka swinene vanhu, xi endle lunghiselelo ro va kutsula eka xidyoho lexi va tswariweke na xona ni le ka vuyelo bya xona, ku nga ku nga hetiseki ni rifu. Xikwembu xi endle leswi hi ku rhumela N’wana wa xona la tswariweke a ri swakwe emisaveni leswaku a ta fa rifu ra gandzelo. Yesu u nyikele vutomi byakwe lebyi hetisekeke hi ku tirhandzela hikwalaho ka hina. Lunghiselelo leri ri vuriwa nkutsulo, ku nga nyiko leyikulu leyi Xikwembu xi yi nyikeke vanhu. * Nyiko leyi hi yona leyi nga ta hi pfuna leswaku hi kuma vutomi lebyi nga heriki.

Leswi u faneleke u swi endla Xana nyiko ya nkutsulo i ya nkoka eka wena? Sweswo swi le ka wena. Hi xikombiso: Anakanya hi munhu loyi a ku khomeleke nyiko leyi phutseriweke naswona yi nga endzeni ka bokisi. A yi nge vi ya wena kukondza u yi amukela. Hilaha ku fanaka, Yehovha u ku nyike nyiko ya nkutsulo, kambe a yi nge ku pfuni loko u nga si yi amukela. I yini leswi u nga swi endlaka leswaku u amukela nyiko leyi?

Yesu u vule leswaku lava nga ta kuma vutomi lebyi nga heriki hi lava “kombisaka ripfumelo” eka yena. Ripfumelo ri vonaka eka ndlela leyi u hanyaka ha yona. (Yakobo 2:26) Ku kombisa ripfumelo eka Yesu swi vula ku pfumelelanisa vutomi bya wena ni swilo leswi a swi vuleke ni ku swi endla. Leswaku u endla tano, u fanele u n’wi tiva kahle Yesu ni Tata wakwe. Yesu u te: “Leswi swi vula vutomi lebyi nga heriki, ku nghenisa ka vona vutivi ha wena, Xikwembu xi ri xin’we xa ntiyiso, ni loyi u n’wi rhumeke, Yesu Kreste.”—Yohane 17:3.

Emalembeni ya kwalomu ka 2 000 lama hundzeke, Yesu Kreste u chumayele rungula leri hundzuleke vutomi bya vanhu va timiliyoni emisaveni hinkwayo. Xana a wu swi tsakeli ku tiva swo tala hi rungula rero ni ndlela leyi wena swin’we ni varhandziwa va wena mi nga vuyeriwaka ha yona eka rona, ku nga ri sweswi ntsena, kambe hilaha ku nga heriki? Timbhoni ta Yehovha ti ta swi tsakela ku ku pfuna.

Swihloko leswi nga ta landzela swi ta ku pfuna leswaku u n’wi tiva kahle Yesu Kreste, wanuna la chumayeleke rungula leri nga hundzulaka vutomi bya wena hilaha ku nga heriki.

[Tinhlamuselo ta le hansi]