Katak ko Rejjab Mol ñe Keiri Iben Katak ko Remol kin Jisõs

TA LEMNOK EO AM? NAN KEIN ITULÕL REMOL KE AK JAB?

Jisõs ear lotak ilo Tijemba 25 ran.

Dri kanbil ro jilu rar lolok Jisõs ilo ien eo ear lotak.

Ear ejelok ro jãtin Jisõs.

Jisõs ear Anij ilo nememen armij.

Jisõs ear jab baj juõn armij emõn.

ELÕÑ remaroñ ba bwe aolep nan kein itulõñ remol. Ro jet remaroñ ba bwe ebin ñõn air lukkun jela elañe remol. Bwelen rein rej bõk lemnok eo bwe elañe kwoj tõmak ilo Jisõs, inem uak eo ejjab lukkun aurõk.

Bõtab, eoktõk ta eo Baibel ej ba kin men in. Ej rejañ kij bwe en jime ar “jela ar Iroij Jisõs Kraist.” (2 Piter 1:8) Jej bõk jelalokjen in ilo ar etale Gospel ko. Rej kwalok mol eo kin Jisõs, im men in ej kamaroñ kij ñõn ar kile katak ko remol jen katak ko rewan. Inem jen etale ta eo Gospel ko rej kalikari ikijen katak ko me kar kõlajrõki itulõñ.

TÕMAK EO: Jisõs ear lotak ilo Tijemba 25 ran.

EMOL KE AK JAB: JAB MOL.

Baibel eo ejjab kalikar kin ta aliñ eo ak ran eo Jisõs ear lotak ie. Inem, etke kar kãlet Tijemba 25 ran? Ekkar ñõn buk eo Encyclopædia Britannica, jet ian ro im rar mõke naetair dri Kristian ro rar “kõnan bwe ran eo en jejit ñõn ran eo dri pegan ro ilo Rom rekin kememe . . . ien eo ñe ran ko rej bar jino aitoklok im ial in makõtkit eo an al eo ej jino utiejlok.” Ilo ejja buk eo wõt ej ba bwe elõñ mõnit ko mõntin Christmas rar itok jen “mõnit ko an dri pegan ro ikijen ien kallip im makõtkit ko an al ilo ien bio.”

 Jisõs enaj ke buñburuen kin an armij ro kememe ran in lotak eo an ilo Tijemba 25 ran? Lemnok mõk kin men in: Ejjab alikar ran ta eo Jisõs ear lotak ie. Ejelok juõn eon ilo Baibel eo ej jiroñ kij ñõn kememe ran in lotak eo an, im ejelok kein kamol ko me rej kalikar bwe dri Kristian ro jinoin rar kememe ien lotak eo an. Ilo okõtõn men in, Baibel eo ej kwalok ilo alikar kin ran in mij eo an Jisõs, im ear kakien dri kalor ro an ñõn air kememeje ran in. * (Luk 22:19) Alikar, Jisõs ear kõnan kalikar kin aurõkin katok in mij eo an im jab ran in lotak eo an.​—Matu 20:28.

TÕMAK EO: Dri kanbil ro jilu (ak kiñ ro, ekkar ñõn jet tõmak ko) rar lolok Jisõs ilo ien eo ear lotak.

EMOL KE AK JAB: JAB MOL.

Bwelen emwij am lo jiña ko ak menin ekjõp ko me rej kwalok an niñniñ eo Jisõs babu ilo menjer eo, im dri kanbil ro jilu rej jutõk iturin kin menin lelok ko air. Bõtab, ejjab mol lemnok in an armij ro.

Emol, ear or juõn kumi in armij ro jen iturear me rar lolok Jisõs ñõn air koutiej e ke ear drik. Ilo mol, dri lotok rein rar dri jedjed iju ro. (Matu 2:1, UBS) Bõtab, rar ke lo an Jisõs babu ilo menjer eo? Jaab; rar lolok e ilo juõn im. Alikar, rar tõkãklok ijo jet aliñ ko elikin an kar Jisõs lotak.​—Matu 2:​9-​11.

Ak ikijen oran dri lotok ro, ear ke or joñõn in 2? 3? 30? Baibel eo ejjab ba. Bwelen unin elõñ rej lemnok bwe ear or jilu kinke ear or jilu kain menin lelok ko. * (Matu 2:​11) Jet rar bareinwõt bõkmantak lemnok eo bwe kajjojo ian dri kanbil ro jilu rar jutõk kin ailiñ ko rekajjo jen dron. Bõtab, lemnok in ejjab ber ilo Baibel eo. Jen men in, einwõt an kar juõn buk in etale Gospel eo ba, katak in ejjab mol ej kõmõn in “juõn dri jeje bwebwenato me ear mour enañin 1,300 yiõ ko remotlok im ejela kine bwebwenato ko.”

TÕMAK EO: Ear ejelok ro jãtin Jisõs.

EMOL KE AK JAB: JAB MOL.

Gospel ko rej kalikar bwe ear or ro jãtin Jisõs. Gospel eo an Luk ej konono kin Jisõs einwõt ‘manje’ eo nejin Meri, im men in ej kalikar bwe ear or ajiri ro jet nejin Meri tokelik. * (Luk 2:7) Gospel eo an Mark ej kwalok bwe jet ian armij ro ilo jikin kwelok in Nazeret rar watõk Jisõs bwe ekar joñõn wõt ro jãtin im ejelok bwinbwinin. Rar kajitõk: “Le in e jab . . . jein Jemes im Joses im Judas im Saimon ke? im ro jãtin kõra re jab ber iber ke?”​—Mark 6:3; Matu 12:46; Jon 7:5.

Jekron ta eo Gospel ko rej ba, elõñ dri etale ro kin kabuñ rej drebij wõt lemnok eo bwe ear ejelok ro jãtin Jisõs. Jet rar ba bwe, ilo mol ro jãtin Jisõs rar ro nukin. * Ro jet rej lemnok bwe ro jãtin Jisõs rar ro nejin Josep mõke im jab Meri. Ak lemnok mõk: Elañe ear or juõn wõt nejin Meri, inem armij ro ilo jikin kwelok in Nazeret renaj kar ba ke nan ko air? Ilo okõtõn men in, jet iair rar lo an Meri bõroro kin ajiri ro nejin. Rar jela bwe Jisõs ear juõn ian ajiri ro me Meri ear keutak ir.

TÕMAK EO: Jisõs ear Anij ilo nememen armij.

EMOL KE AK JAB: JAB MOL.

Lemnok eo bwe Anij ear itok ñõn lõl im mour einwõt armij eo Jisõs, me ej juõn katak elap eo ej jurake katak eo kin Trinity, ear ber jen ien ko etto, bõtab ejañin kar walok ilo ien eo Jisõs ear ber ion lõl. Jen men in, The  Encyclopædia Britannica ej ba: “Nan in Trinity ak katak eo kin men in ear jab ber ilo Kalimur eo Ekãl . . . Katak in ear ejaak jidrik kin jidrik iomin elõñ buki yiõ ko im ear juõn katak me elõñ rar jab errã iben dron kake.”

Ilo mol, jabrewõt kabuñ ko me rej katakin bwe Jisõs ear Anij ilo nememen armij, rej kõmõn bwe armij ro ren jab liki E. * Ewi wãwen? Lemnok kin wanjoñok in. Jet dri jerbal ro rej kajitõk juõn men iben juõn dri utiej ilo jikin jerbal eo, ak ej ba bwe ejelok an maroñ ñõn kamelim ir. Elañe ej mol, inem ilo meletlet, ej kwalok bwe ej kile joñõn maroñ ko iben. Bõtab, elañe ear or an maroñ ñõn kamelim ir kin men eo rar kajitõk kake ak ear kãlet ñõn jab kõmõne, inem ear mõne ir.

Ak kiõ, ewi wãwen an kar Jisõs emakõt ke ruo ian dri jilik ro an rar kajitõk iben elañe remaroñ bõk jikin ko reutiej? Ear jiroñ ir: “A kin amiro jijõt i anbijmaroñiõ, im i anmiñiõ, e jab Aõ bwe In lewoj, a Jema e naj lelok ñõn ro E ar kapojõk ñõn ir.” (Matu 20:23) Elañe Jisõs ear Anij, inem ejjab melelen ke bwe ear riõpe ir? Jen an kõmõne men in, Jisõs ear kõtãik e ñõn Eo elaplok maroñ iben, im ilo wãwen in ear likit juõn joñok emõn kin etã buru im ear kwalok bwe ear jab joñõn wõt Anij.

TÕMAK EO: Jisõs ear jab baj juõn armij emõn.

EMOL KE AK JAB: EMOL.

Jisõs ear kalikar bwe ear jab baj juõn armij emõn. Ear ba: “Ña Nejin Anij.” (Jon 10:36) Emol, jabrewõt armij emaroñ ba bwe ej Nejin Anij. Bõtab, elañe nan kein an Jisõs rar jab mol, ta eo men in ej kwalok ñõn kij kin e? Ejelok berre, men in enaj kar kalikar bwe ejjab juõn armij emõn ak ej juõn dri riõp elap!

Kein kamol eo elaptata ear itok jen Anij mõke. Ikijen Jisõs, ruo alen ear ba: “E in Nejiõ jitenburu iba.” (Matu 3:​17; 17:5) Baj lemnok mõk: Baibel eo ej kwalok kin jet wõt ien ko rar maroñ roñ ainiken Anij jen lõñ, im ilo ruo ian ien kein ear kamol bwe Jisõs ej Nejin! Eñin kein kamol eo emõntata ikijen nan ko an Jisõs bwe ej Nejin Anij.

Katak in ear ke kwalok jabrewõt katak ko remol kin Jisõs me kwar jab jela kaki mokta? Elañe aet, inem etke kwojjab kalaplok am etale Gospel ko emwij kakõrmoli? Am kõmõne men in enaj bõktok lõñliñ im jerammõn ko ñõn yuk. Men in ej eindrein kinke Jisõs mõke ear ba bwe ilo ar katak mol eo kin e im Jemen, jenaj maroñ bõk “mour in drio.”​—Jon 17:3.

[Footnotes]

[Box/​Pija ilo 14]

Katak ko Jet Remol me Kwomaroñ Kar Jaje Kaki

 

Kain armij rõt kar Jisõs? Ear ke juõn eo me ear kamakelok ian im ear makoko in kõmao iben armij ro jet? Jet remaroñ uak im ba aet. Bwelen eñin unin rej bwilõñ ñe rej katak bwe Jisõs ear . . .

• ber ilo ien iiaio ko rekalõñliñ.​—Jon 2:​1-​11.

• lelok nan in nebar ko.​—Mark 14:​6-9.

• lõñliñ in ber ibwiljin ajiri ro.​—Mark 10:13, 14.

• jõñ iman mejen armij ro.​—Jon 11:35.

• tiriamokake.​—Mark 1:​40, 41.