Eroestorya Kontra sa Totoo—An Katotoohan Manongod ki Jesus
Eroestorya Kontra sa Totoo—An Katotoohan Manongod ki Jesus
ANO SA PAGHONA NINDO? AN MINASUNOD DAW NA MGA PANINIWALA TOTOO O EROESTORYA?
Si Jesus namundag nin Disyembre 25.
May tolong madonong na lalaki na nagbisita ki Jesus kan sia mamundag.
Si Jesus solong aki.
Si Jesus Dios na nagpakangtawo.
Si Jesus bako sanang sarong marahay na tawo.
DAKOL an masimbag na totoo an gabos na sinambit sa enotan. An iba tibaad magsabi na depisil—imposible pa ngani—na makasegurado. Tibaad naghohona sinda na basta naniniwala kamo ki Jesus, bako nang mahalaga an simbag.
Minsan siring, iba man an sinasabi kan Biblia. Dinadagka kita kaiyan na magkaigwa nin “tamang kaaraman dapit sa satong Kagurangnan na Jesu-Cristo.” (2 Pedro 1:8) Makukua niato an kaaraman na iyan paagi sa pagsiyasat sa mga Ebanghelyo. Ihinahayag kaiyan an katotoohan manongod ki Jesus, na tinatabangan kitang mamidbid kun arin an eroestorya sana asin kun arin an totoo. Kaya konsideraron niato kun ano an ipinaparisa kan mga Ebanghelyo mapadapit sa mga paniniwalang nasambit sa enotan.
PANINIWALA: Si Jesus namundag nin Disyembre 25.
KATEGORIYA: EROESTORYA.
Mayong direktang pagsambit sa Biblia mapadapit sa bulan o aldaw kan pagkamundag ni Jesus. Kun siring, saen hale an petsang Disyembre 25? Segun sa The Encyclopædia Britannica, an nagkapirang naghihingakong Kristiano “nagmawot na an petsa makadungan kan paganong Romanong kapiestahan na nagsesenyal . . . kan winter solstice, an panahon na an mga oras na maliwanag nagpopoon na maglawig giraray asin an saldang nagpopoon na mag-itaas nin mas halangkaw.” An iyo man sanang reperensia nagsasabi na dakol sa mga kaugalean kun Pasko an naggikan sa “paganong mga selebrasyon may koneksion sa agrikultura asin saldang durante kan katahawan nin tiglipot.”
Maoyon daw si Jesus na iselebrar nin Disyembre 25 an saiyang pagkamundag? Isip-isipa: An aldaw kan pagkamundag ni Jesus dai aram. Mayo man lamang nin sinasabi an Biblia na iselebrar niato an pagkamundag na iyan, ni may ano man na ebidensia na sinelebrar iyan kan enot na mga Kristiano. Sa kabaliktaran, sinasambit kan Biblia an eksaktong aldaw kan kagadanan ni Jesus, asin pinagbotan nia an saiyang mga disipulo na girumdomon an aldaw na iyan. * (Lucas 22:19) Malinaw nanggad, boot ni Jesus na idoon, bako an saiyang pagkamundag, kundi an halaga kan saiyang kagadanan bilang atang.—Mateo 20:28.
PANINIWALA: May tolong madonong na lalaki (o mga hade oyon sa nagkapirang tradisyon) na nagbisita ki Jesus kan sia mamundag.
KATEGORIYA: EROESTORYA.
Nakaheling na gayod kamo nin mga ipininta o belen na naglaladawan sa omboy na si Jesus na nasa bahogan, na napapalibotan nin tolong madonong na lalaki na may darang mga regalo. Minsan siring, an paglaladawan na ini imahinasyon sana, bakong totoo.
Totoo na sarong grupo hale sa Sirangan an nagtaong galang sa aking si Jesus. Pero, an mga bisitang ini sa katunayan mga astrologo. (Mateo 2:1, An Banal na Biblia, Edisyon 2007, nota sa ibaba) Asin nanompongan daw ninda si Jesus na yaon sa bahogan? Dai; binisita ninda sia sa sarong harong. Minalataw na nag-abot sinda mga pirang bulan pagkamundag ni Jesus.—Mateo 2:9-11.
Kun dapit sa bilang kan mga nagbisita, igwa daw nin 2? 3? 30? Dai sinasabi kan Biblia. An tradisyonal na bilang na tolo naggikan gayod sa saindang tolong klase nin regalo. * (Mateo 2:11) An nagkapira nagsuherir pa ngani na an kada saro sa sinasabing madonong na mga lalaki nagrerepresentar sa sarong partikular na rasa nin katawohan. Alagad an ideyang iyan mayo sa Kasuratan. Imbes, siring sa sinasabi nin sarong komentaryo sa Ebanghelyo, an partikular na eroestoryang ini inimbento nin “sarong historyador kan ikawalong siglo na may buhay na buhay na imahinasyon.”
PANINIWALA: Si Jesus solong aki.
KATEGORIYA: EROESTORYA.
Malinaw na ipinapaheling sa mga Ebanghelyo na si Jesus igwa nin mga tugang. An Ebanghelyo ni Lucas nagsambit ki Jesus bilang an “panganay” ni Maria, na nagpaparisa na nagkaigwa pa ini nin ibang mga aki. * (Lucas 2:7) An Ebanghelyo ni Marcos nagsasabi na an nagkapira sa siudad nin Nazaret ipinareho si Jesus sa saiyang mga tugang, na minamansay sia na ordinaryo sana. Naghapot sinda: “Bakong tugang siya ni Santiago, Jose, Judas asin ni Simon? Bakong digdi nag-eerok an mga tugang niyang babae?”—Marcos 6:3, An Marahay na Bareta Biblia; Mateo 12:46; Juan 7:5.
Sa ibong kan sinasabi kan mga Ebanghelyo, dakol na teologo an marigon na nagtutubod na si Jesus solong aki. An nagkapira nagsusuherir na an mga nasambit na tugang na lalaki asin babae sa katunayan mga pinsan ni Jesus. * An iba nagbabanabana na an mga tugang na ini mga aki ni Jose sa mas naenot niang agom. Alagad isip-isipa: Kun si Jesus solong aki ni Maria, taano ta sinabi kan mga taga Nazaret na idto na may mga tugang sia? Sa kabaliktaran, posibleng marhay na naheling mismo kan nagkapira sa sainda an mga pagbados ni Maria. Aram ninda mismo na si Jesus saro sa dakol na ipinangaki ni Maria.
PANINIWALA: Si Jesus Dios na nagpakangtawo.
KATEGORIYA: EROESTORYA.
An ideya na an Dios nagdigdi sa daga asin nabuhay bilang an tawong si Jesus, na mahalagang marhay sa doktrinang Trinidad, haloy nang nag-eeksister—alagad mayo pa iyan kan panahon ni Jesus. Imbes, an The Encyclopædia Britannica nagsasabi: “An tataramon na Trinidad ni an paliwanag sa doktrinang iyan dai minalataw sa Bagong Tipan . . . An doktrina luway-luway na nabilog sa laog nin nagkapirang siglo asin sa ibong nin dakol na kontrobersia.”
An totoo, minemenos nin relihion si Jesus kun itinotokdo kaiyan na sia Dios na nasa hawak na laman. * Paano man? Estudyare an sarong ilustrasyon. An nagkapirang trabahador may hinahagad sa saindang superbisor, alagad sinabi nia na mayo siang autoridad na itao iyan. Kun totoo an sinabi nia, madonong na ipinaheling kan superbisor na aram nia an saiyang mga limitasyon. Kun bakong totoo iyan—kun kaya niang itao an kahagadan alagad nagdesisyon sana siang dai iyan itao—sia nagin mapandaya.
Ngonyan, paano suminimbag si Jesus kan an duwa sa saiyang mga apostol magmawot nin prominenteng mga posisyon? Sinabihan nia sinda: “Ining pagtukaw sa sakong too asin sa sakong wala bakong sako an pagtao, kundi iyan para sa mga inandaman kan sakong Ama.” (Mateo 20:23) Kun si Jesus talagang Dios, bako daw na iyan pagputik? Imbes, paagi sa pagpasakop sa Saro na igwa nin mas dakulang autoridad, nagtao si Jesus nin magayon na halimbawa nin kababaan nin boot—asin ipinaheling nia na bako siang kapantay nin Dios.
PANINIWALA: Si Jesus bako sanang sarong marahay na tawo.
KATEGORIYA: TOTOO.
Malinaw na sinabi ni Jesus na sia labi pa sa sarong marahay na tawo. Sinabi nia: “Ako iyo an Aki nin Dios.” (Juan 10:36) Siempre, maski siisay puedeng maghingako na sia an Aki nin Dios. Alagad kun an sinabi ni Jesus bakong totoo, gigibohon sia kaiyan na ano? Iyo, bakong sarong marahay na tawo, kundi sarong dakulang impostor!
An pinakamasasarigan na patotoo naggikan sa Dios mismo. Duwang beses siang nagsabi mapadapit ki Jesus: “Ini an sakong Aki.” (Mateo 3:17; 17:5) Isip-isipa na sana: An Kasuratan nagsasambit nin pipira sanang pangyayari na an mismong tingog nin Dios nadangog sa daga—pero sa duwa kaiyan kinompirmar niang Aki nia si Jesus! Ini an pinakamakosog na prueba na totoo an sinabi ni Jesus dapit sa kun siisay man nanggad sia.
May nadiskobre daw kamo sa artikulong ini na mga katotoohan manongod ki Jesus na dati dai nindo aram? Kun igwa, taano ta dai siyasaton nin orog pa an ipinasabong na mga Ebanghelyo? An siring na pag-adal puedeng magin nakakagayagaya sagkod nakakakontento. Total, sinabi mismo ni Jesus na an pakaaram kan katotoohan manongod sa saiya asin sa saiyang Ama “nangangahulogan nin buhay na daing katapusan.”—Juan 17:3.
[Mga Nota sa Ibaba]
^ par. 13 Si Jesus nagadan kan Aldaw nin Paskua, o Nisan 14, segun sa Judiong kalendaryo.—Mateo 26:2.
^ par. 18 Sinasabi ni Mateo na ‘binukasan kan mga taga ibang daga an saindang mga kayamanan,’ asin nagregalo ki Jesus nin bulawan, kamangyan, asin mira. Interesante nanggad, an mamahalon na mga regalong idto tibaad nag-abot nin tamang-tama sa panahon, huling an pamilya ni Jesus—na minalataw na dukha—dai nahaloy napiritan na mamuhay bilang mga dulag.—Mateo 2:11-15.
^ par. 21 Minsan ngani milagroso an pangingidam ki Jesus, an iba pang mga aki ni Maria asin Jose ipinangidam sa natural na paagi.—Mateo 1:25.
^ par. 22 An ideyang ini, na iininsistir ni Jeronimo kan mga 383 C.E., popular sa mga naniniwala na si Maria nagdanay na birhen sa bilog niang buhay. Kan huri, si Jeronimo nagpahayag nin mga pagduda manongod sa saiyang teoriya, alagad sa isip kan dakol—asin sa opisyal na paninindogan kan Iglesia Katolika—an ideyang iyan nagdadanay.
^ par. 26 Para sa lubos na pagtokar sa doktrinang Trinidad, helingon an brosyur na Should You Believe in the Trinity? na ipinublikar kan Mga Saksi ni Jehova.
[Kahon/Ritrato sa pahina 14]
Dagdag Pang mga Katotoohan na Tibaad Makasorpresa sa Saindo
Anong klaseng tawo kaidto si Jesus? Sia daw estriktohon, na daing pakiaram asin malasakit, kaya nasasakitan siang makiiba sa ordinaryong tawo? May nagkapirang masimbag nin iyo. Iyan gayod an dahelan na nasosorpresa sindang maaraman na si Jesus . . .
• nag-atender sa maogmang pagtiripontipon.—Juan 2:1-11.
• nagtao nin komendasyon.—Marcos 14:6-9.
• maogmang nakiiba sa mga aki.—Marcos 10:13, 14.
• naghibi nin hayagan.—Juan 11:35.
• nakamate nin pagkaherak.—Marcos 1:40, 41.