Apiianga Pikikaa e te Tika—Tuatua Mou no Runga ia Iesu
Apiianga Pikikaa e te Tika—Tuatua Mou no Runga ia Iesu
EAA TOOU MANAKO? E TIKA AINEI TEIA AU TUATUA ME E APIIANGA PIKIKAA?
Anauia a Iesu i roto ia Titema ra 25.
E toru au tangata pakari tei atoro ia Iesu i te taime i anau ei aia.
E tamaiti okotai rai a Iesu.
Ko Iesu te Atua i roto i te kopapa tangata.
Kare a Iesu i te tangata meitaki ua, e maata atu tona turanga i te reira.
E MANGANUI te ka pau mai e e tika pouroa taua au tuatua ra. Penei ka karanga tetai papaki e e ngata—e kare katoa e rauka—kia kite papu tikai. Penei te manako ra ratou e me irinaki ua koe i roto ia Iesu, kare tikai e inangaroia te pauanga.
Kareka ra, e apinga ke takiri ta te Pipiria e akakite ra. Te akamaroiroi maira te reira ia tatou kia rauka te “kite tika tikai o to tatou Atu ko Iesu Karaiti.” (2 Petero 1:8, NW) Ka rauka ia tatou taua kite ra na te makitoro marie anga i te au Evangeria. Te akakite maira te reira i te tuatua mou no runga ia Iesu, i te tauturu anga ia tatou kia kite e eaa te apiianga pikikaa e eaa te tika. No reira ka akamanako ana tatou i ta te au Evangeria e akakite maira no runga i te au irinakianga tei taikuia i runga ake nei.
IRINAKIANGA: Anauia a Iesu i roto ia Titema ra 25.
TURANGA TIKAI: APIIANGA PIKIKAA.
Kare e tuatua i akakite tikaia mai i roto i te Pipiria no runga i te marama me kore i te ra i anau ei a Iesu. Noea mai i reira te ra 25 o Titema? Kia tau ki The Encyclopædia Britannica, ko tetai aronga tei karanga e e au Kerititiano ratou, kua “inangaro ratou kia tano taua ra ra ki te oroa peikani a to Roma i te akamaara . . . i te tuatau paroro, me roa atu te ora i te au ra tataki tai, e me teitei roa atu te iti anga o te ra.” Te akakite ra taua tataanga ra e e maata te au peu Keritimiti tei tupu mai mei roto i te “au akamaaraanga a te peikani i te ra e te angaanga tanutanu i te tuatau paroro.”
Te mareka ra ainei a Iesu kia akamaaraia tona anauanga i te ra 25 o Titema? E akamaara ana: Kare i kiteaia e eaa te ra anauanga o Iesu. Kare e ngai i roto i te au Tuatua Tapu e akakite maira e kia akamaara tatou i taua ra anauanga ra, e kare katoa e akapapuanga e kua akapera ana te au Kerititiano mua. Kareka ra, te akakite maira te Pipiria i te ra tikai o to Iesu matenga, e kua akaue aia i tana au pipi kia akamanako i taua ra ra. * (Luka 22:19) Te taka ua ra e, ko te mea puapinga ta Iesu i inangaro kia akamanakoia, kare ko tona anauanga mari ra ko te puapinga o tona mate akaatinga.—Mataio 20:28.
IRINAKIANGA: E toru au tangata pakari (me kore au ariki, kia tau ki ta tetai au irinakianga) tei atoro ia Iesu i te taime i anau ei aia.
TURANGA TIKAI: APIIANGA PIKIKAA.
Penei kua kite ana koe i tetai au tutu me kore, au akatutuanga no te anauanga o Iesu, e te pepe ko Iesu e takoto ra i roto i te ngai vairanga kai a te manu, e toru au tangata pakari e tu ra i reira e ta ratou au apinga aroa. Inara, e pikikaa teia akatutuanga kare i te tika.
E tika rai e e pupu tangata tetai tei aere mai mei te Itinga i te akaari i ta ratou akangateiteianga i te tamaiti iti ko Iesu. Inara e aronga akara etu tikai teia au manuiri. (Mataio 2:1) Kua kite ainei ratou ia Iesu i roto i te ngai vairanga kai a te manu? Kare; kua atoro ratou iaia i roto i tetai are. Te papu ua ra e kua pou rai tetai au marama i muri ake i te anauanga o Iesu, i tae atu ei ratou.—Mataio 2:9-11.
Eaa ra te maata o te au manuiri tei aere atu, e rua ainei? e toru? me e 30? Kare te Pipiria i akakite mai. Penei i rauka mai te numero toru tei matauia, mei ta ratou au apinga aroa tukeke e toru. * (Mataio 2:11) Kua karanga katoa tetai aronga e te akatutu tataki tai maira taua toko toru aronga pakari ra i tetai au iti tangata ke. Inara kare taua manako ra e kiteaia i roto i te au Tuatua Tapu. Mari ra, mei ta tetai akamaramaanga no runga i te au Evangeria e akakite ra e, ko teia apiianga pikikaa, e apinga “tamanako uaia mai e tetai tangata tuatua enua i te varu anere mataiti.”
IRINAKIANGA: E tamaiti okotai rai a Iesu.
TURANGA TIKAI: APIIANGA PIKIKAA.
Te akakite taka ua maira te au Evangeria e e au teina e te au tuaine to Iesu. Te taiku ra te Evangeria a Luka e e “tama mua” a Iesu na Maria, i te akaari mai anga e e au tamariki ke atu tana i anau mai. * (Luka 2:7) Te akakite ra te Evangeria a Mareko e ko tetai aronga i te oire o Nazareta, kua akaaite rai ratou ia Iesu ki tona au teina e te au tuaine, i te karanga anga e kare aia i tuke. Kua ui ratou e: “Kare ainei a Iakobo, a Iosepha, a Iuda, e Simona i te au teina nona? Kare ainei tona au tuaine e noo nei i to tatou oire?”—Mareko 6:3, Contemporary English Version; Mataio 12:46; Ioane 7:5.
Noatu eaa ta te au Evangeria e akakite ra, kua maro rai te au poropeta akonoanga e manganui e, e tamaiti okotai rai a Iesu. Kua karanga tetai papaki e e au katini teia au tamariki no Iesu. * Tetai pae kua tamanako ratou e e au tamariki angai teia na Maria. Inara ka akamanako ana: Mei te mea e ko Iesu ua ta Maria tamaiti okotai, ka tuatua ainei taua au tangata Nazareta ra i ta ratou i tuatua? Kare, kare ra e kore e kua kite mata tikai ratou i to Maria au nuianga. Kua kite tikai ratou e ko Iesu tetai o te au tamariki ta Maria i anau mai.
IRINAKIANGA: Ko Iesu te Atua i roto i te kopapa tangata.
TURANGA TIKAI: APIIANGA PIKIKAA.
Ko te manako e kua aere mai te Atua ki te enua nei e koia a Iesu, tei riro ei tuanga puapinga i roto i te apiianga Toru Tai, kua roa te tuatau i te reira apiianga—inara kare te reira i akatumuia mai i te tuatau o Iesu. Kareka ra, te akakite ra The Encyclopædia Britannica e: “Kare te tuatua Toru Tai, e kare katoa taua apiianga ra i roto i te Koreromotu Ou . . . I tupu marie ua mai taua apiianga ra i te au anere mataiti tei aereia e e maata katoa te au taumaroanga tei tupu mai no te reira.”
Te akangateitei kore ra tikai te akonoanga ia Iesu me apii te reira e koia te Atua i roto i te kopapa. * Akapeea ra? Akamanako ana i tetai akatutuanga. Kua tuku tetai aronga angaanga i tetai patianga ki to ratou akaaere, inara kua karanga mai aia e kare ona mana kia oronga mai i te reira. Mei te mea e e tika tana tuatua, te akaari ra te akaaere i te tu pakari e kua kite aia e e iti ua tona mana. Mei te mea ra e kare i te tika—me ka rauka iaia te akatika mai i taua patianga ra, inara kua iki aia e, eiaa—kua pikikaa aia.
I akapeea ra a Iesu i te ariu atu anga ki e tokorua o tana nga apotetoro tei inangaro i tetai turanga teitei no raua? Kua akakite aia kia raua e: “Te noo i taku rima katau, e i taku rima kaui, kare ïa e tika iaku kia oronga atu, mari ra no te aronga i akonoia e taku Metua no ratou ra.” (Mataio 20:23) Mei te mea e ko te Atua tikai a Iesu, kare ainei tera i te pikikaa? Inara, na te kauraro anga ki tei maata atu Tona mana, kua akanoo a Iesu i tetai akaraanga meitaki rava no te tu akaaka—e kua akaari aia e kare aia i aiteite ki te Atua.
IRINAKIANGA: Kare a Iesu i te tangata meitaki ua, e maata atu tona turanga i te reira.
TURANGA TIKAI: TIKA.
Kua akakite tika ua mai a Iesu e kare aia i te tangata meitaki ua mari ra e maata atu aia i te reira. Kua akakite aia e: “Ko te Tamaiti au na te Atua.” (Ioane 10:36) E tika e ka rauka ua i tetai tangata kia karanga e e Tamaiti aia na te Atua. Inara mei te mea e te pikikaa ra a Iesu, eaa i reira aia? Kare aia i te tangata meitaki, mari ra e pikikaa maata tikai!
Ko te akapapuanga ngaueue kore roa atu, na te Atua uaorai. E rua taime kua tuatua aia no runga ia Iesu e: ‘Taku Tamaiti teia.’ (Mataio 3:17; 17:5) Akamanako ua ana: E nga mea atianga ua ta te au Tuatua Tapu i ripoti mai i te akarongoia anga te reo o te Atua i runga nei i te enua—i na oki e e rua o taua au atianga ra, kua akapapu mai aia e e Tamaiti a Iesu nana! Ko teia ua rai te akapapuanga meitaki roa atu e ko Iesu rai te Tamaiti a te Atua mei tana i tuatua.
Kua akaari mai ainei teia atikara i tetai au tika no runga ia Iesu tei kore koe i kite ana i muao? Me koia ia, kore ei koe e makitoro marie atu rai i te au Evangeria tei akauruia mai? Ka riro taua apiianga ra ei mea mareka ua e te merengo. I na e, kua tuatua a Iesu uaorai e ko “teia oki te ora mutu kore” kia kite ratou iaia e tona Metua.—Ioane 17:3.
[Au Tataanga Rikiriki i Raro]
^ para. 13 Kua mate a Iesu i te Ra Pasa, me kore Nisana 14, kia tau ki te karena ngati Iuda.—Mataio 26:2.
^ para. 18 Kua ripoti mai a Mataio e kua “kiriti akera [taua au manuiri ra] i ta ratou apinga” e kua oronga atura i te auro, te tapou kakara e te manongi na Iesu. Te mea umere ra, kua tano meitaki te taime i tae mai ei taua au taoonga ra, i te mea te taka ua ra e—e ngutuare tangata putaua to Iesu—e kare i roa i muri mai kua maroia ratou kia oro e ngai ke ei au tuitarere.—Mataio 2:11-15.
^ para. 21 Noatu e i na roto i te tu temeio i nui mai ei a Maria ia Iesu, kareka te toenga o tana tamariki, i nui mai aia na tana tane ko Iosepha.—Mataio 1:25.
^ para. 22 Ko teia manako, tei turu pakariia e Jerome mei te mataiti 383 T.N., kua ariki uaia i rotopu i te aronga tei irinaki e kua vai paretenia rai a Maria i tona oraanga katoa. I muri mai ra kua akakite a Jerome i tona ekoko no runga i teia manako, kareka ra i roto i te manako o te manganui—e i roto i te turanga akamanaia o te Akonoanga Katorika—kua vai rai taua manako ra.
^ para. 26 No tetai uriurianga maata atu no te apiianga Toru Tai, akara i te poroutia Should You Believe in the Trinity? neneiia e te Au Kite o Iehova.
[Pia/Tutu i te kapi 14]
Au Tika Ou te ka Poitirere Koe
Eaa tikai to Iesu tu ei peretana? E tu piri kore tikai ainei tona ki te tangata, e tu tangi kore e te mata piko, e kare e rauka iaia i te piri atu ki te tangata noa ua nei? Ka pau mai tetai aronga e ae. Penei e, no reira ratou i poitirere ei i te kite e . . .
• kua aere ana a Iesu ki te au akakoroanga mataora. —Ioane 2:1-11.
• kua tuatua akameitaki ana aia.—Mareko 14:6-9.
• e mareka ana aia i te tamariki.—Mareko 10:13, 14.
• kare aia i akama ana i te aue.—Ioane 11:35.
• e ngakau aroa tona.—Mareko 1:40, 41.
