Padahk Likamw de Mehlel​—Ire Mehlel me Pid Sises

IA OMW MADAMADAU? PADAHK PWUKAT MEHLEL DE LIKAMW?

Sises ketin ipwidi ni December 25.

Ohl loalokong silimen pwarala rehn Sises ni ahnsou me e ketin ipwidi.

Sohte rien Sises pwutak de serepein.

Sises iei Koht ahpw sapwellimanki paliweren aramas.

Sises sohte ketin wiahte ohl mwahu men.

ARAMAS tohto pahn nda me padahk pwukat koaros mehlel. Ele ekei kin nda me e apwal, de re sohte kak ese ni mehlel. Mwein re pehm me pasapeng kan sohte nohn kesempwal ma ke kin kamehlele Sises.

Ahpw dahme Paipel mahsanih weksang met. E kin kangoange kitail en “loalokongkihla atail Kaun Sises Krais.” (2 Piter 1:8) Kitail kin ale loalokong wet sang ni atail tehk Pwuhken Rongamwahu kan. Pwuhk pwukat kin kasalehda dahme mehlel duwen Sises oh kak sewese kitail en katohrepeseng soai likamw kan sang dahme mehlel. Eri kitail en tehk dahme Pwuhken Rongamwahu kan kasalehda duwen padahk pwukat me kileldi powe.

DAHME ME TOHTO KIN KAMEHLELE: Sises ketin ipwidi ni December 25.

MEHLEL DE LIKAMW?: LIKAMW.

Paipel sohte mahsanih mehnia sounpwong de mehnia rahn me Sises ketin ipwidi. Eri, ia wasa December 25 kohsang ii? Ehu dikseneri koasoia me ekei irail kan me kin nda me irail Kristian “kin men rahno en pahrekiong rahnen kasarawi kan me mehn Rom kan kin wia . . . ahnsou me rahn kin pwurehng tepida reireila oh ketipin kin pwurehng tepida dakada ilehla pahnlahng.” (The Encyclopædia Britannica) Pwuhk wet pil kasalehda me tiahk en Krismas tohto kin kohsang “kasarawi kan me pidada soumwet kan oh pil ketipin” nan sounpwong en December de January.

 Ia duwe, Sises pahn kupwurki kasarawih eh ipwidi ni December 25? Medewehla: Sohte me ese rahn me Sises ketin ipwidi. Sohte wasa kis nan Pwuhk Sarawi me padahkihong kitail en kasarawih rahnen ipwidi wet, oh sohte mehn kadehde me tepin Kristian akan kin wia met. Weksang met, Paipel kin kasalehda rahn me Sises pwoula, oh Sises ketin padahkihong sapwellime tohnpadahk kan en kasarawih rahno. * (Luk 22:19) Eri, Sises kin kupwurki kasalehda kesempwalpen eh pwoula ni tounmetei, a kaidehn rahnen eh ipwidi.—Madiu 20:28.

DAHME ME TOHTO KIN KAMEHLELE: Ohl loalokong silimen (de nanmwarki kei nin duwen ekei kin kamehlele) pwarala rehn Sises ni ahnsou me e ketin ipwidi.

MEHLEL DE LIKAMW?: LIKAMW.

Mwein ke kin kilang mahlen, kasdo de sipai kan me kasalehda duwen seri pwelelo me iei Sises eh wonohn nan dewen kamwenge mahn ehu oh ohl loalokong silimeno kapilpene ih iangahki arail kisakis kan. Kilel pwukat sohte mehlel. Aramas me pein wiahda.

Ei, mehlel me aramas pwukat sang palimese pwarodo rehn Sises ahnsou me e kisin seri. Ahpw irail uhdahn wia soun kosetipw kei sang arail kin kasawih usu kan. (Madiu 2:1) Ia duwe, irail diar Sises wonohn nan dewen kamwenge mahn ehu? Soh; re pwarala reh ni ihmw ehu. Eri e sansal me re lel wasao sounpwong kei mwurin Sises eh ketin ipwidi.—Madiu 2:9-11.

Irail meh depe me pwarala reh? Meh 2? 3? 30? Paipel sohte mahsanih meh depe. Mwein sangete mahs aramas medewe me meh silimen pwehki sang ni soangen kisakis siluh me re wahla. * (Madiu 2:11) Ekei pil nda me emenemen ohl loalokong pwukat kin wiliandi ehu soangen keinek en aramas. Ahpw madamadau wet sohte kohsang nan Pwuhk Sarawi. Nin duwen ehu pwuhken kawehwe en Pwuhken Rongamwahu koasoia, soai likamw wet kohsang “madamadau en emen soupoad nan pahr 700 samwa.”

DAHME ME TOHTO KIN KAMEHLELE: Sohte rien Sises pwutak de serepein.

MEHLEL DE LIKAMW?: LIKAMW.

Pwuhken Rongamwahu kasalehda ni sansal me mie rien Sises. Pwuhken Luk mahsanih me Sises iei nein Mery “mesenih,” met kasalehda me e naitikihada seri teikan. * (Luk 2:7) Pwuhken Mark mahsanih me ekei nan kahnimw en Nasaret kin kilangwohng Sises me sohte kesempwal pwe re kin medewe me e duwehte rie kan. Re kin idek: “Kaidehkin ih . . . rien Seims, Soses, Sudas oh Saimon? Kaidehkin rie lih me kin mihmi rehtail kan?”—Mark 6:3; Madiu 12:46; Sohn 7:5.

Mendahki dahme Pwuhken Rongamwahu mahsanih, irail semen en pelien lamalam tohto kin kamehlele me sohte rien Sises. Ekei kin peikasalki me rien Sises pwutak oh serepein kan iei uhdahn nein rien en Sises pahpa de nohno. * Meteikan kin kasarki me rien Sises pwukat iei nein Sosep ahpw kaidehn nein Mery. Ahpw medewehla: Ma Sises iei nein Mery iehros, mehn Nasaret kan pahn nda soahng wet? Weksang met, ekei irail pein kilang en Mery kin liseian. Re uhdahn ese me Sises iei emen rehn seri tohto me Mery naitikihada.

DAHME ME TOHTO KIN KAMEHLELE: Sises iei Koht ahpw sapwellimanki paliweren aramas.

MEHLEL DE LIKAMW?: LIKAMW.

Madamadau me Koht ketido sampah oh mour nin duwen aramas Sises, kesempwal ong padahk me dene Koht wiawihkihda meh  silimen. Padahk wet mihmihkier ahnsou reirei, ahpw e sohte mie erein ahnsou me Sises ketiket nin sampah. Ehu dikseneri koasoia me Kadehde Kapw sohte kasalehda padahk me dene Koht wiawihkihda meh silimen. Oh padahk wet ekis ekis kekeirda erein sounpar epwiki kei, oh akamai tohto me pwarada duwen ire wet.—The Encyclopædia Britannica.

Ni mehlel, pelien lamalam kin kahrehiong aramas akan en sohte wauneki Sises ni ar padahngki me ih me Koht ni paliweren aramas. * Dahme kahrehda kitail ndahki met? Medewehla karasaras ehu. Tohndoadoahk kei peki mehkot rehn arail kaun, ahpw e nda me sohte eh manaman en wia met. Ma dahme e koasoia mehlel, eri kaun menet kasalehda me mie soahng kan me e sohte kak wia. Ahpw ma e sohte mehlel oh pilada en dehr wia mehnda ma e kak kapwaiada pekipeko, eri e pitih irail.

Eri, dahme Sises ketin wia ahnsou me sapwellime wahnpoaron riemen kasalehda ara men ale pwukoa kesempwalo? E mahsanihong ira: “Sohte ahiong kilelehdi ihs me pahn mwohd ni palimaun oh palimeingi, pwe met pwaisen irailte me Semei ketin onopadahng.” (Madiu 20:23) Ma Sises iei uhdahn Koht, eri mahsen wet sou likamw ehu? Ahpw e ketin wia mehn kahlemeng mwahu en aktikitik ni eh wauneki Meno me sapwellimanki manaman. E ketin kasalehda me ih oh Koht sohte duwepenehte.

DAHME ME TOHTO KIN KAMEHLELE: Sises sohte ketin wiahte ohl mwahu men.

MEHLEL DE LIKAMW?: MEHLEL.

Sises mahsanih ni sansal me ih kaidehn ihte ohl mwahu men. E mahsanih: “Ngehi Sapwellimen Koht.” (Sohn 10:36) Mehlel, emen kak kose me ih sapwellimen Koht. Ahpw ma dahme Sises mahsanih me likamw, dahme aramas akan pahn lemelemehki ih? Re pahn medemedewe me ih kaidehn ohl mwahu men ahpw mwersuwed men!

Koht ketikihda mehn kadehde me keieu mwahu. Pak riau e mahsanih duwen Sises: “Iei met nei pwutak.” (Madiu 3:17; 17:5) Nna medewehla: Pak malaulaute iren Paipel kan kasalehda me aramas akan rong kapitien Koht nin sampah, ahpw pak riau me e ketin kasalehda mehlelpen Sises nin duwen sapwellime Ohl. Met uhdahn kadehdehda me dahme Sises mahsanihki pein ih me mehlel.

Ia duwe, iren onop wet kasalehda ire mehlel kan duwen Sises me ke sohte kin ese mahs? Ma ei, a ke sou kalaudehla omw onopki Pwuhken Rongamwahu? Soangen onop wet kak kaperen oh kak wia ketingpomw. Mehlel, Sises mahsanih me en sukuhlki duwen ih oh Seme kin wehwehki mour soutuk.—Sohn 17:3.

[Nting tikitik kan me mi pah]

[Koakon/​Kilel nan pali 14]

Ire Mehlel Teikan me Ele Pahn Kapwuriamwei ong Uhk

Ia mwomwen Sises ni eh ketin wia aramas men? E kin ketin lemei oh weid me kahrehda e sohte kak patehng aramas akan? Ekei pahn sapeng ei. Ihme kahrehda mwein re pahn pwuriamweikihla ni ar sukuhlki me . . .

• Sises kin ketin towehda kamadipw kan.​—Sohn 2:1-11.

• Sises kin ketin kapinga aramas akan.​—Mark 14:6-9.

• Sises kin kupwurperenki seri kan.​—Mark 10:13, 14.

• Sises ketin tentenihr.​—Sohn 11:35.

• Sises kin ketin poakehla aramas akan.​—Mark 1:40, 41.