Iesu Mesia—Ta ˈna poroi e o oe
Iesu Mesia—Ta ˈna poroi e o oe
“I haere mai nei au ia noaa to ratou ora, e ia rahi atu â te ora.”—IOANE 10:10.
I HAERE mai na Iesu Mesia no te horoa, eiaha râ no te rave mai. Ma ta ˈna taviniraa, ua horoa oia i te hoê ô faufaa roa i te huitaata. Te hoê poroi o te faaite i te parau mau no nia i te Atua e to ˈNa hinaaro. E oraraa maitai aˈe to te feia e farii i teie poroi, ta te mau mirioni Kerisetiano ïa e haapapu nei. a Ua niu râ Iesu i ta ˈna poroi i nia i te ô faufaa roa ˈˈe o te mau ô atoa: te ora tia roa ta ˈna i horoa mai no tatou. To tatou maitai mure ore, tei to tatou huru ïa i mua i teie tuhaa faufaa roa ˈˈe o ta ˈna poroi.
Ta te Atua e te Mesia i horoa mai Ua ite Iesu e e pohe oia ma te mauiui i te rima o to ˈna mau enemi. (Mataio 20:17-19) Ua na ô râ oia i roto i te Ioane 3:16, e parau matauhia hoi: “I aroha mai te Atua i to te ao, e ua tae roa i te horoa mai i ta ˈna Tamaiti fanau tahi, ia ore ia pohe te faaroo ia ˈna ra, ia roaa râ te ora mure ore.” Ua parau atoa oia e ua haere mai oia no te “horoa i to ˈna ora ei hoo no te taata e rave rahi.” (Mataio 20:28) Aita Iesu i parau e e ravehia to ˈna ora, e horoahia râ. No te aha?
No to ˈna here faito ore, ua opua te Atua e faaora i te taata i te tumu o te huru tia ore e te pohe: te hara. Ua tono mai ïa oia i ta ˈna Tamaiti fanau tahi i te fenua nei no te pohe ei tusia. Ua farii Iesu ma te horoa i to ˈna ora taata tia roa no tatou. O te hoo ïa, te ô rahi roa ˈˈe a te Atua no te taata, o te aratai atu i te ora mure ore. b
Ia aha oe? No oe anei teie ô o te hoo? Tei ia oe noa. A hiˈo na: E ho mai te hoê taata i te tahi taoˈa puohuhia. Na oe teie taoˈa i te taime noa oe e farii e e rave ai na oe. No oe atoa te hoo ta Iehova e pûpû ra, na oe râ teie ô i te taime noa oe e farii e e rave ai i te reira. E nafea ïa?
Ua parau Iesu e o te feia te faatupu i te faaroo ia ˈna te fanaˈo i te ora mure ore. E itehia te faaroo i to oe huru oraraa. (Iakobo 2:26) Te faatupuraa i te faaroo ia Iesu, o te oraraa ïa ia au i ta ˈna i parau e i rave. No te na reira, ia ite maitai oe ia Iesu e i to ˈna Metua. “Teie hoi te ora mure ore,” ta Iesu i parau, “ia ite ratou ia oe i te Atua mau ra, e ia Iesu i te Mesia i ta oe i tono mai.”—Ioane 17:3.
Fatata e 2 000 matahiti i teie nei, ua poro Iesu Mesia i te hoê poroi tei taui i te oraraa o e mirioni taata e ati aˈe te ao. Te hinaaro ra anei oe e ite hau atu â no nia i teie poroi? Te hinaaro ra anei oe e ite e nafea oe e tei herehia e oe e faufaahia ˈi i te reira i teie nei e a muri noa ˈtu? E oaoa te mau Ite no Iehova i te tauturu ia oe.
[Nota i raro i te api]
a E ere te taata atoa e parau ra e e Kerisetiano ratou i te pǐpǐ mau a te Mesia. O te feia o te ora ia au i te pue parau mau ta ˈna i haapii no nia i te Atua e to ˈNa hinaaro te mau pǐpǐ mau a Iesu.—Mataio 7:21-23.
b No te mau haamaramaramaraa hau no nia i te haapiiraa Bibilia o te hoo, a hiˈo i te pene 5, “Te hoo—te ô rahi roa ˈˈe a te Atua,” o te buka Eaha ta te Bibilia e haapii mau ra? piahia e te mau Ite no Iehova.