Angin e Thin Rok Jesus Kristus Ngom

“Ku gub ni bochan e nge yog e yafos ngorad, ni yafos ni ke yan i mus nga rogon.”​—JOHN 10:10.

I YIB Jesus Kristus nga fayleng ni nge pi’ ban’en ma gathi ngan pi’ ban’en ngak. I pi’ reb e tow’ath ko girdi’ ndabiyog puluwon u daken e machib ni i tay ni aram e thin nriyul’ u murung’agen Got nge n’en nib m’agan’ ngay. Piin ni yad ra motoyil ko re thin nem e rayog ni ngar felfelan’gad ni bod rogon e tin riyul’ e Kristiano. * Machane, n’en nth’abi ga’ fan u fithik’ e machib ni i tay Jesus e aram fare tow’ath nrib fel’ ni aram e yafas rok ni pi’ ni fan ngodad. Ere rogon e yafas rodad boch nga m’on e be yan u rogon e fol ni gad ra tay ko thin rok.

N’en ni pi’ Got nge Kristus Manang Jesus nthingari yim’ u fithik’ e amith u pa’ e pi toogor rok. (Matthew 20:17-19) Ki yog Jesus u John 3:16 ni gaar: “Yi Got e rib t’uf e girdi’ nu fayleng rok, ma aram me pi’ Fak ni kari maagirag rok nge yib, ni fan e nge urngin e piin ni michan’rad ngak e aram e dab kur m’ad, ya ke yog e yafos ndariy n’umngin nap’an ngorad.” Ki yog Jesus ni “yib ni nge pigpig me pi’ e pogofan rok nge biyuliy boor e girdi’ ngay.” (Matthew 20:28) Mang fan ni yog nra pi’ e yafas rok ma gathi ngan fek?

Bochan e t’ufeg rok Got ma aram fan ni rin’ e re n’ey ni fan ko girdi’ ni ngar chuwgad u fithik’ e denen nge yam’. I pi’ Got Fak ni kari maagirag rok ni nge yib nga fayleng ni nge yim’ nib maligach. I fol Jesus ko n’en ni yog Got ngak ma aram fan ni pi’ e yafas rok nib flont ni fan ngodad. Re n’ey e yima yog e biyul ngay ma aray e bin th’abi fel’ e tow’ath ni ke pi’ Got ni fan ko girdi’. * Ma re tow’ath ney e ra yognag e yafas ni manemus.

N’en nib t’uf ni ngam rin’ Ga be lemnag ma fare biyul e ba tow’ath ni fan ngom, fa? Ra ngan susunnag ma bod ni ke pi’ be’ reb e tow’ath ngom ni bay u lan e kahol ni kan engeng. Fare tow’ath e dabiyog ni nga mog ni fanam ni faanra dab mu fek. Ere ku taareb rogon ko fare biyul ni ke pi’ Jehovah ndabiyog ni nga nog ni fan ngom ni faanra de fel’ u wan’um. Ni uw rogon?

I yog Jesus ni yigoo piin nra ‘michan’rad’ ngak e ra yog e yafas ni manemus ngorad. Michan’ e ba muun ngay e n’en ni ga ma rin’. (James 2:26) Ere faanra nge mich Jesus u wan’um ma be yip’ fan ni ngam puluwnag e yafas rom ko n’en ni i yog nge n’en ni i rin’. Faanra ngam rin’ ni aram rogon ma thingar mu nang Jesus nge Chitamangin nib fel’ rogon. I yog Jesus ni gaar: “Baara’ ira’ e yafos ndariy n’umngin nap’an ni aram e nge nangem e girdi’ ni kari mmus ni gur e bin riyul’ e Got, mi yad nang ko mini’ Jesus Kristus ni ir e kam l’og ke yib.”​—John 17:3.

Sogonap’an 2,000 e duw ni ke yan me machibnag Jesus ban’en ni ke thilyeg e yafas rok bokum milyon e girdi’ u fayleng. Ga baadag ni ngkum nang boch murung’agen e re thin nem nge rogon nra yib angin ngak e piin ni yad ba t’uf rom e chiney i yan ngaram, fa? Faanra arrogon ma rra felfelan’ e Pi Mich Rok Jehovah ni ngar ayuweged gur.

Tin migid e thin e ku ra tamilangnag boch ban’en u murung’agen Jesus Kristus ni aram fare moon ni machibnag ban’en ni rayog ni nge thilyeg e yafas rom.

[Footnotes]