¿Cheqapchu icha pantaychu? Jesusmanta creesqanku
¿Cheqapchu icha pantaychu? Jesusmanta creesqanku
PIENSASQAYKIMAN HINA, ¿MAYQANKUNATAQ CHEQAP KANMAN?
Jesusqa 25 diciembre killapim nacerqa.
Jesus naceruptillanmi 3 reykuna watukurqaku.
Manam wawqe-paninkunaqa karqachu.
Jesusqa kikin Diosmi.
Jesusqa manam allin runallachu karqa.
ACHKA runakunam ninmanku kay llapallan creenciakuna cheqap kasqanta. Wakinñataqmi ninmanku kaykunamanta cheqapta yachayqa mana atikusqanta, piensankum Jesuspi iñiylla aswan allin kasqanta.
Bibliam ichaqa niwanchik Señorninchik Jesucristomanta cheqapta yachayqa allinpuni kasqanta (2 Pedro 1:8, NM). ¿Maypitaq chayta tarichwan? Tarichwanmi Jesusmanta rimaq tawa librokunapi. Chaynaqa chay qellqakunatayá servichikusun, chaynapi qawamusqanchik creenciakuna cheqap otaq pantay kasqanta ninanchikpaq.
RUNAKUNAM CREENKU: Jesusqa 25 diciembre killapi nacesqanta.
CHEQAPCHU PANTAYCHU: PANTAYMI.
Bibliaqa manam ninchu ima punchawpi, ima killapi Jesus nacesqantaqa. Chaynaqa, ¿imanasqataq 25 diciembre killapi nacesqanta ninku? Diccionario de la Biblia Paidós, nisqanman hinaqa “Romapi, [. . .] Iglesiam nirqa 25 diciembre killapi [. . .] Natividad fiestata ruranankupaq, chay punchawpim Sol Invicto niqta yupaychaq runakuna fiestata ruraqku, sapa watam chay mana vencey atina inti lloqsimuspan chiri tiempota chinkachiq, chaymi rupay tiempoqa kaqllamanta unay karqa”. Huk reqsisqa libropas ninmi navidad fiesta rurayqa, ‘Intita hinaspa kawsaykunata qespichiq taytacha yupaychasqanku fiestakunarayku’ rikurimusqanta (The Encyclopædia Britannica).
Chaynaqa yanqachiki 25 diciembre killapi Jesuspa nacesqanta yuyariyqa. Manataqmá yachakunchu ima punchawpi Jesus nacesqantaqa. Bibliapas manam kamachinchu chayta ruranapaqqa, manataqmi maypipas tarinchikchu punta cristianokuna chayna rurasqankumantaqa. Ichaqa willakunmi ima punchawpi Jesus wañukusqanmanta, kikin Jesusmi kamachirqa chay wañukusqan punchawta yuyarinapaq (Lucas 22:19). * Yachamusqanchikman hinaqa, manachá Jesusqa ninmanchu karqa Natividad fiestata ruranankupaqqa. Nacesqan punchawta chaninchanankumantaqa munarqam wañukusqan punchawta chaninchanankuta (Mateo 20:28).
RUNAKUNAM CREENKU: Jesus naceruptillan 3 reykuna watukusqankuta.
CHEQAPCHU PANTAYCHU: PANTAYMI.
¿Rikurqankichu Jesuspa nacesqanmanta imapas rurasqankuta? Yaqa llapanpim wawachaqa machaypi siriykachisqa kachkan, kimsa reykunañataqmi regalota qochkanku. Ichaqa ¿chaynachu karqa? Manamá.
Jesusta watukunankupaqqa achka runakunam hamurqaku intipa qespimunan lawmanta. Ichaqa manam reykunachu karqaku, aswanqa yachayniyoq runakunam (Mateo 2:1). Manataqmi animalkunapa kasqanpi nacesqan punchawkunallapichu rirqakuqa, aswanmi wasipiña kachkaptin hinaspa achka killakuna pasaruptinña (Mateo 2:9-11).
¿Haykataq karqaku? Bibliaqa manam ninchu hayka kasqankutaqa. Hinaptinqa, ¿imanasqataq ninku kimsa kasqankuta? Yaqapaschá kimsa clase regalokunata qosqankurayku (Mateo 2:11). * Wakinkunam ninku kay pachapi castakunapa rantinpi kasqankuta, ichaqa manam chaynatachu Bibliaqa yachachin. Reqsisqa runapa nisqanman hinaqa, navidadpi kimsa reykunaqa 700-799 watakunapi willakuq runapa cuento hina rurasqanmi.
RUNAKUNAM CREENKU: Jesuspa wawqe-paninkuna mana kasqanta.
CHEQAPCHU PANTAYCHU: PANTAYMI.
Bibliaqa sutillatam qawachin Jesuspa wawqe-paninkuna kasqanta. Lucas librom nin Jesusqa Mariapa ‘piwi qari wawan’ kasqanta, chaymi nichwan Mariapa huk wawankunapas kasqanta (Lucas 2:7). * Marcos libropas willanmi Nazaret llaqtayoq runakunapas Jesusta wakin wawqe-paninkunata hina reqsisqankuta. Nirqakum: “¿Manachum payqa Mariapa wawan carpintero? Kay llaqtanchikpim yachan paypa wawqen Jacobopas, Joseypas, Judaspas, Simonpas chaynataq paninkunapas”, nispa (Marcos 6:3; Mateo 12:46; Juan 7:5).
Chaywanpas Diosmanta estudiaqkunam ninku Jesusqa Mariapa sapallan wawan kasqanta. Wakinmi ninku Bibliapa nisqan wawqe-paninkunaqa primonkuna kasqankuta. * Wakinñataqmi ninku Mariapa entenadonkuna kasqankuta. Sichu Mariapa wawan Jesuslla kaptinqa, ¿Nazaretmanta runakunaqa nisqankuta rimanmankuchu karqa? Yaqapaschá wakinqa rikurqaku achka kutipi Mariapa wiksayakusqanta, chaymi yacharqaku Jesuspa wawqe-paninkuna kasqanta.
RUNAKUNAM CREENKU: Jesusqa kikin Dios kasqanta.
CHEQAPCHU PANTAYCHU: PANTAYMI.
Kay creenciaqa Jesuspa wañukusqanmanta achka wata qepatañam rikuriramurqa, chayraykum hukllapi kimsa Dioskuna yachachikuypas rikuriramurqa. Huk libropa nisqanman hinaqa, “hukllapi kimsa Dioskuna yachachikuyqa manam rikurinchu Mosoq Testamentopiqa [. . .]. Kay yachachikuyqa tiempopa risqanman hinam astawan yapakurqa, hinaspam achka sasachakuykunata rikurichirqa” (The Encyclopædia Britannica).
Chaynaqa, Jesus kikin Dios kasqanta yachachiqkunaqa Jesustam yanqachachkanku. * ¿Imanasqataq chaynata ninchik? Piensay kaypi, llamkapakuq runakunam patronninta imatapas mañakunmanku, ichaqa patronñataqmi ninman chay mañakusqankuta qonanpaq mana paymanta kasqanta. Chay rimasqan cheqap kaptinqa, qawachinmi mana llullakuq allin patron kasqanta. Rimasqan mana chayna kaptinqa, qawachichkanmi mana allin hinaspa llullakuq patron kasqanta.
Huk kutipim iskay apostolninkuna Jesusta mañakurqaku kamachiptin alleq lawninpi hinaspa ichoq lawninpi tiyaykunankupaq. ¿Imatam Jesus nirqa? “Alleq lawniypi otaq ichoq lawniypi tiyaykuyqa manam ñoqallamantachu, chayqa kachkan Taytaypa akllasqankunapaqmi”, nispa (Mateo 20:23). Jesus kikin Dios kaspanqa, chayna nisqanwanqa llullakuchkanmanchá karqa. Jesusqa manamá pitapas engañaytaqa munarqachu, aswanmi Taytan tukuy atiyniyoq kasqanta qawachiyta munarqa. Qawachirqataqmi, humilde kasqanta hinaspa mana kikin Dios kasqantapas.
RUNAKUNAM CREENKU: Jesusqa allin runalla mana kasqanta.
CHEQAPCHU PANTAYCHU: CHEQAPMI.
Kikin Jesusmi nirqa allin runalla mana kasqanta. Nirqam: “Diospa churinmi kani”, nispa (Juan 10:36). Arí, pipas chaytaqa ninmanmi. Ichaqa Jesus, Diospa churin mana kaspanqa llullakuchkanmanchá karqa.
Diospunim qawachirqa Jesuspa nisqanqa cheqap kasqanta, iskay kutipim nirqa: “Paymi kuyasqay Churiy”, nispa (Mateo 3:17; 17:5). Bibliapa nisqanman hinaqa, kay Pachapiqa manam achka kutipichu Diospa rimasqanqa uyarikurqa, ichaqa iskay kutipim nirqa Jesus Churin kasqanta. ¡Kaywanqa manañamá iskayrayachwanchu!
¿Imallatapas yacharunkichu kay qawamusqanchik creenciakunamanta? Chayna kaptinqa, allinnikipaqmi kanqa Jesusmanta rimaq tawa librokunata estudianaykipaq hinalla tiempochakusqaykiqa. Ama qonqaychu, Jesusmi nirqa “wiñay kawsayniyoqqa” kanqaku paymantawan Taytanmanta cheqapta yachaqkunallam (Juan 17:3).
[Willakuykuna]
^ par. 13 Jesusqa Pascuapim wañukurqa, 14 nisan killapi (Mateo 26:2).
^ par. 18 Mateopa nisqanman hinam, ‘baulchankuta kichaykuspanku’ qorita, inciensotawan miski asnaq mirrata qorqaku. Chay regalokunataqa necesitasqanku tiempopim chaskirqaku, chay tiempokunallapim Jesuswan familianqa huk lawman lluptinanku karqa (Mateo 2:11-15).
^ par. 21 Mariaqa Diospa chuya espiritunwanmi Jesusta wiksayakururqa, wakin wawankunatam ichaqa qosan Joseywan (Mateo 1:25).
^ par. 22 Jerónimo runapa 383 watakunapi chayna yachachisqantam achka runakuna creenku. Tiempopa risqanman hina kikin Jerónimo yachachisqanta iskayrayachiptinpas, hinallam sapichasqa kachkan achka runakunapi, hinaspa Católica Iglesiapa creesqankupipas.
^ par. 26 Kay yachachikuymantam astawan yachanki, ¿Debería creer usted en la Trinidad?, nisqa folletopi. Kay qellqaqa Jehová Diospa testigonkunapa rurasqanmi.
[14 kaq paginapi dibujo hinaspa recuadro]
Jesusmanta astawan yachasun
¿Imayna runam karqa? ¿Santo tukuq hinaspa mana asuykuna runachu? Wakinqa chayna kasqantachá piensanku. Qawasun Jesuspa imayna kasqanta:
• fiestakunamanmi riq (Juan 2:1-11).
• hukkunatam kallpanchaq (Marcos 14:6-9).
• warmachakuna payman asuykunankutam munaq (Marcos 10:13, 14).
• runakunapa qayllanpi waqaytaqa manam penqakuqchu (Juan 11:35).
• llakipayaqmi ñakariqkunata (Marcos 1:40, 41).