Jesucristo: ¿Baʼax yaan yil yéetel a kuxtal le baʼax tu kaʼansoʼ?

«Teneʼ taalajaʼanen utiaʼal ka yanak kuxtal tiʼob, kuxtal ka jach yaʼabak tiʼob.» (JUAN 10:10)

JESUCRISTOEʼ taal way Luʼum utiaʼal u yáantik máakeʼ, maʼ utiaʼal ka áantaʼakiʼ. Le baʼaxoʼob tu kʼaʼaytoʼ upʼéel nojoch siibal tumen tu tsʼáaj kʼaj óoltbil u jaajil yoʼolal Dios yéetel baʼax u tukulmaj u beetik. Yoʼolal lelaʼ u millonesi máakoʼob yantiʼob kiʼimak óolal ichil u kuxtaloʼob. * Le baʼaxoʼob tu kaʼansoʼ, tu yeʼesaj máakalmáak le maas nojoch siibal tsʼoʼok u tsʼaʼabaltoʼonoʼ: u kuxtal Jesús tu kʼubaj t-oʼolaloʼ. Baʼaleʼ wa k-kʼáat ka xiʼiktoʼon utsil tiʼ tuláakal u kʼiiniloʼob k-kuxtaleʼ, unaj k-tsʼáaik ichil k-kuxtal le baʼaxoʼob tu kaʼansaj Jesusoʼ.

U siibal Dios yéetel Cristo Jesuseʼ u yojel kaʼacheʼ yaan u beetaʼal u muʼyaj yéetel u kíimsaʼal tumen le máaxoʼob pʼekmiloʼ (Mateo 20:17-19). Kex beyoʼ taal way Luʼumeʼ. Jeʼex u yeʼesik le tʼaanoʼob ku chíikpajal teʼ Juan 3:16, «Jajal Dioseʼ tu sen yaabiltaj le yóokʼol kaabaʼ, ka tu tsʼáaj u juntúuliliʼ Paal, utiaʼal tuláakal le máax ku yoksik u yóol tiʼeʼ maʼ u saʼatal, baʼaleʼ ka yanak kuxtal minaʼan u xuul tiʼ». Tak Jesús aʼaleʼ taal way yóokʼol kaab «utiaʼal u tsʼáa u kuxtal bey jumpʼéel boʼol utiaʼal u jáalkʼabtaʼal yaʼabkach máakoʼobeʼ» (Mateo 20:28). Teʼelaʼ Jesuseʼ tu yaʼalaj taal u tsʼáa u kuxtal, maʼ tu yaʼalaj wa yaan u kíimsaʼaliʼ, ¿baʼaxten tu yaʼalaj lelaʼ?

Tumen jach nojoch u yaabilaj Dios yoʼolal le wíinikoʼoboʼ, tu yóotaj u salvartoʼon tiʼ le kʼeban yéetel tiʼ le kíimil tu pʼatajtoʼon Adán yéetel Evaoʼ. Le oʼolaleʼ tu túuxtaj u juntúuliliʼ Paal way Luʼum utiaʼal ka u tsʼáa u kuxtal t-oʼolaloʼ. Jesuseʼ tu yóotaj xan u tsʼáa u kuxtal. Le baʼax tu beetaj Diosaʼ upʼéel jach nojoch siibal mix máak uláakʼ u beet tu yoʼolal le wíinikoʼoboʼ, tumen ku tsʼáaik u páajtalil k-kuxtal utiaʼal minaʼan u xuul. *

Bix jeʼel a jóoʼsik u yutsileʼ Maʼalob ka a tukult wa a kʼáat a jóoʼs u yutsil le siibalaʼ. Tukult lelaʼ: Wa ka tsʼaʼabaktech upʼéel siibaleʼ, ¿baʼax jeʼel a beetikeʼ? Maʼ xaaneʼ techeʼ ka waʼalik: «Kin chʼaʼik yéetel kin tsʼáaik u diosboʼotikil». Láayliʼ bey u yúuchul yéetel le siibal ku tsʼáaik Dios tiʼ le wíinikoʼoboʼ. Tuláakal le máax u kʼáat u jóoʼs u yutsil le siibalaʼ unaj u yeʼesik u kʼáat u kʼame. ¿Bix ken u yeʼesil?

Jeʼex tsʼoʼok k-ilkoʼ, Jesuseʼ tu yaʼaleʼ chéen le máaxoʼob ken u tsʼáa u fejoʼob tiʼ letiʼ ken u kʼamoʼob le kuxtal minaʼan u xuuloʼ. Tsʼoʼoleʼ le fejoʼ ku yeʼesik máak yoʼolal bix u kuxtal (Santiago 2:26). Bey túunoʼ unaj k-kuxtal jeʼex tu kaʼansil Jesusoʼ. Utiaʼal lelaʼ unaj k-kʼaj óoltik tubeel letiʼ yéetel u Taata. Jeʼex tu yaʼalil Jesusoʼ: «Le kuxtal minaʼan u xuuloʼ letiʼ lelaʼ: ka u kʼaj óoltoʼob teech chéen juntúuliliʼ Jajal Dios, yéetel ka u kʼaj óoltoʼob Jesucristo le máax ta túuxtajoʼ» (Juan 17:3).

Kex tsʼoʼok u máan dos mil jaʼaboʼob u kaʼans Jesús le baʼaloʼobaʼ, tsʼoʼok u kʼexik u kuxtal u millonesi máakoʼob tiʼ tuláakal yóokʼol kaab. ¿A kʼáat wa a wojéelt u maasil tu yoʼolal le baʼaxoʼob tu kaʼansoʼ? ¿A kʼáat wa a wojéelt bix jeʼel a jóoʼsik mantatsʼ u yutsil le baʼaxoʼob tu kaʼansaj Jesús teech yéetel a familiaoʼ? Wa beyoʼ kaxt u yáantaj u j-jaajkunajoʼob Jéeoba (testigos de Jehová), letiʼobeʼ jeʼel u yáantkechoʼob a wil u núukil le kʼáatchiʼobaʼ.

Teʼ tuláakʼ xookoʼoboʼ yaan k-kanik uláakʼ baʼaloʼob tiʼ Jesucristo, le máax jeʼel u kʼexik u kuxtal máak yéetel le baʼaxoʼob tu kaʼansoʼ.

[Tsolajiloʼob]